حين تحلق الفراشات

28

يسعد صباحكم حبايبي

شكرا الكل البمات الي سألو عن وضع ابني الحمدلله بفضل دعائكم هو بخير اليوم وصحته اتحسنت
وشكرا للي قدرو وضعي وغيبتي
واسفه من الي ضاق صبرهم وشعرو بالملل

البارت قريب لل ٤ الاف كلمة هذا الي كدرتله واحاول اعوضكم من باجر
.....

بهيده مو كلمن يلوج من الوجع مضروب جيله

....

زمرد...

بعد مافهمت منه وفهمته موقفي ورغم الكلته صح وهو متأكد منه بس بقى ضايج وعازل نفسه يقرأ
الحد الليل بيومها ثكلت عليه النشله وعظامي تكسرت حرارتي ارتفعت حيل وبعد ماحاجيت ياقوت والفيروز وفهمتهن الموضوع ظلن يسألن عن حالي كتلهن مريضه وحرارتي عاليه ظلن يحجن عليه ديري بالج وميصير وانتي حامل كلش مو زينه السخونه
لتركين نفسج هيج
ياقوت كالت اني اشوف مرتضى واحجي وياه
هو جان قريب يمي ويسمع مكدرت اخذ راحتي واكلها وصليله عني جنت متمنيه اني انطيها وصيه تحجيها اله
خلصتها اي وميخالف من نظراته حسيته حس عليه مرتبكه
ردت اغير الموضوع كتلها ياقوت شاسوي وتنزل الحراره بجسمي مو تكولين الحامل مو زين عليها

.. اي مو زين روحي الطبيبتج وكل متحسين حرارتج ارتفعت غسلي بمي دافي وكمادات سوي ابد لتخلين نفسج

.. ان شاءالله

كلتها ونهيت الاتصال لزمت راسي مصدع حيل كمت الغرفتي تمددت جسمي برد حيل.. حسيت جسمي يرجف
عيوني صارت تدمع من الحراره البيهم
شكد حاولت اعين نفسي واكوم اغسل حتى شويه اتحسن مكدرت
لفلفت نفسي بلكي ادفه شويه بين الصاحيه ونايمه فات هو
حسيت بخطواته قريبه الي جر البطانيه مني

.. زمرد.. ذبي غطاج يابه تاشوف

بظهر كفه اتحسس جبيني ذب الغطا كله

.. متحجين ابويه انتِ من العصر ردت اخذج للطبيبه شكد تحبين تعاندين سويتيني اتبله عليج وانتي كلشي مابيج واني غلطان

بصوت تعبان وناعس جاوبته

.. ماادري تزيد عليه مجنت هيج مااكدر حتى اتحرك تعبانه حيل بس الابر تصحيني هسه اني اعرف حالتي

.. يولي واني من كيفي انطيج ابر انتي حامل ميصير انطيج علاج بدون استشارة طبيبتج
بس شويه شدي حيلج خليني اساعدج

نهضت بصعوبه عدلت كعدتي كومني للحمام

.. غسلي ترتاحين

جاوبته متململه

.. بردانه حيل والله المفروض هسه بطانيتين ادفيني بيهن
مااكدر اوكف اصلا

.. ول ياب اكفي هين اكاسر المي ويدفه الحمام وادخلي .. اعرف صعب عليج بهالوضع بس متفيدج الا هالطريقه انتي لتهتمين اني وياج لتخافين مراح اعوفج اخاف عليج توكعين