حين تحلق الفراشات

51

يسعد صباحكم❤️

......

ياقوت...

جنه كاعدين منتظرين عمتي على نار
اخاف يطونها ويروح يسوي مشكلة هو حتى مؤيد حيل مقهور منهم يكول الي سووه عيب هو وين جان يتونس بسفره مثلاً وماقبلو يبتعد ويترك بتهم حرب ومخلي روحه بجف ايده شنو معنى تصرفهم
بس طبعاً مجان يحجي يم مرتضى هالكلام لأن هو الوحده حيل متضايق من تصرفهم يكول خاص اهلها اني اقدرهم واحترمهم المفروض هم بنفسهم يجيبوها اذا راحت بغيابي عادي بس من اجيت ليش تتركني واني جنت ملهوف على شوفتهم وماصدكت ينكتبلي عمر جديد اشوفهم

حاولنا نهديه بس ونخلي احتمالات انو يمكن مجبوره او القرار مو يمها
ومن هالكلام
من راحت عمتي ظلينه بقلق بيبي لازمه مسبحتها وتسبح وتدعي منريد مشاكل وهو عاقد النية ماقبل يبقى هنا واصر يكمل المشوار الجهادي

تأخرت عمتي يمهم هي وحسين راحو حسين ينتظرها بره وهي تجي هم قريبين علينا كلش مو بعيدين بس مااعرف السبب الدنيا انكلبت كلها اجتنا وتتحمد بالسلامة اله ومحد منهم اجه ابد

كمت اني اضيع وقت نتساعد اني ورنا وهو كاعد ع كرسي وبيده فونه يتصفح وكان يدخن

.. مرتضى اسويلك كليجه هناك من تجوعون تاكلها لو متشتهون

.. ههههه يا مانشتهي هو لو حجار نكرطه من الجوع دمار والله بس خاف انتي تعبانه ورنا هم هاليومين تعبت ماقصرت اريدجن سالمات اني اشتري وياي اشياء تسد الجوعه كد يومين وبعدها اتعود حالي حال الناس

.. لا زينه الحمدلله هسه ليظل بالك اسويها

رنا كالت بس اكمل البيدي نكعد نسويها سوه يدلل مرتضى يخسه الجوع والله شكم اخو عدنا

.. خوات واغلى والله انه اتذكر اول زواجكم انتو الاثنين جنت امون عليجن من ادرس واداوم بالمدرسه اكثر من خواتي جنت بس طلايب وياهن ويعاندني بس انتن الاثنين ع طول باليجن بالكراوي التعبانه كوي وجبة اكل متأخره ابد مارديتني يوم

ضحكت اني اتذكرت مشاكله وياهن

.. هو انت اخونا اني من صدك انت ومؤيد اعتبركم اخوه بس انت الاخ الصغير المدلل يعني تختلف علاقتنا

.. هههههه تذكرين مره ورطتج وي المرحوم اخذت حزامه الجديد وطلعت لان حزامي دومني مضيعه
وتالي طلع منسقه وي ملابسه وعنده طلعه وي جماعته الضباط ومطعم وخبصه ومن صار عصبي خفتي يحاسبني كلتيله اني شلته وضيعته

.. اتذكر هاي وحده من دكاتك زين اذا كتله ضيعته كتله اني ماعجبني وذبيته وسوده عليه جان اول مره يصيح عليه وظليت ابجي ورغم كلشي مافتنت عليك

.. هههههه هو هذا عذر تعتذرين بي شني ماعجبني وذبيته

.. شمعرفني جنت صغيره وابد مشايفته عصبي وعود ادري بي ميحاجيني حجيت بدون تفكير