حين تحلق الفراشات

54

زمرد..

فرحانه برجعته من جهة ومكسور گلبي وخايفة هم

اخر اتصال بيني وبينه حچيت الي بگلبي كله بدون مااراعي وضعه وحالته من خوفي وقهري كلشي حچيت
كتله يومية اوصل الموت يومية متفارگين جهالك متبهذلين اني متبهذله لشوكت

هو يحچي وياي بعصبية يكلي انتِ متقدرين اخوي هذا اخوي تعرفين شنو اخ اهلنا محمليني مسؤولية موتو وتردين اعوف كلشي
هو نايم تحت الترب وهم يشمون الهوا
مابالحيف

گتله هالمرة ماتلگاني انتظرك ولا راح احارب مثل قبل هالمره اني الي راح انهي كلشي.

وقبل لايحچي غلقت التليفون لأن ماكو نتيجة وحلفت مااضعف وراسله ولا اسأل اريد اشوف هيج احنا شامرنا
اني منو الي بعده مايفكر بيه مو شافني ع فراش الموت چنت والهسه وضعي كله مخربط

وحدي وي الجهال اكل بروحي شلون اكسر الحاجز وارجع اخذ من خاطره وانسى الزعل الي صار بينا خاف هو مينسى

الجهال وهوستهم يمي
انطيت العاب للتوم بغرفتهم وحمودي يمهم يلعب مكعبات

شلت حسين  يبچي جوعان ارد اسويله حليب ضاعت عليه الممة هو مفرفح يبچي واني مخبوصة  ادور وين يلا لكيتها بصفي

صدگ لو گالت بيبي

الشوف بالگلب مو بالعين!

سويتله ممته ونيمته خليته بسريره بغرفتنا على كيف واتسحبت من الغرفة

اباب الغرفة اتنفست بعمق اووف حتى النفس كاتمته خاف يگعد

طلعت شفت الجهال ع كعدتهم ومروان مچلب بشعر روان وهي خامشه  خشمة ومتقبل اتركه واثنينهم يصرخون
ومحمد عبالك مو يمهم ولايسمع تاركهم

صحت عليهم

.. هاي ليش ماما شبيكم ع العرك يلا اتصالحو حبايبي بوسها مروان روان تحبك
ماقبلو اثنينهم زعلانين بستهم اثنينهم وانطيت كل واحد لعبته

وعفتهم وگمت  همزين سبحت والبنات هنا ميخلوني اتحرك اخاف اخليهم وحدهم

گمت محتاره شأسوي اباوع الملابسي مو مهم بالبيت شالبس البس

اني لبست اسود من اول يوم احترام اله وشجاع اعزه وممروده مرد عليه وعلى عذراء بس خوفي على جهاد غطى على حزني

ياقوت خيطتلي كم قطعة والباقي فيروز اشترتلي كلهن مال بيت وقصيرات وتراكات لأن بكل الاحوال من يجيني احد اني البس صاية او عباية خليجية
احاول اشتت فكري اتذكر وافكر بسوالف مو وكتها وماتستحق تفكير  بس احاول وافشل ماجاي ترهم وياي

الحد جيته الباب اندفع بقوة بالبداية عبالي هو من وره البردة شفته مؤمن فتح الباب دافعه وخر عنه وسلم عليه واترخص