حين تحلق الفراشات

69

يسعد مسائكم ❤️

....

فيروز..

شعور الفرحة الي حسيته واني اجهز ماس مااگدر اوصفه ولايحتاج وصفه انعكس على نفسيتي وكان ظاهر وواضح للكل
ماس ربت ويانا وبينا مو بس بنت اخت اولاد ياقوت قطعة من رواحنا
بصغرهم وكبرهم وكل ميكبرون نكون اقرب
بكل خطوةاني وياها

وگلبي مرتاح لأن اعرف هي وين رايحة حسين خوش ولد وحيل اقدره واهله عائلة محترمة والاهم هي تحبه وهو هم واضح حبه الها من سؤاله واهتمامه وهذا المهم

مدام اكو حب واكو عطاء مستمر متبادل مهما اتعرضت حياة الزوجين العقبات اذا موجود الحب بالشرطين المذكورات كل هالعقبات يعبروها بسهولة

كملنا تجهيز قبل اسبوع اني وياها وامها.

حسين البيت اخرهم مالكه بيت بشارع اهله ومؤمن لكاله يمنه مو قريب عليهم بس هم مو بعيد كلنا نفس المنطقة

فواطم گالت احنا ماعدنا حنة وهيج امور ولدنا ميسووها تجهيز عروس وبس ويجي ياخذها بفستان ابيض بسيط اما يسافرون المكان يحبوه زيلرة او سفرة سياحية او البيتهم فترة كافية يختلون بيها يلا نشوفهم

يعني مااعرف بهذه الامور اني انتِ ساعديني بيها حتى اعرف احتياجات ماس وحسين هم قرر حاله حال اخواني ميسوي

اني هم بلغت ماس وهي تعرف قبلي بقراره هم

بعد يومين من وقت الكلام الي دار بينا اجت كالت جماعته گالبين الدنيا گايليه نسويلك لو نعرف تنيمنا بالشارع مرحبا وقرر يسويها بعد يومين ومحتار بمكان يباتون بيه اغلبهم من محافظات من بغداد المدينة والبصرة وعمارة واقربهم ديوانية والباقي يرادلهم مبيت

ضحكت اني ع الشباب شگد ذابين ارواحهم يكلوله لو ماتفتحلنا الباب نهوس ونمل ونرجع المهم نسويها
هو مستثقلها الظاهر لأن ماعدهم هيج شي ومتخوف من بعضهم يتمادون بالأحتفال وخايف يصير رمي وهذا كله يستحرمون منه وخاص والده مانع هالأمور كلها

بقو يومين هم يتشاورون بهالموضوع عبالك مسوين فد شي مو حنة.
احنا عدنا حتى الملتزم عادي بعرسه اغاني وافراح وهو يوم وعابر احسهم شايلين هم همَ مايدرون ماس محضرة معزوفات الحنتها

من احجيلها عنهم وعن مشاورات الاخت واخوها والموضوع الي مفاتحه وي ابوه اصلاً احترام اله
تكلي لتخليني احس بتأنيب الضمير بعد مااحتفل احجيلي هاي التفاصيل مو هسه

قبل الحنة بيوم مؤمن كال انه حليت الموضوع اجهز بيتي الثاني الهم والحنة يسووها بالساحة المقابيل بيته وبيتنا حتى لايحرج اهله ولا ينحرج جماعته مصرين وبالعناد تحدي مسوينها لأن ابن شيخ ومصادقهم ويعرفوه مختلف عن اهله متعمدين يسووها حنة مو عادية