حين تحلق الفراشات

19

تلاكينه وذبل بعيونه الليل
وتعاتبنه وبردنه وماتغطينه

خدر بينه الهوا احجايات ذرعان
وطفح بينه العشك حد ما تبدينه

تناوشت النجم لثيابها ازرار
ويم زيج الصبح يا هيل غنينه

...........

عيوني جانت تتوسله ينظرلي نظرة اخيره نظره اشوفه بيها راضي اشوف نفس المحبه الجنت احسها قبل اشوف بيها بعدني مدللة بابا بنيته وغاليته
اشوف بيها خوفه عليه وحرصه بس هو ماباوعلي ابد
اتقدمت عليه واحس كل خطوه مني بثكل الجبال
وصلت يمه حضنته حيل بجيت وشهكت بحضنه اتنفست بقوة اريد اشتم عطره اريد اشبع منه ابويه مو ابو عادي ابويه حاله خاصه يختلف عن الاباء ضحى بهوايه الاجلنه اعترف ماجازيته خيبت ظنه بس الي بينه هو زرعه هو خلانه نحلم نعيش عمر بهذا الوفاء
خلاني عمر احلم لو حبيت مااتخلى مهما كان
ولو رافض من البدايه والله مااكسر كلمته بس رفضه وره خطوبه وعقد وحب اتبادلناه وامل انزرع بينه كلش صعب والاصعب لما حبيبي يكون متمسك بيه مستعد يوكف بوجه الكل حتى اصير اله

حضنته حيل اشتميت صدره
اتمنيت يلفني بحضنه بس جان حضنه بارد
بارد حيل وجع روحي ببرودته
اتشجعت وحاجيته

.. بابا اني اسفه خيبت ظنك ماجازيتك اعترف بس الخاطر امي وترابها لاتعذبني اني يتيمه من الصغر بس عمري ماحسيت بيتم وياك لاتيتمني على كبر..
مااريد منك شي بس لاتنساني فد مره والله مافرحانه ولا احس بفرحه وانت زعلان

لف ادينه عليه ربت ع متني بهدوء ومسح راسي

.. انتي اختاريتي طريقج الله يوفقج اني ماراضي ولا ارضى السبب ربيت وكبرت وتعبت عليجن وانتي بالذات تختلفين لان انتي اصغرهن اكثر وحده اهتميت بيها تالي تزوجين واحد اخو وخاله ارهابيين قتله تعرفين شنو قتله ترفضين ابن عمتج علموده واني عبالي ترحين بطريقج وترجعين بطريقج

.. بابا هو شعليه.. واني والله

اجيت اكول ماجانت عندي علاقه بي ماخلاني اكمل

.. هذا هو انه لا اقنعج ولا تقنعيني

راح الغرفته واني رحت البيبي جانت كاعده تسبح
بعدت ايديها عن حضنها خليت راسي بحضنها وظليت ابجي
مسحت دموعي وهي تدعيلي
صرت ابجي اكثر صوتي عله بيه حسرات هوايه منا وحشة بعدي عنهم منا زعل ابويه وتفكيري بحياتي الجايه
اهله هو مو راضين الظاهر كلامه واضح انو امه مو راضيه
شنو راح تكون حياتنه اذا الاثنين منبوذين عد اهالينه

ناسيه نفسي الظاهر وصوتي كان عالي وعبراتي المخنوكه طلعت ماعدت اسيطر عليها

اجت ياقوت كالت

.. زمرد كافي تعبتي وتعبتي ابويه ترى ضغطه مرتفع وانتي هيج تقهري

كعدت من حضن بيبي وهي تعدل بشعري وتمسح براسي بعدت عنها شويه وكعدت