حين تحلق الفراشات

56

يسعد اوقاتكم..

البارت تعويض بارتين بارت البارحه وبارت اليوم ♥️

.....

فيروز..

ظليت ارجف من سمعت خبر استشهاده
انوب شكله من استقبلنا ابد ماراح من بالي ابتسامته وشكله هيبه
و بعده شاب خله اطفاله ابنه الكبير عمره ١٣ سنة وبنته عشرة والثالث خمس سنين 
وكلام فواطم دائماً عنه من خلالها عبالك اعرفه
حتى ياقوت انخبصت وياي

مؤمن ومؤيد طلعو ما انتظروني
عمتي وياقوت گالن احنا نروح وياچ
رحنا البيت الشيخ هي اصلاً فواطم عند اهلها
خليت جود يم ماس

وطلعنا
هوسة المنطقة كلها طالعة ابابهم من بعيد شفت مؤمن بأيده تليفون يتصل شويه عنه واگفين  مؤيد وبابا وجهاد 

من فتنا جوه نسوان هم هوايه اني شفت ام فواطم ع سريرها گاعده وحالها يبچي الصخر نزلت دموعي واتوجهت الها بعد ماصاحت عمتي تعزيهم اني وياقوت عبرنا من بين النسوان
لگيت يم فواطم زمرد گاعده وزوجة اخوها المعلم الباقي مااعرفهم
وصلت يمها گعدت مقابيلها
حالتها حاله باوعتلي بنظرة مكسورة

.. راح اخوي فيروز  الصبح خابرني يگلي حملناج هم ثگيل ابيش نجازيچ خايف عليه من خدمة اهلي اخدمهم العمر كله بس كون هم بسلامه بس  انت سالم كلشي مااريد طلب مني ابريه الذمة يگلي مااتهنيتي بكلشي شايله همهم وحدچ والله احلى من العسل على گلبي بس كون هم بخير كلشي مااريد بس سلامتهم

حضنتها وبچيت

وظلت تردد

.. وبشر الصابرين الذين إذا أصابتهم مصيبة قالوا إنا لله وإنا إليه راجعون

هوايه رددتها

اني انتبهت على امها ابد ماجزعت بس تذكره وتذكر مواقفه تكول

.. هو متمني الشهادة من زمان واني متوقعة مو من هسه من اول شبابه من ايام حرب النجف  من ايام بعده عريس واتغييب  سنة كامله ماندري وين اراضيه مغيبينه بسجن بوكا بطلعته لگه عنده وليد مايدري بمريته حامل مخليها
هو روحه تريد الشهادة وهي رزق وابو مؤمل يستاهلها
بس شسوي الگلبي يمه يريدك مالي سلطة عليه ولا على عيوني التريد تكحل نظرها بشوفتك يمعدل

گمت من يمها مااتحمل عيني صارت على فضل مفرفح بيد جاهله منهم مااعرفها المن

اخذته الحضني بعده ممكمل الست اشهر مفرفح يريد امه ترضعه

اخذته الها
اباوع ايدها ترجف من مدت ايدها تاخذه بحيث ماگدرت انطيه الها اني خليته بحضنها
رادت ترضعه ماگدرت وهوسه وصياح ونسوان تحچي
حاولت وياه هو يبچي خبص الدنيا
انطتنياه