#قصص_الأنبياء(٢)
#السيرة_النبوية_إيمان_شلبي
#الحلقة_السابعة_والستون
#حياة_رسول_الله_مع_الصحابة_الجزء_الثاني
#زيد_ثابت_وزاهر_بن_حرام
#قصة_هاروت_وماروت_والسحر
اتكلمنا المرة إللي فاتت عن حياة رسول الله ﷺ مع الصحابة في المدينة وشوفنا بعض مواقفه معاهم،
هنكمل النهاردة إن شاء الله الكلام عن حياته ومواقفه مع الصحابة ونحكي كم موقف لرسول الله ﷺ،
رسول الله ﷺ كان بيمازح أصحابه وكان متواضع جدا معاهم، وكان قريب منهم جدا زي ما ربنا أمره :
"وَاخْفِضْ جَنَاحَكَ لِلْمُؤْمِنِينَ "
كان في صحابي اسمه زاهِر بن حرام يعيش في البادِية، من البدو يعني، وكان من الصحابة إللي حضروا غزوة بدر،
فكان لما يأتي المدينة كان بيجيب معاه لرسول الله ﷺ هدية زي الثمار والنباتات والأدوية العشبية إللي مش بتكون موجودة إلا في البادِية وكان رسول الله ﷺ بيجهزه في سفره، كجزاء مقابل هديته،
فكان رسول الله ﷺ يقول :
"إن زاهر باديَتنا ونحن حاضروه"
يعني هو بيفيدنا بالحاجات إللي بيجيبها من البادية ومش موجودة عندنا،
واحنا بنجهزه بالحاجات إللي بيحتاج لها من البلد.
◇عارفين زي مثلا لما حد ييجي من الأرياف زيارة لحد من المدينة ومعاه الجبنة الحدقة والفطير المشلتت، كده يعني😅
وكان زاهر بيُضحك رسول الله ﷺ وبيحكي له مواقف فكاهية ،وكان رسول الله ﷺ بيحبه،
وكان زاهر دمِيم ، يعني بلغة عصرنا شكله وحش...قبيح المنظر،
في يوم من الأيام كان زاهر في سوق المدينة بيبيع بعض أغراضه ورآه رسول الله ﷺ فجاءه من وراه وحضنه، وفي رواية إنه حط إيده على عينه،
تخيلوا الموقف، واحد رافع إيده وماسك ملابس مثلا وبيعرض بضاعته في السوق وبعدين رسول الله ﷺ جاءه وحضنه من تحت إبطه وراح مغمي عينه وقعد رسول الله ﷺ ينادي:
"مَن يشتري العبْد...مَن يشتري العبْد"
من باب المزاح، إن البائع بقى هو إللي بيتباع دلوقتي😁
فزاهر قعد يقول: أرْسلني، يعني سيبني، وهو ميعرفش إن إللي حاضنه ده رسول الله ﷺ،
فلما أخذ باله من إن الشخص إللي حاضنه ده هو رسول الله ﷺ قعد يلصق ظهره برسول الله ﷺ تبرّكا به ﷺ،
وقال له زاهر:
إذاً تجدُني كاسدًا يا رسول الله😅
يعني مش هتلاقي حد يشتريني ولا يرغب فيّ أو ثمني رخيص، بسبب إنه شكله دميم،
فقال له رسول الله ﷺ: لكنك عند الله لست بكاسد، لكنك عند الله ربِيح👌
يعني إنت عند ربنا غالي مش رخيص، لأن الله لا يَنظر إلى شكل الناس ولا ملابسهم ولا لون بشرتهم،
لكنه ينظر إلى قلوبهم👌
تخيلوا لو الناس اهتمت بقلوبها زي ما بتهتم بإنها تلبس الملابس المكوية وتلبس الماركات العالمية وتلبس الألوان المتناسقة عشان يبقى شكلها حلو قصاد الناس،
حالنا هيكون عامل إزاي😓
☆زاهر كان حُر ورسول الله ﷺ لما كان بيمزح كان لا يقول إلا الصدق، فلما قال من يشتري العبد، كان يقصد إن زاهر عبد لله😊
وهنا معلومة مهمة👌
لا يجوز قول النكتة إللي فيها كذب، رسول الله ﷺ يقول:
"ويل للذي يُحدّث فيكذب ليضحك به القوم ويل له ثم ويل له"
وويل ده وادي في جهنم، يعني إللي هيكذب عشان يضحك الناس هيتعذب في وادي وَيْل👌
ويا سلام بقى لو اجتمع مع الكذب في النكتة الكلام الفاحش أو كلام فيه كفر...كارثة😶
