حين تحلق الفراشات

17

السلام عليكم حبايب

باركولي طلعت نتيجة التحليل سلبي خاليه من الفايروس الحمدلله اني وعائلتي
طبعا حللت لأن اكو اقارب الي صاير عدهم واحنه عدنه افلاونزه ثكيله مثل متدرون وعدنه ربوو لذلك كنت قلقله ع الجهال الحمدلله عدت واليوم فرحت بسلامتهم

بنات ديرو بالكم احتاطوو الي يكلكم كذبه هو كاذب اعرف من اقاربي محجورين وبيهم الي مناعته زينه ومقاوم وبيهم الي حالته تعبان ادعوو للمرضى ربي يشافي الجميع ويسلمكم

.............

تلاكينه وطحت وتبدن سنيني
يعابيك الله كونك ما ملاكيني

   ...........

ياقوت..
من ايام عملية فيروز واني بعالم ثاني كل عقلي يمها ويم ابويه الي اتعذب ومحد حاس بي اشوفه يذبل والشيب مله راسه قرر يستقر هنا على مايكمل بيتنه وكلف مؤيد يشوفلنه بيت نأجره
مااهتميت الكلشي كل همي اختي عروس فرحانه وزوجها يحبها منين اجتها هالمصيبه وهو وحيد وقاهرني هم بعد اسبوعين من عملية فيروز لكه بيت مؤيد بنفس الشارع انتقلو بي بيبي وبابا وزمرد واني هم اروح بس وقت النوم غراضي ابيت عيالي ويومي مخلصته بينهم وبين فيروز
اروحلها يوميه جهالي اخليهم  يم عمامهم ورنا ابد ممقصره وياهم مرتضى  وزواجه مشفت منه شي ولا لحكت اتعامل وي مرته واعرف طبيعتها بس هو مبين زين مرتاح..
ارجع للبيت ميته تعب ذكرياتي تاخذني الوجع روحي للغايب عن عيني وحاضر بكلبي وزيدتها الم اختي وقهرها
صرت اشكيله خوفي وقهري كل مشكله تواجهني ترجعني اله اكثر
تقربه الي وهو البعيد
زمرد هي وبابا ابد ميلتقون رجعلها فونها وحذرها تتواصل وياه بس هي تتواصل اعرف بيها ويمكن حتى بابا يعرف بس ماادري غايته شنوو
كل فكري يم فيروز 
بعد مستقرت حالتها وفرحنه للزرع طلع نظيف خفنه يوصل للانسجه لو يتفاقم الحمدلله على هذي وعدت
الي اذاني بعد مرتاحينه ع صحتها نفسيتها ادمرت  وخاص بعد ميجي مؤمن اجازتين وهي مبتعده عنه رغم هذا. متركها وضايج عليها
وبدا يضوج من وضعه بيوم دزت عليه امه ورحتلها
طلبت مني انصح فيروز واحتويها ظلت تبجي تكول ابني اتعذب وهي ابتعادها يعذبه اكثر ع اساس اجازته هاليومين وهسه خابرني يكلي ماانزل
اني خايفه عليه وعليها بعدهم بداية علاقتهم
والمصايب اجتهم اني ماعندي بس هالولد عمر منتظره الله يريحه ويعيش سعيد تالي اول اشهر عرسه خلصها اطباء وفوكها مرته نافرته
اني احس بيها وعاذرتها بس خل تحس بي لا يتمرض ترى من ينقهر زايد وماكو شي يتنفس بي عن قهره يتمرض ابني واعرفه

وعدتها احجي وياها
استأذنت منها
فيروز بغرفتها نايمه دكيت بابها خفيف
طلعت عيونها حمر وارمه مبينه جانت تبجي

.. هلا ياقوت حبيبتي من شوكت انتي هنا

.. هسه اجيت شبيج هيج خو مو يوجعج شي