حين تحلق الفراشات

مقتطفات

يسعدلي مساء الغوالي

مشتاقه الكم متابعيني

جبتلكم مقتطفات من القصه الجديده

وحسب الوقت والواهس ابديها وياكم

.......................

بيوم غائم يشبه غيم گلبي
الضباب يعدم الرؤيه اتمنيته يبقى هيج ومااشوف ذيج الشوارع المو رايده شوفتها رايحه مجبوره وكل حسرة من گلبي تطلع تتبعها ونه وآخ..

عيون مؤيد تراقبني بهدوء.. حاسه بيه هو يعرف احساسي شنوو بس هالمره اترجاني اروح وماافشله

عيوني تراقب جهالي  فرحانين بروحتهم مبتسمين ميعرفون بالنار البيه وسبب خوفي احس دگات گلبي بدت تزيد

ومثل كل مره أنطي امل الروحي من اباوع بتفاصيل وجه حسوني ابني احسه نسخه من ابوو واتمنى بساعتها يكبر واشوف وجهه وشخصيته بي

اتسرسحت دمعه ع خدي حتى الشامه الي مزينه خده نفسها بي

مسحت دموعي وحاجتني ماسه

..ماما شوكت نوصل تعبت من الطريق

.. حبيبتي اذا تحبين نامي بعد اكثر من ساعه ونص يلله نوصل

نافخت بضجر

.. افف ماما تعبت والله

حاجاها عمها

.. باباتي مياسه الكل منتظريكم وفرحان بيكم ارتاحي انتي نامي حته من توصلين مو تعبانه وحتى هسه متملين جان مشيت سريع اني بس الضباب ميخليني اسوق براحتي

.. عموو هناك تونسنه مو تحبسنه بالبيت

.. شعندي غيركم وين متحبون اخذكم

دار عليه وملامح وجهه تستفسر بتعب

.. بعدج ياقوت مرت سنين ونفس الوجع بعده انطي النفسج مجال كلنه اتأذينه وكلنه تعبنه بس حياتنا مشت وانتي بقيتي بنفس المحطه لشوكت يابت خالي

انترست عيوني دموع

.. للموت والوجع مايبقى نفسه يزيد حياتي مشت واتماشه وياها بس هو وياي وبروحي اني خوفي هسه تعرفه منين وماادري شلون اوصل وتعبر رجلي عتبت ذاك الباب واني اتذكر كلشي صار
بجيت واني اتذكر ذاك اليوم والمنضر الصار كبالي بجيت بقوة حسيته وكف السياره وادين جهالي تحاول تبعد اديني عن وجهي يبوسون بيه

اجاني صوته

.. كافي خويه خرعتي الجهال تعرفين معزتج عندي بمعزة خواتي واكثر وكلنه هيج نشوفج نعزج لان انتي اختنه بنت خالنه الماشفنه منها بس الطيب رغم صغر سنها بس جنتي معدله وهسه اكثر الي يزيد معزتج عزيزة الغالي وحبيبته اني من احجي هيج الخاطرج اريدج تتعايشين وي وضعج

.. الله يخليكم ويحفظكم واني هم نفس الشي اعزكم المعزته متعايشه وي كلشي بس هو وياي بكل خطوه