السيرة النبوية

#الحلقة_الثالثة_والستون

#قصص_الأنبياء(٢)
#السيرة_النبوية_إيمان_شلبي
#الحلقة_الثالثة_والستون
#أحداث_السنة_الثانية_من_الهجرة
#زينب_بنت_رسول_الله

قبل ما نبدأ حلقة النهاردة حابة أوضح حاجة😊
وهي إن الهدف الرئيسي من سلسة السيرة إللي أنا بشرحها دي إننا نعيش الأحداث بالتفصيل مع رسول الله ﷺ والصحابة من المهاجرين والأنصار وبالتالي نحبهم لأن حبهم من الإيمان👌
رسول الله ﷺ قال :
" لا يؤمن أحدكم حتى أكون أحب إليه من والده وولده والناس أجمعين."
وقال عن الأنصار : "لا يُحِبُّهُمْ إِلاَّ مُؤمِنٌ، وَلا يُبْغِضُهُمْ إِلاَّ مُنَافِقٌ، مَنْ أَحَبَّهُمْ أحبَّه اللَّهُ، وَمَنْ أَبْغَضَهُمْ أَبْغَضَهُ اللَّه"

أما الهدف الثاني فهو إني عايزاكم تطلعوا من السيرة
《بأكبر كمية معلومات أساسية صحيحة عن دين الإسلام》
يعني أنا مش مجرد بحكي قصة رسول الله ﷺ، لأ أنا بشرح لكم الإسلام من خلال سيرة رسول الله ﷺ،
وانتم أكيد لاحظتم ده من خلال الستين جزء إللي فاتوا💁‍♂️
فمتستغربوش لما تلاقوني بتكلم عن حكم شرعي معين زي حكم حلق اللحية أو حكم البدعة أو حكم من يسب رسول الله ﷺ  إللي اتكلمنا عنهم قبل كده،
أو تلاقوني بتكلم عن كيفية موت الكافر زي المرة إللي فاتت لما اتكلمنا عن موت أبي لهب وكفار قريش،
أو تلاقوني اتكلمت عن علامات الساعة، لأن كل دي من السيرة،
لأن الكلام ده كله موجود في أحاديث رسول الله ﷺ وهو قالها للصحابة، يبقى تبع السيرة ولّا لأ😁
فأنا ناوية إن شاء الله إن السلسلة دي تكون شاملة على الأقل المعلومات المهمة إللي مينفعش نكون مسلمين ومش عارفينها، وعشان نقدر نجاوب على أسئلة منكر ونكير في القبر : من ربك؟ ما دينك؟ من نبيك؟ 👌
عشان كده أنا مش بجيب غير الأحاديث الصحيحة فقط، ولو في حديث مختلف في صحته في الغالب مش بجيبه أو لو قلته بقول لكم عنه إنه مختلف في صحته،
فأنا مش عايزاكم تزهقوا لما تلاقوا إننا قعدنا في حَدث واحد كذا حلقة، وانتم أكيد استفدتم إن شاء الله🙈
فاحتسبوا نية إنكم بتتعلموا علم شرعي:
فقه وعقيدة وتفسير وأخلاق وحديث وتاريخ، كل ده موجود في السيرة 😊

طولت عليكم😅
ندخل بقى في حلقة النهاردة بقى 😁

اتكلمنا المرة إللي فاتت عن التعامل مع الأسرى ومع توزيع الغنائم ووقفنا عند الأسير أبو العاص بن الربيع زوج زينب بنت رسول الله ﷺ وإزاي الصحابة هيتعاملوا معاه،
أبو العاص بن الربيع كان متزوج من زينب وهي أكبر بنات رسول الله ﷺ من قبل البعثة النبوية، وهو ابن خالتها هالة بنت خويلد،
فلما بُعث رسول الله ﷺ كفار قريش طلبوا منه إنه يطلق زوجته زينب زي ما أبو لهب أمر ابنيه أن يطلقا ابنتي رسول الله ﷺ رقية وأم كلثوم إللي اتكلمنا عنهم في البداية،
لكن أبو العاص بن الربيع رفض إنه يعمل كده،
وكان يُحسن للسيدة زينب ويكرمها وكان يحبها وكان رجل أمين، وأسلمت زينب وعرضت على زوجها الإسلام ولكنه رفض، وعاش معاها أكثر من خمسة عشر عاما،
وكان في بداية الإسلام عادي إن المرأة المسلمة تعيش مع زوجها الكافر، ونزل التحريم بعدين زي ما هنشوف إن شاء الله😊
خرج أبو العاص بن الربيع مع المشركين في بدر لقتال رسول الله ﷺ وكان من الأسرى، فلما رسول الله ﷺ قال بالفداء،
يعني كل واحد يفدي قريبه بالمال،
بعثت زينب رضي الله عنها مع أخو زوجها لرسول الله ﷺ قلادة لها كانت أمها خديجة أهدتها لها لما تزوجت،
فلما رأى رسول الله ﷺ القلادة رقّ قلبه جدا وتذكر خديجة رضي الله عنها وقال للمسلمين:
لو حابين تطلقوا لها أسيرها فافعلوا👌
فأطلقوا أبو العاص بن الربيع بدون فداء فوعد أبو العاص رسول الله ﷺ إنه يرسل له زينب، ورجعوا القلادة لزينب رضي الله عنها،
وأوْفى أبو العاص بن الربيع بوعده لرسول اللهﷺ وأرسل له زينب مع إنه كان بيحبها جدا،
وكان ممكن يقول خلاص بقى أنا في مكة ودي زوجتي وعندي والمسلمين مش هيقدروا يمسكوني،
العرب كان عندهم الوفاء بالعهد ده حاجة كبيرة أوي👌
بعث رسول الله ﷺ زيد بن حارثة ومعاه رجل من الأنصار  لمكان قريب من مكة عشان لما يشوفوا زينب يأخذوها ويأتوا بها لرسول الله ﷺ، وزيد بن حارثة في الوقت ده كان اسمه زيد بن محمد يعني يعتبر أخو زينب،
فتقابل زيد مع زينب وأخذها ورجع بها للمدينة مع طفليها علي وأُمامة،
وقعدت في المدينة مع رسول الله ﷺ لحد قبل فتح مكة
وكان رسول الله ﷺ بيرعى أبناء زينب رضي الله عنها علي وأُمامة،
وكان رسول الله ﷺ بيشيل أُمامة على كتفه وهو بيصلي،
يعني كان لما يبقى واقف يصلي يفضل شايلها ولما كان يسجد كان يضعها في الأرض ولما يقوم يشيلها تاني👌