حين تحلق الفراشات

32

يسعد صباحكم ❤️

.....

زمرد..

بأيدي الرضاعه مجهزتها لحماده وضايجه عليه مجبور ياخذها جنت مصره اكمل وياه رضاعه طبيعيه لان متعلق بيه واني هم حابه هالشعور بس عمتي اصرت وشدت وياي وجبرتني افطمه لان تعتقد انو حليبي يغيره بالحمل ضجت رغم بالبدايه رافضه فكرة الرضاعه الطبيعيه وبعد الحاح جهاد وتدخله انو لازم ارضعه ولو اشهر اولى الصحته وبعدها احوله اقتنعت بس بعدين صرت اني احب هالشعور احلى احساس بيني وبينه خاص من يرضع ويعلك رجله يلعب بيها وعيونه عليه يبتسم احس كل تعبي يروح..
بعد حملي اول مراجعتي سألت الطبيبه وكالت مابي اي تأثير ع الطفل بس انتي يحتاجلج فيتامينات اكثر وغذاء اذا يعجبج تكملين مشوارج وياه كملي ماكو اشكال
وفعلا اهتميت بصحتي وعلاجي الحد مااجت عمتي زياره صار يومين انجبرت اترك الرضاعه لان هي تكول اني مجربه هالشي واسمعي الكلام

وجهاد قرر حرصا عليه انطي حليب صناعي وجابله الحليب بساعته وهسه بصعوبه ولمن مات جوع يلله اخذها
خليته نام يمها وكمت الشغلي ابد مو وكت فطام ومنا
اني واكفه استعداد ومخبوصه بس الي مريحني جهاد فرحان بجيتها بحيث فرحت الفرحته وبيتنه صار بي جو عائلي ولمه بوجودها خاص من تجيها اميره ويحجون ع اقاربهم هناك

بس المشكله من اجت الهسه احس عيونها تراقب كل خطوه مني
صرت كل همي احاول ع طبيعتي وظليت متقيده بنظراتها
اني بسلامة اليوتيوب صرت ماهره بالطبخ وأي مشكله اواجهه الكه الحل بي
يعني مسيطره من هالناحيه وكلشي تمام ترتيب البيت تقسيم الوقت رغم وحامي وتعبي مااريد اقصر بشي بوجودها وبدونه جهاد مثل طبعه هو يتصرف ع طبيعته مثل ممتعودين رغم نبهته انو بوجود امه يترك امور المساعده اعرف الي بعمرها ميحبن هيج شي وعدهن اهانه للرجال انو يساعد زوجته بس هو مهتم ولا سمع مني وهالشي مكدرت تسكت عليه اليوم من لمينه السفره وشال الصينيه البيها صحون
ظلت تحجي

.. انت تعبان وفوك تعبك تشتغل بالبيت شبيها حرمتك وشناقصها وهي لو اصيله مجان قبلتلك

كتلها عمه والله مكايلتله اني ولا اريد هذا طبعه هو
مو اني رايده لو عليه مااخلي الشغل يكمل قابل معضله

.. عيب تراددين بيني وبينو الكلام

اشرلي اسكت وكلها

.. يمه تعرفين اني هذا طبعي ومتعلم من زمان وهي حامل وعدها رضيع تتعب شكو بيها من اساعدها ليش تعصبين قابل يروح مني شي

ظلت تحجي وماعاجبها
كالت كله ع هالحلاه التلزيك لو مو صناعي شتسوي

هزت ايدها باستهزاء واني مثل الثوله
صفنت شنو الصناعي اتذكرت سؤالها عن شعري ويمكن حته من تشوف عيوني ملونه كل ظنها عدسات
خليت الموضوع بينهم ورحت للمطبخ كملت شغلي هي عصبيه وتحجي مو بس عليه هي جانت تنتقده ع كومه مواضيع مااعرف بيهن اصلا يعني ولا حبيت اعرف