حين تحلق الفراشات

68

يسعد صباحكم ❤️

....

ﻓﻤﺮﺿﺖ ﻣﻦ ﺍﺳﻔﻲ ﻋﻠﻴﻪ
ﺷُﻔﻲ ﺍﻟﺤﺒﻴﺐ ﻓﺰﺍﺭﻧﻲ..
ﻓﺸُﻔﻴﺖ ﻣﻦ ﻧﻈﺮﻱ ﺇﻟﻴﻪ

....
ماس

البيت هذا بكبره احسه مو سايعني مزعج هذا الشعور الي احس بي الألم والخوف مسيطر عليه احس گلبي واجعني مچان يضخ دم الجسمي احس دمي اتحول نار يفور بجسمي وراسي
هذه اللحظات والدقايق الي رعبتهن تسوى عمر متنسى من شدتها هذا كان حالي
اتصلت خالة فيروز شكد ماقبل شويه اتصل بيها ومترد وجنت اتمناها تجاوبني خفت افتح خط لتروح تگلي لا مو اصابه هو استشهد هالفكرة نخرت راسي بوقتها صرت اهزه بدون وعي ومااعرف شنو احجي اتذكر ماما حاضنتني تريدني اسكت وبيبي تولول يمي
انطيتها الفون تجاوب خالة هي ومن شفت ملامح ماما لانت وابتشرت شي بداخلي اطمئن اخذته منها ارد افهم

ماگدرت احجي ومن الشهگه الشهگتها هي عرفتني

.. ماسه حبيبتي الحمدلله ع سلامته سهلة اصابته لاتخافين والله   بذراعة الاصابة

.. متأكدة خالة فدوه

.. والله متأكدة اني يم الحجية وفواطم والشيخ بنفسه اتصل بيهم وراحوله هسه هم ومؤمن الرصاصة مطلعيها هناك بس محوليه البغداد يسوولة فحوصات واشعة خاف العظم متهشم  يحتاج بلاتين

.. بلاتين ليش خالة شنو خطرة اصابته

.. كرلي يا الله يمعوده اهله جاي يصلون صلاة شكر مدام بأيده سهله

.. يارب يسمع منج

سديته واتذكرت هو زعلان عليه مااعرف ضايج واني صوجي مااهتميت

اتصل حسن يكل الامي ترى اصابته سهله بس هو تعبان فاقد دم هواي واحتمال يحتاج عمليات
اني لزمتني رجفة مال اول خبر من ارعبت ابد مراحت مني صليت دعيت اريد الرجفة تروح مراحت
بيبي صاحتني يمها خليت راسي بصفها وهي ظلت تقرا عليه وماما غطتني ابطانيتين ونفس الشي

ماما گالت اني لازم اروح الأهله اشوفهم واحجيلهم حالتج وارجع مااطول عليج بس عيب مااوصلهم ماترهم ولو تكدرين انتِ جان ماخذتج وياي
وقبلها اتصلت بعمة رنا حجتلها
بعد ماطلعت ماما شويه واجت بيبي ولارا وعمه رنا
خطيه بيبي انشلع گلبها عليه وهي منا روحها رايحه منو التسمع بي مصوب لو مستشهد تنصب عليه من يمها مناحة بحجتهم تذكر اولادها
اني عود كلت ماابجي اخاف عليه مااريد افاول بس من شفتها خوفها عليه وهي تلزم اديني تريد تسيطر على رجفتهن وعمه تفرك رجلية اباوع لارا دمرعها ويانه هيج حالي يبجي لو هنه بردن يبجن
شويه واجن ماما بعدها اجاني بابا
حاولت اگعد يمهم الرجفه نفسها ماما خافت حيل بعد مامرت ساعات وشافتني اتجارب وياهم عادي بالكلام بس الرجفة تزيد
بابا گلها لتخافين هاي من الرعبة بس المفروض تنطيها شي حلو تشربه
راحت خطيه سوتلي عصير احسه مر مابي اي حلاه من شربته ريگي مر يذبح