حين تحلق الفراشات

46

يسعد صباحكم حبايب❤️

البارت طويل تعويض عن بارتين

مو كله مصححته استعدوو للألغام ساعدتني ملاك بس اخر جزء اتأخرت عليها ماراجعته وياي😅
.......

اتفقنة نموت لكن نبقى عدلين
نضحك.. بس اكو بخاطرنة مأتم
الهوة يلاگينة لكن مامبينين
مختنگين بس انگول نشتم

.....

ياقوت..

كل هالفتره واني بصراع الدوام اليومي هلكني طريق طويل من الناصريه للكوت اطلع من السته ارجع بالاربعه واكثر مااستفاد من يومي جهالي معتمدين عليه ارجع ادرسهم وادرس اني بعدهم واهتم بامور بابا ملابسه اكله علاجه اوقات ضعفت بيها ردت اترك كلشي بس خواتي و مؤيد ورنا ومرتضى كلهم شجعوني استمر وادخل اقسام داخليه وفعلا دخلت
اول اسبوع وحشه مو طبيعيه فراغ وكل شويه تعصف بيه ذكرى من ذكرياتي قبل من جنت مرتاحه بوجوده ومو هامني كلشي بالي مرتاح وخالي وكل همي شلون اعجبه وارضي ويشوفني اخذ كلام واتعلم منه كل همي اشوفه شلون يفرح بيه وشلون انافس جهالي ع دلاله جنت اغار حتى منهم
شكد مشتاقتله ياربي اتمنى ادفع عمري ثمن النظره من نظرات عيونه لو تنعاد عليه مره
وارجع اكول كافي ضعف كل ماافكر بي اكثر يزاد شوقي وضعفي مااريد اضعف ورايه اطفال يرادلهم قوه وثبات حتى يكون اساس تربيتهم قوي
كمت اشغل نفسي احجي وي البنات نتعرف ع بعض اساعدهم مرات
حبوني حيل بنات غرفتي وباقي الغرف مرات يجوني اول مره يسألون عن وضعي انصدمن اني بيه ارمله واطفالي كبار كالن ميجي ابالنه ابد نعرف انتي اكبر بس كل ظنه فرق قليل ميبيين عليج هالكد جبيره بيومها ضحكت كتلهم راح تخلوني اصدك نفسي اني اصغر من ماس

استمريت فتره وياهن اني من اجي الاعلي اسوي اكثر من اكله واجمدهن اخذهن وياي وكل مااروح الكي عمتي سوده عليه مسويتلي كبب وبورك وخبز رنا تخبزلي من غير الاكلات الي تحضرهن زمرد وفيروز كيك وكليجه وهالامور يعني برجعتي اخذ اكل كلش هواي بحيث انطي للغرف الباقيه مرات
فتره قليله صادق الكل بيها بس صداقه طبيعيه كد سلام ومساعده بيناتنه ممتعمقه
الاستاذات حيل حبوني واغلب الوقت اليبقن خفر بالقسم يجن بالغرفه الاني بيها نكعد ناكل ونضحك بعد منكمل قرايه
هالاجواء طلعتني من اول احساس حسيته وخلت عندي حافز اكمل شغلتني عن حزني واشتياقي وخوفي ع اطفالي الي كول شويه اتصل برنا ع حسن اخذ اخباره كلها منه وارجع اوصي مؤيد ومرتضى وكلهم ماكله كلبهم ع حسن لأن هو يختلف عن ماس حساس حيل ومن النوع الي يضم بكلبه اكثر
وبس الي يحجي والعمه مؤيد بس مو مثلي اي شي يضايقه يكوله
دائما يريحوني عليه وفيروز مهتمه بماس هي ومؤمن ماس مينخاف عليها خاص وياهم اثنينهم اعرفهم ميقصرون درجاتها كلش زينه ومعلماتها يشيدون بيها
هذا الشي خلاني استمر ومااتراجع وجنت اجيهم مرات خميس وجمعه السبت مؤيد يوصلني لو مرتضى ومؤمن ملكيت خط من منطقتنه للمعهد ولا يقبلون اروح للكراج واخذ اجره وحدي هم متبرعين واني مرتاحه اكثر