#قصص_الأنبياء(٢)
#السيرة_النبوية_إيمان_شلبي
#الحلقة_مائة_وخمسة_وأربعون
#أحداث_السنة_السابعة_من_الهجرة
#رؤيا_رسول_الله_عن_أهل_البرزخ
وقفنا المرة إللي فاتت عند عبد الله بن عمر بن الخطاب لما كان نايم في المسجد وشاف رؤيا،
شاف عبد الله بن عمر في الرؤيا إن في مَلكين أخذوه وذهبوا به إلى النار، يقول:
" فَرَأَيْتُ في المَنَامِ كَأنَّ مَلَكَيْنِ أخَذَانِي فَذَهَبَا بي إلى النَّارِ، فَإِذَا هي مَطْوِيَّةٌ كَطَيِّ البِئْرِ، وإذَا لَهَا قَرْنَانِ كَقَرْنَيِ البِئْرِ"
عبد الله بن عمر بيوصف شكل النار وبيقول إنها كانت مَطْويَّةٌ طَيَّ البئرِ، يعني مبنية من الجوانب بالطوب، إللي هو شكل البئر المعروف، والبئر لو مكنتش مبنية بالطوب من على الجوانب بيبقى اسمها 《القَلِيب》،
وبيقول إنها كان لها قرنين زي قرنين البئر، والمقصود بقرنين البئر إللي هم الخشبتين إللي بيكونوا على جانبي البئر وبيربط بينهم خشبة بيتعلق عليها بكرة الحبل إللي بيكون مربوط فيه الدلو أو الجردل، أكيد شوفتم شكل البئر في أي كارتون ولّا حاجة😅
المهم،
عبد الله بن عمر بيقول إنه لما وصل للنار دي شاف بداخلها ناس يعرفهم، فخاف واترعب وقعد يقول : أعوذ بالله من النار...أعوذ بالله من النار😣
" وإذَا فِيهَا نَاسٌ قدْ عَرَفْتُهُمْ فَجَعَلْتُ أقُولُ أعُوذُ باللَّهِ مِنَ النَّارِ، أعُوذُ باللَّهِ مِنَ النَّارِ"
فقابلهم مَلك ثالث فقال لعبد الله بن عمر: لم تُرَعْ👌
يعني متخافش متخافش، مفيش ضرر عليك ولا فزع،
فلما استيقظ راح عبد الله بن عمر لأخته حفصة زوجة رسول الله ﷺ وحكى لها الرؤيا، فحفصة حكت لرسول الله ﷺ الرؤيا بتاعة عبد الله،
فقال لها رسول الله ﷺ في تفسير الرؤيا :
《نِعْمَ الرَّجُلُ عبدُ اللَّهِ لو كانَ يُصَلِّي باللَّيْلِ》
يعني رسول الله ﷺ بيقول إن عبد الله بن عمر هيبقى رجل صالح لو كان بيصلي قيام ليل،
فلما حفصة رضي الله عنها وصّلت الكلام لعبد الله بن عمر، فمبقاش يسيب قيام الليل أبدا ومكنش بينام في الليل إلا قليل👌
☆نتعلم من قصة عبد الله بن عمر إن قيام الليل سبب في نجاة الإنسان من النار👌
وبما إننا بنتكلم عن قيام الليل، فممكن ناس تكون فاهمة إنها لازم تكون تفضل تصلي طول الليل،
وفي ناس بتبقى نفسها تصلي قيام ليل بس بيكون عندها شغل وأولاد وتعبانين ومحتاجين للنوم والراحة، طيب إيه الحل😕
شوفوا،
قيام على قدر الاستطاعة، يعني الواحد ممكن يصلي ركعتين وممكن يصلي إحدى عشرة ركعة،
مش مطلوب نصلي بالبقرة وآل عمران عشان يبقى كده أقمنا الليل😅
طبعا إللي يقدر يعمل كده مفيش مشكلة خالص بالعكس دي حاجة كويسة،
لكن أنا بتكلم على إللي مبيقدرش أو عنده ظروف👌
خلينا نشوف حديث رسول الله ﷺ الرائع إللي بيسهل علينا وبيدينا أمل إن بإمكان كل واحد فينا على اختلاف ظروفه يقدر يصلي قيام ليل، يقول ﷺ:
"مَنْ قَامَ بِعَشْرِ آيَاتٍ لَمْ يُكْتَبْ مِنْ الْغَافِلِينَ ، وَمَنْ قَامَ بِمِائَةِ آيَةٍ كُتِبَ مِنْ الْقَانِتِينَ ، وَمَنْ قَامَ بِأَلْفِ آيَةٍ كُتِبَ مِنْ الْمُقَنْطِرِينَ"
