#قصص_الأنبياء(٢)
#السيرة_النبوية
#الحلقة_مائة_وثلاثة_وخمسون
#أحداث_السنة_الثامنة_من_الهجرة
#التجهيز_لمعركة_مؤتة
اتكلمنا المرة إللي فاتت عن الأحداث إللي حصلت بين المسلمين وبين قبائل شمال شبه الجزيرة العربية،
وقلنا إن رسول الله ﷺ بيواجه مشكلتين لازم ياخد منهم موقف حاسم،
الأولى: هي مشكلة قبيلة قُضاعة إللي قتلت أربعة عشرة رجل من المسلمين،
والثانية: مشكلة القبائل النصرانية المتحالفة مع الدولة الرومانية،
رسول الله ﷺ شاف إنه يعالج واحدة ورا التانية وميواجهش الاتنين مع بعض،
لأن مش صح إن رسول الله ﷺ يفتح على نفسه جبهتين للقتال مع قبائل قوية كده وكمان القبائل التانية مسنودة من الدولة الرومانية،
وخصوصا إن دولة الإسلام أه بقت قوية دلوقتي، لكن لسه في البداية برده، مينفعش نفتح جبهات كتير للقتال👌
فاختار رسول الله ﷺ إنه الأول يواجه مشكلة القبائل العربية المُتنصّرة المتحالفة مع الدولة الرومانية في الشَّمال،
لأن المناطق دي خطيرة جدا وأعداد القبائل هناك كبيرة ومن المُتوقع إن الدولة الرومانية ممكن تساعد القبائل دي،
ورسول الله ﷺ كان من عادته إن هو إللي يبدأ بالهجوم عشان عنصر المفاجأة له عامل كبير في النصر،
ده غير إنهم لما يخرجوا لهم عشان يقاتلوهم أفضل من إنهم ييجوا ويحاصروا المدينة، واحنا مش عايزين موقف الأخزاب يتكرر تاني👌
وكمان في الموقف إللي احنا فيه ده القبائل دي مش هتبقى متوقعة إن رسول الله ﷺ يهجم عليهم لأنهم قبائل قوية ومعاهم الدولة الرومانية بتساعدهم،
فكده فكده مش هيلحقوا يجمعوا أعداد كبيرة أوي يعني، طبعا كل ده من خلال تحليل الأمور على الأرض الواقع ساعتها،
ورسول الله ﷺ عارف كويس قوة القبائل العربية دي وعارف قوة الدولة الرومانية، عشان كده كان حريص جدا على تكوين جيش قوي يقدر يقوم بالمهمة دي على أكمل وجه👌
عمل إيه بقى رسول الله ﷺ عشان يقدر يكوّن الجيش القوي ده🤔
◇أولاً: العدد
كوّن رسول الله ﷺ أكبر جيش إسلامي خرج من المدينة لحد اللحظة دي، وكان عدد الجيش ثلاثة آلاف مقاتل وهو أكبر رقم يخرج للحرب في التاريخ الإسلامي لحد اللحظة دي.
◇ثانياً: اختيار القائد
خلى قائد الجيش ده الصحابي زيد بن حارثة رضي الله عنه، ولو تفتكروا، زيد بن حارثة كان قعد زي فترة تدريبية كده في السنة السادسة من الهجرة كان رسول الله ﷺ أخرجه
في ست سرايا ورا بعض وكان هو قائد السرايا دي،
ومننساش إن زيد بن حارسة كان قائد سرية 《حَسمى》 لقبيلة جُزام يعني هو كان عارف المنطقة أصلا وجاء فيها قبل كده👌
ورسول الله ﷺ مجعلش قائد واحد للسرية دي، جعل لها ثلاثة قادة ، يعني الأول زيد بن حارثة، وقال ﷺ لو قُتل زيد يتولى القيادة جعفر بن أبي طالب،
ولو قُتل جعفر يتولى القيادة عبد الله بن رواحة، ودي المرة الأولى والوحيدة إللي ولّى فيها رسول الله ﷺ ثلاثة أمراء على جيش واحد،
ولعل تولية الأمراء الثلاثة كان بوحي من الله،
بس بصفة عامة كان واضح إن رسول الله ﷺ يتوقع حرب شديدة بين المسلمين وبين الجيش إللي هيقابلهم في الشمال👌
◇ثالثاً: إشراك خالد بن الوليد في الجيش.
خالد بن الوليد قائد عبقري وكان قائد فرسان قريش، وعمره ما دخل معركة وانهزم سواء قبل إسلامه أو بعده،
فلأن المعركة دي مش سهلة وهتبقى معركة شديدة أخرجه رسول الله ﷺ مع الجيش.
