حين تحلق الفراشات

57

يسعد صباحكم

حبايب عذروني ع التأخير اجت دروس الكترونية متأخره للجهال شغلتني وياهم وبعدين يلا كملت البارت

......

زمرد..

رغم فرحتي بقرار جهاد بالسفر بس متخوفه ومااحس بالأمان الا نطلع ونودع البلد
وبنفس الوقت مااريد افكر بوداع ابويه وخواتي خاف اتراجع واهون
واني اريد نسافر اليوم قبل باجر
السبب مهم اعرف جهاد ميقاوم يبتعد وهو هنا قريب الهم
راح يبقى يحن الأهله والمدينته خاص بالظروف الي اتمر بيها
وي كل خبر يخص مدنهم احسه يتگطع من الداخل وشوفه وده يروح يرجع يقاتل بس يمكن احنا الي مانعيه  اني والأطفال

بحيث بيوم الي يعرضون معارك بمناطقهم  يدخن بشراهه وماله اي نفس للأكل ومن يسمع بشهيد وصل من منطقتنا وكانو يجيبون بشكل يومي شهداء  يظل يصفگ بأيده من القهر

يگلي والله حرام بينا ماي الديره الي شربناه
يوولي اني وغيري الي مسافر والي گاعد وي عائلتو
والي ماشايف وماكل من خيرها ينطيها دموو

اگله انت ماقصرت قاتلت المحتل وقاتلت القاعدة وانطيت خطط واهداف عن مجاميع من داعش واتصوبت قبل فتره ودفعت ثمن هالتضحيات بتهم وتنكيل وحاربوك  بدل ميشكروك
وعندك عائلة اني واطفالي ننذل وراك فكر بينا وخليك على قرارك فدوه اروحلك

يجاوبني بقهر

.. هو اني باقي ع القرار والسبب انتِ والجهال مايهمني الأتهامات ولاالتخوين  بس الوم بروحي واعاتب لو حتى العتب حرام

اشغل نفسي عنه بأي شي لمن اشوفه  شويه يرتاح ويرجع طبيعي

بيوم استشهاد اخو فواطم حيل اتأذه لأن شافه بوقت استقبلونا هناك وشافه بوقت جيته وعبوره هنا بعد غيبته الأخيرة واصابته وشافه شلون استقبل النازحين بحسينياتهم الي بكربلاء

كلش ضاج عليه  اختنك من اجه من الدفنه واني هم
روحي صارت يم فواطم شگد جنت اكرهه لأنها ضرة الأختي واضوج من فيروز ادافع الها
بس من عاشرتها وشفت طيبها ومواقفها حبيتها حيل واعتبرتها اخت الي سكنت ابيتها فتره ولايوم ثگلت وجهه  بالعكس تدعيلي وتهون عليه هي وامها
ومن رجع جهاد ونزلنا جيران الهم يم بيت مؤمن ولا فد يوم هي ابيتها مادزتلي
من اي شي اطبخه

واني هم اتعودت على قربها وعلى اتصالاتها تسأل عن صحتي وخاف احتاج شي خاص من بعدت فيروز وشالت من بيتها تگلي اني مكانها بس گولي شنو تحتاجين بالخدمة

كل هذه المواقف صارت بعيني بوقت استشهاد اخوها ماتركتها اني ولا خواتي

بيوم السابع هم مسوين ثواب وختمة قراءة قرآن للنساء والرجال
جهاد عزموه اني رجعت من وكت جهالي محد يمهم بس حسن ويدوخوه وحده ميسيطر عليهم

من اجه هو بعد المغرب حيل متأذي على حسين شلون متخبل بجيته  يگول فتحلي جروحي والله يعيني ويعينوو
الأخ غالي وجمرة فراگو ماتطفى بالعكس تزيد يوم بعد يوم