#قصص_الأنبياء(٢)
#السيرة_النبوية
#الحلقة_مائة_وتسعة_وتسعون
#أحداث_السنة_التاسعة_من_الهجرة
#كعب_بن_مالك_الجزء_الأول
وقفنا المرة إللي فاتت عند كعب بن مالك رضي الله عنه لما راح لرسول الله ﷺ في المسجد بعد ما كان رسول الله ﷺ رجع خلاص من تبوك،
ودخل كعب المسجد وسلّم،
فلما رسول الله ﷺ شافه تبسم له تبسُّم المُغضب وقال له:
تَعَالَ👌
فتوجه كعب لرسول الله ﷺ لحد ما قعد قصاده، فقال له رسول الله ﷺ:
مَا خَلَّفَكَ؟ أَلَمْ تَكُنْ قَدِ ابْتَعْتَ ظَهْرَكَ؟
يعني إيه إللي خلاك متخرجش للغزوة، مش انت كنت اشتريت البعير إللي هتركب عليه وعندك الزاد إللي يخليك تشارك في الغزوة؟
يا ترى بقى كعب رد على رسول الله ﷺ قاله إيه😊
خلونا نرجع بالزمن كده شوية ونشوف قصة كعب بن مالك رضي الله عنه من البداية كانت إيه👌
هنرجع للفترة إللي رسول الله ﷺ كان بيجهز فيها الجيش للخروج إلى تبوك،
كعب بن مالك بيحكي عن نفسه وعن الأحداث إللي حصلت معاه وبيقول إنه عمره ما تخلّف عن غزوة غزاها رسول الله ﷺ قبل تبوك ما عدا غزوة بدر؛
لأن مكنش حد يعرف أصلا إن كان هيبقى في قتال وهم خرجوا عشان يعترضوا قافلة لقريش زي ما قلنا قبل كده،
ورسول الله ﷺ لم يعاتب أحد إنه مخرجش لغزوة بدر،
فغزوة بدر هي الغزوة الوحيدة إللي محضرهاش كعب رضي الله عنه قبل غزوة تبوك،
☆وهنا في ملاحظة ممكن مناخدش بالنا منها وهي إن كعب بن مالك لم يسمح للظروف إنها تأثر عليه👌
يعني واحد خرج مع رسول الله ﷺ في كل الغزوات، مش معقول يعني إن ظروفه كانت مناسبة إنه يخرج في الغزوات دي كلها😅
يعني تخيلوا إنه خرج في حوالي تسعة عشرة غزوة،
باعتبار القول إن عدد غزوات رسول الله ﷺ واحد وعشرين غزوة،
فهو محضرش غزوة بدر ومحضرش غزوة تبوك، يبقى هو خرج مع رسول الله ﷺ في تسعة عشر غزوة،
فإزاي بقى مكنش عنده أي ظرف خلال التسعة عشر غزوة دول، واحنا عارفين إن الظروف متغيرة🤷♂️
فده يدل على إن كعب بن مالك رضي الله عنه مسمحش لأي ظرف يحصل له في حياته إنه يأثر عليه ويمنعه من الخروج للجهاد مع رسول الله ﷺ👌
ولو جينا شوفنا الواقع بتاعتنا هتلاحظوا إن مواعيد الصلاة في أوقات مختلفة أو خلونا نقول في ظروف مختلفة،
يعني سواء الواحد كان نايم فيقوم من نومه عشان يصلي الفجر،
أو كان في شغله فيسيب شغله ويسيب دنيته عشان يروح يصلي الظهر، أو كان مريّح فيسيب راحته ويقوم يصلي العصر وهكذا،
فده ابتلاء واختبار من ربنا عشان يشوف إذا كنا هنسيب الظروف هي إللي تتحكم فينا أو احنا إللي نخلي الصلاة فوق كل الظروف👌
طيب إزاي واحد كان حريص الحرص ده كله على حضور غزوات رسول الله ﷺ ميحضرش الغزوة المهمة دي إللي رسول الله ﷺ أَلزم فيها الناس بالخروج مادام يقدر إنه يخرج😳
كعب بن مالك بيقول:
"وَكَانَ مِنْ خَبَري حينَ تَخَلَّفْتُ عَنْ رسولِ اللهِ ﷺ فِي غَزْوَةِ تَبُوكَ أَنِّي لَمْ أَكُنْ قَطُّ أَقْوَى وَلَا أَيْسَرَ مِنِّي حِينَ تَخَلَّفْتُ عَنْهُ فِي تِلْكَ الْغَزْوَةِ،
وَاللهِ مَا جَمَعْتُ قَبْلَهَا رَاحِلَتَيْنِ قَطُّ حَتَّى جَمَعْتُهُمَا فِي تِلْكَ الْغَزْوَةِ"
يعني هو بادئ كلامه بيقول إنه ملوش عذر، بالعكس بقى دي كانت أكتر غزوة معاه فيها فلوس،
وكمان كان عنده راحلتين مش واحدة، يعني عنده بعيرين يقدر يوصل بيهم لتبوك،
وكان قوي من الناحية البدنية، يعني مكنش عنده أي تعب أو إجهاد،
كمل كعب بن مالك الكلام وقال إن رسول الله ﷺ في غزوة تبوك كان أعلن عن مكان الغزوة بكل وضوح عشان الناس تستعد زي ما قلنا قبل كده،
واجتمع لرسول الله ﷺ عدد كبير من المسلمين وَلَا يَجْمَعُهُمْ كِتَابٌ حَافِظٌ،
يعني مفيش غياب...مفيش دفتر مكتوب فيه أسماء المسلمين إللي حضروا وهيخرجوا للغزو ومين إللي تخلف عن الخروج،
قال كعب:
"فَقَلَّ رَجُلٌ يُريدُ أَنْ يَتَغَيَّبَ إِلَّا ظَنَّ أَنَّ ذَلِكَ سَيَخْفَى بِهِ مَا لَمْ يَنْزِلْ فِيهِ وَحْيٌ مِنَ اللهِ"
يعني كل واحد بيغيب بيبقى عارف إنها غالبا هتعدي، لأن المسلمين كتير يعني كأنه بيقول هي جت عليّ أنا ما في غيري كتير هيطلع، وفي وسط الزحمة دي رسول الله ﷺ مش هياخد باله أصلا،
إلا بقى لو نزل قرآن يذكر الشخص ده بعينه فدي هتبقى قضية تانية،
"وَغَزَا رَسُولُ اللهِ ﷺ تِلْكَ الْغَزْوَةَ حِينَ طَابَتِ الثِّمَارُ وَالظِّلَالُ، فَأَنَا إِلَيْهَا أَصْعَرُ"
يعني كعب بيقول إن وقت خروج الغزوة كان وقت نضوج الثمار و نفسه كانت مشتاقة جدا إنه يجني الثمار ومش عايز يخرج دلوقتي،
فالمسلمين بدأوا يتجهزوا للخروج، فخرج هو كمان عشان يتجهز معاهم لكن نفسه مش عايزة تخرج دلوقتي،
فقعد بقى يلف ويشوف هو محتاج إيه، وفي الآخر مجبش حاجة ولم يتجهز،
زي كده لما الواحد فينا بيبقى مضطر إنه يشتري حاجة بس مش عايز، فيقعد يلف في السوق كده مش عاجبه حاجة ويتحجج إن ده وحش وإن ده مش على مزاجه وهكذا،
فبعد ما رجع كعب من غير ما يشتري الحاجات إللي محتاجها للغزو كان بيقول في نفسه:
"أَنَا قَادِرٌ عَلَى ذَلِكَ إِذَا أَرَدْتُ"
يعني أنا لسه عندي وقت وعندي الفلوس هقدر انزل اشتري إللي أنا عايزه وقت ما أنا عايز.
