#قصص_الأنبياء(٢)
#السيرة_النبوية
#الحلقة_مائة_وخمسة_وتسعون
#أحداث_السنة_التاسعة_من_الهجرة
#انتصار_المسلمين_في_تبوك
اتكلمنا المرة إللي فاتت عن وصول رسول الله ﷺ لمنطقة تبوك ونزول الجيش وتخيِيمه في المنطقة،
وسألنا عن مكان جيش الروم إللي المفروض كان هيقاتل جيش المسلمين في منطقة تبوك،
قبل ما نعرف إيه إللي حصل، عايزة اتكلم عن قصة مشهورة بين الناس عن أبي ذر الغفاري رضي الله عنه لكن سندها لا يصح عن رسول الله ﷺ👌
طيب هو مين أبو ذر الغفاري أصلا🤔
أبو ذر اسمه الحقيقي جُنْدَبْ بنُ جُنادَة بن سفيان، من قبيلة غِفَار،
اتولد قبل بعثة رسول الله ﷺ بحوالي عشرين سنة، وكان طويل ضخم وبشرته سمراء، وكان من الموحدين ولا يعبد الأصنام،
وقبيلة غِفَار كانت مشهور بالسرقة وقطع الطريق، وكان مكانها على طريق القوافل بين اليمن والشام،
فكانت قبيلته بتهجم على القوافل إللي بتمر في الطريق ويأخذوا أموالهم وهو كمان كان بيعمل كده وكان معروف بشجاعته في الهجوم على ااقوافل لوحده،
في يوم من الأيام أبو ذر وأخوه وكان اسمه أُنَيْس وأمهم خرجوا من غفار لحاجة،
وكان الوقت ده بعد بعثة رسول الله ﷺ على طول👌
وهمّ ماشيين، أُنَيس قال لأخوه أبي ذر إنه محتاج حاجة من مكة، فانت خد بالك من أمي لحد ما أرجع،
فراح أنيس لمكة وأبو ذر مستني خارج مكة، فتأخر أنيس على أبي ذر،
فلما جاءه سأله عن سبب تأخيره، فقال له أخوه:
لقيت رجلًا يزعم أن الله أرسله على دينك😕
يعني بيقول له إن في واحد بيقول عن نفسه إنه رسول من عند الله وبيدعو للدين إللي انت عليه إللي هو عبادة الله وحده وترك عبادة الأصنام،
فسأله أبو ذر:
ما يقول الناس له؟ يعني الناس بيقولوا عليه إيه؟
فقال أنيس:
يقولون: إنه شاعر وساحر وكاهن😕
وأنيس ده كان شاعر، فقال لأبي ذر:
"قد سمعتُ قول الكهّان، فما يقول بقولهم،
وقد وضعتُ قوله على أَقراءِ الشعر، فوالله ما يلتئِم لسان أحدٍ أنه شعر، والله إنه لصادق، وإنهم لكاذبون"👌
يعني أنيس بيقول عن نفسه إنه سمع كلام الكهّان قبل كده، وكلام رسول الله ﷺ مش زي كلامهم خالص،
وبيقول إنه وضع كلام رسول الله ﷺ على أوزان الشعر وبحوره ملقاش الكلام يدخل في الشعر خالص،
وهو صادق في كلامه إنه رسول من عند الله، وهم إللي كذابين في ادعاءهم إن رسول الله ﷺ شاعر وكاهن وساحر،
فقال أبو ذر لأخيه:
هل أنت كافيَّ حتى أنطلقَ فأنظر؟
يعني انت تقدر تاخد مكاني وتراعي أمنا لحد ما أروح وأشوف الموضوع بنفسي؟
فقال له أخوه: نعم، لكن خد بالك من أهل مكة عشان محدش منهم يؤذيك؛ لأنهم كرهوه وبقوا يستقبلوه بوجه كريه👌
فانطلق أبو ذر لحد ما دخل مكة،
فقعد يدور على رجل ضعيف يسأله عن رسول الله ﷺ؛ لأنه لما يبقى ضعيف مش هيقدر يعمل حاجة لأبي ذر،
فشاف رجل ضعيف قاعد فسأله:
أين هذا الرجل الذي تدعونه الصّابِئ؟
يعني هو فين الرجل إللي بتقولوا عليه إنه صابئ،
فراح الرجل مشاور على أبي ذر وقال: الصااابئ!!
فالناس إللي كانوا موجودين بدأوا يتلموا على أبي ذر ويضربوا فيه لحد ما أُغمى عليه🙊
وكأن الرجل الضعيف ده كان خدعة😬
أي حد ييجي يسأله يقوم يقول كلمة الصابئ فيعرف المشركون إن الرجل ده بيسأل عن الدين الجديد فيتصرفوا معاه ويمنعوه من السماع عن الإسلام،
فلما فاق أبو ذر وقام؛ كان غرقان دم، فتوجه ناحية زمزم فشرب من مائها وغسل عنه الدم ودخل قعد بين الكعبة وأستارها وقعد هناك حوالي ثلاثين يوم وليلة،
ومكنش في حاجة ياكلها ولا يشربها غير ماء زمزم،
فقعد الثلاثين يوم وليلة مياكلش أي حاجة خااالص إلا إنه يشرب ماء زمزم،
ومع ذلك مكنش جعان خالص، وبالعكس ده بقى سمين لدرجة إن بطنه بقى فيها ثنيات من السّمنة😅
وفي ليلة من الليالي القمر فيها كان بدر ومُضيء السماء، ربنا ألقى النوم على أهل مكة، ومكنش في حد بيطوف حول الكعبة غير امرأتين بس،
وكان من العادة إن يكون في ناس بتطوف حول البيت، لكن الليلة دي سبحان الله مكنش في حد خالص غير المرأتين دول،
فجاءت المرأتان ناحية أبي ذر وهما بيدعوان إساف ونائلة، الصنمين إللي مسخهما الله حجرين بعد ما زنيا عند الكعبة واتكلمنا عنهم في بداية السيرة لو تفتكروا😅
المهم يعني هو كان بيسمعهم وهم بيدعو فقال لهم باستهزاء إنهم كانا زانيين، فالمرأتين قعدوا يُوَلوِلُوا ويقولوا: أما لو كان في حد هنا من عشيرتنا😠
وهم ماشيين يُوَلوِلُوا قابلهم رسول الله ﷺ ومعاه أبو بكر الصديق رضي الله عنه وكانوا نازلين من الجبل،
فسألهما أبو بكر: مَا لَكُمَا؟
قالتا: الصابئ بين الكعبة وأستارها😥
فقالا: مَا قَالَ لَكُمَا؟
قالتا: قال لنا كلمة تملأ الفم😣
يعني قال كلمة عظيمة جدا وقبيحة في حق الآلهة منقدرش نقولها،
فجاء رسول الله ﷺ ومعاه أبو بكر فطاف بالييت وبعدها صلى، فشافه أبو ذر وجاءه وحيّاه بتحية الإسلام،
وكان هو أول واحد يُحَيّي رسول الله ﷺ بتحية الإسلام، فرد عليه رسول الله ﷺ:
وعَلَيْكَ وَرَحْمَةُ اللَّهِ، مِمَّنْ أَنْتَ؟
فقال له أبو ذر إنه من قبيلة غِفَار، فأهْوَى بيَدِهِ فَوَضَعَ أَصَابِعَهُ علَى جَبْهَتِهِ، يعني رسول الله ﷺ وضع إيده على جبهته بالطريقة دي👈 🤦♂️
فلما شافه ابو ذر عمل كده قال في نفسه:
كَرِهَ أَنِ انْتَمَيْتُ إلى غِفَارٍ، يعني هو فكر إن رسول الله ﷺ محبش إنه منتمي لقبيلة غِفار، لأن القبيلة معروفة بالسرقة والسطو،
فمد أبو ذر إيده عشان يشيل يد رسول الله ﷺ من على جبهته فمنعه أبو بكر رضي الله عنه،
وبعدين رسول الله ﷺ رفع رأسه وسأل أبا ذر هو بقاله أد إيه في المكان ده،
فقال له أبو ذر إنه هنا بقاله ثلاثين يوم وليلة،
فسأله رسول الله ﷺ هو كان بياكل منين، فقال أبو ذر لرسول الله ﷺ إنه طول الفترة دي مكنش بياكل حاجة غير إنه كان بيشرب من ماء زمزم لحد ما سِمن وبطنه بقى فيها ثنيات من السمنة، ومحسش بأي جوع خلال الفترة دي،
فقال له رسول الله ﷺ:
"إنَّهَا مُبَارَكَةٌ، إنَّهَا طَعَامُ طُعْمٍ"
مُبَارَكَةٌ يعني تظهر بركتها على إللي بيكون نيته كويسة وصادق وهو بيشربها،
وطعامُ طُعْمٍ يعني زيها زي الطعام، إللي بيشرب منها بتشبعه وتقوّيه زي ما الطعام بيشبع ويقوّي👌
