حين تحلق الفراشات

53

السلام عليكم
حسب التعليقات الاغلب مناسيها وصلنا هنا

كان الحدث استشهاد شجاع اخو جهاد وهو كان بالحشد العشائري الي منتسبيه من اخوتنا ابناء الرمادي الابطال الي ساهمو مع اخوتهم بتحرير اراضيهم
لكن هو بدوره كان يتبع نسيبهم اخو زوجة اخوهم الكبير سلطان الي اتفق وي زوج عمتهم الضابط الكبير بالأمن بالنظام السابق اتفق وياه حتى يوگع زوجته ويعلقها بيه لان رافضه زوجها وكارهته وبعدها زوجها شهر بيها وانتقم منها ومن عائلتها وهي انتحرت بقت بين هالشخصين وجهاد عداوات الحد الي راقبو بيت جهاد وبسببهم خاف على زوجته وترك بيته وعمله
وكان اله دور كبير بالتعاون وي جهات حكومية الكشفهم الحد الي تم كشفه الجهاد وملاحقته  واصابته ورجوعة بعد ان احتوته عائلة وامنت حمايته
ورغم الي صارله وبعد عودته العائلته بقى متواصل وي اخوته المراقبتهم فقط وكان متعاون وي جهات حكومية كل همه يلقون القبض عليهم ويعرف السبب الي خلاهم ينتقمون منها بهالطريقة وعدائهم اله وملاحقته

لكن استشهاد اخوه راح ينقلب ضده بالنسبة الأهله وهذا الي نشوفه بالأحداث القادمة

......

ياقوت..

اتصلت ع بابا لان كنت متفقه وياه اروحله وهم اريد انطي علم بالصار
كلي روحي واني جاي وراج

صحت حسن واني البس شال وجواريبي وصحت ماس تنطيني عباتي

وعمتي ورنا يسألن شكو وشصار بسرعة  حجيت

.. شجاع حمه زمرد مستشهد

هنه هم خطيه ضاجن حيل على جهاد وزمرد لأن ماارتاحو ابد

طلعت باستعجال والف حسبه ابالي مااعرف شلون وصلت
لكيتها فاقده تبجي اريد افهم منها شي مجاي افهم تضرب وجهه وتبجي وجهالها يصرخون

طلعهم حسن للحديقة وكوه هدأتها افهم منها

.. ولج احجي منو كلكم بلكي الخبر مو صح

من بين شهكاتها جاوبتني بصوت متقطع

.. لا شنو كذب مبين جهاد جان متأكد لج سوده عليه مرتين عثر كام ميشوف دربه شلون بي بهذا الطريق شيوصله لج متعرفين شنو يعنيله شجاع  مو اخ والله مو اخ هو كل اهله وناسه كل ارتباطه بيه كلشي يهون من يهون عليه

اوووف ياعذراء شنو حالج هسه انتي وجهالج منو الكم

.. بجيت وياها واني اتخيل موقف اهله
مار عليه هالقهر واكثر من يحس بيهم اني
صارت حركه بره واصوات يسألون حسن
ركزت هذا صوت ابويه
اجه يحجي وياها يفهم وضع رجلها

كالتله افهمو من مؤمن خل يتصل بسيد رياض مااعرف وين يروح هسه اصلا مااعرف اهله وين سكنو اخر فتره وين استقرارهم بس مؤمن وسيد رياض يعرفون