حين تحلق الفراشات

33

يسعد صباحكم
البارت ميتعدل مليان مليان
بس الوات مجاي يحفظ تعديل
كاتبته اليوم بتك عين ميتحمل اتركون الموضوع وتعلقون بالسحكه عوفوها اليوم مشاعري مبعثره من وراه 😥

.......

هي تهون بس شلون لو هانت
أظن ماتلگه وادم مثل ما چانت.

........

جهاد..

بعد محبيت واترددت كثير بحبي حاولت ابتعد واترك البنيه بحالها اني انسان موجوع عندي ماضي مسببلي متاعب ومعقدني زائد الفتره القاومت بيها والمناظر الشفتها من قتل وتفجير وهوايه امور صارت.. خلت عندي طابع اللا مبالاة
بتغيير نفسي يعني عشت فتره سوداويه..

قبل حبها مجنت مااهتم للدنيا والبيها رافض فكرة الزواج رافض فكرة ارتبط واسلم حالي الانسانه اتعبني واتعبها
كل هذا حاولت اركز عليه من حسيت نفسي بديت اتعلق بيها
يوميه قبل النوم اعيد هالامور ابالي واخاطب روحي

جهاد ياحب وين اكو حب هسه وين اكو انسان يوفي
غصب عني اراقبها ولايوم شفت عليها شي ولا ربع ملاحظة
خلاني اعطف عليها وابعد نفسي عنها ورجعت الطريقها وغصب عني اراقبها لكيت روحي هايم بحبها الحد ماشفت ماكو مفر صارحتها لان حاس بحبها الي ومن خلال المواقف والنظرات اعرفها معجبه بيه ع الاقل
تمت الخطوبه وبعد ماصارت بذمتي اتعرقلت امورنه وصار رفض من اهلي واهلها اتمسكت بيها اكثر لان وياها حسيت روحي عايش حسيت اكو هدف عندي بسببها فكرت اكون عائله واصير اب واحن للجو العائلي المفتقده من سنين صرت اطمح بالاستقرار
عدينه المصاعب وكان تحدي الي والها ونجحنا بي رغم هالتحدي خسرنه هواي هي خسرت عطف والدها والا المحبه اكيد موجوده يبقى اب ويحبها ويحن الها اني ماالوموو يمكن رادلها الاحسن رغم اكو اشكالات بس كأب من حقوو مااشكل عليه ولا لحظة هذي قناعتي صح ضجت من كم موقف بس لوم ابد ماالوم
خسارتي اني خسرت الخيط الرابط بيني وبين الاقرباء وحتى اهلي ولو كانو يخفون هالشي لكن اني اعرفهم
الخيط الرابط الكان رابط بينه هو امل ان ارجع الهم واتزوج بينهم ومن عدهم وانسى الماضي الي ماينسي ولو ينشرى النسيان بفلوس اشتريه لكن النسيان نعمه اني فاقدها

اهلي ميقتنعون انو الاحساس الي بداخلي فرض مفروض بيه مو شعور مني على المزاج
بعد الزواج اكوو من اقتنع او وهمني انو راضي واكو من كشف عن انيابوو وهاجم

الي هاجم مااهتميت الامروو وحاولت انهي الموضوع بدون ماياخذ مدى اوسع وسدينه الموضوع بدافع سرقه وهو ابد ماجان هيج اكو سرقه صح بس ماكانت الخطه لهنا وتوكف لا كانت نيتهم يووكعون بيني وبين اكثر واحد من اخواني فاهمني ومتحملني وقابل بسيئاتي قبل حسناتي ومقتنع بيه مثل مااني
يمه مااتقيد ولا اجامل ولا احسب حساب الزعلوو هو فاهمني اكثر من نفسي ومتحمل كلشي مني
عدوي يعرف انو اني ماعندي ثقه باي انسان يملك رجلين ع الارض لأن الي شايفو بحياتي مو شويه ابتديتها بخيانة عمتي بكشفي ومعرفتي انو زوجها وره الخطه وصدمتي بهيج رجال يعرض حرمتوو للخطأ وينسى هي عرضوو
بثقتي بوالدي وكلامي وياه وتوسلي بي ينقذها لانها ضحيه رغم وعدني ماسواها
بكعده وي زوجها كذبني واتهمني اني اداري عنها واغطي اغلاطها
شكد اتوسلت انقذها شكد حلفتلي شكد شرحتلي مواقف صايره بينه قبل وبالغاز هي ملمحتلي اكو من يمهد الهيج طريق رادتني اتقرب منها انقذها للاسف اني غبي بوكتها
غبائي منع ان استوعب الصار
الحد الاطلاقات الناريه الي خلصتها من الحياة الي مانصفتها
الدلائل تكول قتل والتقرير يكول انتحار وهكذا انطوت صفحة
من ظلم كلما شاركنا بي برضانا او بدونه
كل هذا اله تأثير عليه
وهالامور خلتني مااثق بالناس ولا بنفسي حتى بس شخص واحد من اهلي اعفو متقبلي مثل مااني سندي بالحياة اخويه شجاع رغم كل اخوتي عدهم حنيه ويحبوني بس مو مثل شجاع يتعاملون وياي هو مختلف عن الكل هو مصدر قوتي كانت خطتهم يضعفوني بعد ميبعدوه عني ومستحيل ابعد اذا مو تنكسر ثقتي بي وبزوجتوو ومن خلالها يبدي زعلنه ونفترق بس اثنينه ماسمحنه بهالشي