السيرة النبوية

#الحلقة_الحادية_عشرة

#قصص_الأنبياء(٢)
#السيرة_النبوية
#الحلقة_الحادية_عشرة
#رسالة_الإسلام_والعرب

وقفنا المرة إللي فاتت عند رسول الله صلى الله عليه وسلم لما أخذ أول خطوات الدعوة إلى الإسلام ،
وبدأ يشوف مين هم الأشخاص المناسبين حوله عشان يقول لهم عن بعثته 😉
وكان أول شخص أخبره رسول الله صلى الله عليه وسلم هي زوجته خديجة رضي الله عنها إللي آمنت بدون أي تردد👌

وقلنا إنه دعا ثلاثة أشخاص كمان هم أبو بكر الصديق وعلي بن أبي طالب وزيد بن حارثة، وكل واحد فيهم له قصة مختلفة عن التاني👌

قبل ما نعرف قصتهم في سؤال مهم لازم نعرف إجابته
وهو :
اشمعنى العرب بالذات إللي ربنا اختارهم عشان تكون فيهم الرسالة 🤔
ما هو أهل الأرض كلهم كانوا ضايعين زي ما شفنا المرة إللي فاتت ..يعني مكنش هتفرق كتير🤷‍♀️
ليه مكنش رسول الله صلى الله عليه وسلم من الروم أو من الفرس مثلا واشمعنى اللغة العربية بالذات إللي نزل بها القرآن🤔

تخيلوا إن مكة هي أنسب مكان يخرج منه نبي آخر الزمان، والوضع فيها مناسب جدا عشان تبدأ فيه الدعوة الإسلامية👌
خلينا نأخذهم واحدة واحدة:
أولا اختيار مكة بالذات:
♡النقطة الأولى:
مكة أو جزيرة العرب بصفة عامة مكنوش يعرفوا غير دين إبراهيم عليه السلام ،
يعني بيعترفوا بوجود خالق للكون لكن حكموا معه غيره ..فسهل إننا ندعي ناس تؤمن بالله لكن عندهم لخبطة من إننا ندعي ناس لا تؤمن بوجود إله اصلا ،أو بتقول إن الإله هو النار ولا الفأر ولا غيره😅
فكأن ربنا بيعلمنا إننا في الدعوة نبدأ من الناس إللي هتستوعب الكلام أو هتتقبل فكرة الدين الأول وبعدين ندعي الناس إللي متعرفش حاجة خالص😉
فندعي الأقرب فالأقرب..يعني منسبش أهلنا وجيرانا وأصحابنا من غير دعوة خالص ونروح ندعو غير المسلمين🙃
نشتغل على الدائرة القريبة مننا الأول ..ملقناش نتيجة يبقى نتجه لغيرهم👌

♡النقطة الثانية
العرب مكنش عندهم تاريخ ثقافي يُذكر، حياة تعتبر بدائية بسيطة جدا👌
لكن الروم مثلا كان فيها فلسفات كثيرة وظهر فيهر فلاسفة زي أرسطو وأفلاطون وغيرهم،
والدولية الفارسية كان برده فيها ناس زي الفلاسفة كده كانوا بيحطوا شرائع للناس زي مَزدك ،
والهند كان فيها حكماء كثير جدا زي ما بيقولوا ،
ومصر كانت أرض الفراعنة زمان ولهم تاريخهم الطويل وعندهم قوانين وتشريعات وكانوا تابعين للدولة الرومانية يعني كانوا نصارى،
فتخيلوا لو كان رسول الله ظهر وسط حضارة من الحضارات دي كان الناس هتقول إيه😕

كانوا هيقولوا ده بيقلد الناس إللي سبقوه والكلام إللي بيقوله ده مجرد تطور للثقافات والمعتقدات السابقة💁‍♀️
تخيلوا إن ربنا مخلاش رسول الله يعرف يقول شعر زي باقي العرب مع إنه أبلغ العرب وأفصحهم،
والناس كلها عارفة ده عنه عشان لما القرآن ينزل ويبلغه لهم ميقولوش ده إنت إللي مؤلفه👌
☆ مع إنهم هيقولوا برده زي ما هنشوف🙄