حين تحلق الفراشات

45

يسعد أوقاتكم حبايبي❤️

...
عِندما وَصفَ ضِحكتها قال :
الأمر أشبه بِمجموعةِ أطفال صِغار يَركضون نَحوي و يدايَ لا تتسعان لِ ضَمّهم جَميعاً

..

فيروز..

بعد اتصال مؤمن بشويه اجه علي جايب المسواك  بقى واكف بره قريب للباب كلي مؤمن وصاني اشوي سمج بره وهذا المسواك جبته محتاجه شي بعد

.. تسلم ابو حسين متقصر

.. اروح اذا ردتي شي خلي عمتي تتصل بيه

.. ان شاءالله

.. تحتاجين نور ادزها وياج تساعدج

..رحم الله والديك لا ماعندي شي بعد وكت الحك

.. خوش انه بوكت الغدا اجيب السمج

تشكرت منه اخذت الغراض فوتتهن جوه  خليت جود يمي بحجلته وانطيته العابه
طلعت عندي كدر دولمه مجهزته ولافته مخليته بالمجمده بين ميحل واخلي ع النار على طول من اطبخ دولمه اسوي كميه واضم منها مرات البنات يجني فجأه ع غدا لو عشا
مرات بيت علي اطلعه واسوي وياه غير شي هالمره همزين هم نقذني واختصرلي وقت
خليت دجاج ع النار واني اصلا منكعه طرشانه اطبخها ع الغدا عمتي ومؤمن يحبوها اتذكرت حسين هم يحبها ودائما من اطبخها ادزله حتى من جانت فواطم هنا..
طبختها وياهن تمن نوعين ابيض وبرياني وي الدجاج جنت اشتغل سريع حتى قبل ليجون اني مكمله شغلي ومجهزه نفسي اني وجود
نظفت الخضروات وكل شويه ايدي بالطبخ
سويت زلاطه ناعمه نوع وللسمك نوع وياه بصل وليمون
رتبت كاسات اللبن والطرشي وغطيتهم
رحت للخطار اني منظفتها بالليل بس فتحت الشبابيك يتغير الهوا وعطرتها ورجعت سديتهن وشغلت تدفئه كهربائيه الجوو كلش بارد بيومها

اتصلت عليه زمرد واني ارتب بالهول

خليت هتفون باذني والفون بصدري وهالحركه ناهيني منها مؤمن بس مااتوب يكلي مو زين عليج لو ميصير اوعده انتبه وارجع انسى جاوبتها وجود متململ يشكي ويأشرلي بأيده اشيله

حاجيتها ونصيت عليه اخذته

.. هلاو زمزم شلونج حبيبتي

..الحمدلله لج وينج انتي اراسلج ومتردين