#قصص_الأنبياء(٢)
#السيرة_النبوية_إيمان_شلبي
#الحلقة_مائة_وتسعة_عشر
#علامات_الساعة_الصغرى
#الجزء_السادس
وقفنا المرة إللي فاتت عند العلامة الثامنة والخمسون، نكمل في التاسعة والخمسون،
59◇العلامة التاسعة والخمسون : اقتتال فئتين عظيمتين من المسلمين،
قال رسول الله ﷺ:
"لا تقوم الساعة حتى تَقْتَتل فئتان عظيمتان، وتكون بينهما مقتلة عظيمة، ودعواهما واحدة"
والعلامة دي حصلت في أيام الصحابة، والفئتين العظيمتين إللي اقتتلوا كانتا فئة علي رضي الله عنه وفئة معاوية بن أبي سفيان رضي الله عنه،
والقتال ده كان بعد مقتل عثمان رضي الله عنه، وكان رأي علي رضي الله عنه إن لازم تتم البيعة الأول وتستقر الأوضاع وبعدين يقتص من قتلة عثمان رضي الله عنه،
أما معاوية رضي الله عنه فكان عايز يقتص من قتلة عثمان الأول لأن معاوية هو ولي الدم ومن حقه يطالب بالقصاص من قتلة عثمان رضي الله عنه،
وكانوا خلاص اتفقوا على حل يرضي الطرفين وانتهى الخلاف،
لكن واحد اسمه عبد الله بن سبأ اليهودي كان أظهر الإسلام عشان يثير الفتن بين المسلمين هو ومجموعة معاه من المنافقين معجبهمش الصلح إللي حصل بين علي ومعاوية رضي الله عنهما وعرف إن مادام حصل بينهم صلح يبقى مسألة وقت لحد ما يفضوا لهم ويقضوا عليهم،
ففي نفس الليلة إللي حصل فيها الصلح قسموا نفسهم نصين جزء راح في جيش علي وجزء راح في جيش معاوية،
وبدأت كل مجموعة تعتدي على جزء من الجيش وهم نايمين،
فعلي رضي الله عنه وجيشه ظنوا إن معاوية رضي الله عنه وجيشه غدر بيهم،
وفي نفس الوقت معاوية رضي الله عنه وجيشه ظنوا إن علي وجيشه غدروا بيهم وقامت الحرب بين الجيشين وحصل القتال😞
طبعا الموضوع له تفاصيل كثيرة لكن ده باختصار قصة قتال الفئتين العظيمتين من المسلمين.
60◇العلامة الستون : عودة جزيرة العرب جنات وأنهارا،
قال رسول الله ﷺ:
" لَا تَقُومُ السَّاعَةُ حَتَّى تَعُودَ أَرْضُ الْعَرَبِ مُرُوجًا وَأَنْهَارًا"
الحديث ده بيدل على إن جزيرة العرب كانت في يوم من الأيام فيها أنهار وكانت أرض خضراء،
والإذاعة البريطانية الBBC نشرت في فبراير سنة 2015 تقرير بيقول إن جزيرة العرب كانت جنة خضراء من الغابات والحشائش،
وعلى حسب التقارير والأبحاث العلمية فإن جزيرة العرب هترجع مرة ثانية في يوم من الأيام مروجا وأنهارا زي ما رسول الله ﷺ أخبر👌
وفي مرة وقف رسول الله ﷺ عند أرض تبوك وكان معاه معاذ بن جبل فقال له رسول الله ﷺ:
" يوشك يا معاذ إن طالت بك حياة أن ترى ما هاهنا قد مُليء جنانا"
وفعلا دلوقتي في أرض تبوك في مزارع كبيرة وضخمة مكنتش موجودة قبل كده ولسه المساحات هتزيد زي ما قال رسول الله ﷺ.
☆السؤال بقى، إزاي جزيرة العرب اتحولت من أرض مليانة أنهار وخضرة لصحراء جرداء😮
جزيرة العرب كانت جزء من قارة أفريقيا وبعدين انفصلت عنها، طبعا الكلام ده قعد ملايين السنين وتغييرات في القشرة الأرضية وحاجات كده لحد ما بقت جزيرة العرب صحراء😅
وكل ده بتقدير إلهي حكيم، عشان تكون جزيرة العرب مُمهدة لاستقبال الرسالة الخاتمة،
لأنها لو فضلت مروج وأنهار فارس والروم مكنوش هيسبوها وكانوا هيحتلوها،
ومهمة رسول الله ﷺ كانت هتبقى أصعب في الدعوة إلى الإسلام لأن فارس والروم كانوا هيحاربوا الإسلام بكل قوتهم،
وانعزال جزيرة العرب كان سبب في حماية الإسلام من العقائد المنحرفة زي عقيدة الفرس واليونان وغيرها،
ولو تفتكروا في الجزء الحادي عشر اتكلمنا بالتفصيل اشمعنى جزيرة العرب بالذات هي إللي ربنا اختارها عشان تكون فيها رسالة الإسلام فممكن تبقوا ترجعوا للجزء ده،
وفي التعليقات هتلاقوا رابط لحلقة اسمها لماذا جزيرة العرب، فيها شرح إزاي جزيرة العرب كانت جنات وأنهار وكله بالصور والخرائط،
بجد حلقة جميلة جدا هتعجبكم إن شاء الله😊👇
