حين تحلق الفراشات

4

من نحبهم بشدة يختارهم الغياب بدقة

ويليام شكسبير

........... 
ياقوت..

مرت فتره وطاب حسن وكسوره طابت والداعمه عشيرته مشت ع مؤيد وعمامي هناك بمحافظتنه خلص الموضوع واني ايدي ع گلبي اخاف يطالبونه برجعه بحجة الجهال والخطوره خاص بعد محسيت مؤيد زعل عليه بس الحمدلله عدت قبل والله يهديهم هسه

الليله دورة سنته للغالي بعد مطبخت ووزعت بثوابه وقريت قرآن ودعيت وبجيت وهلك جسمي تعب وروحي اشتعلت بنار الهجر والذكريات
وكلت كافيني بعد خل ارتاح واخلي راسي ع فراشي وانام ورايه غبشه نزور

لكيت النوم هاجرني والذكريات تعصف بروحي عصف
اتذكرت كلام طبيبي النفسي قبل الي جان يعالجني كلي من تشوفين نفسج مجبوره تتذكرين اتذكري الاشياء الحلوه الصارت بينكم اتركي اليوم الي اتكرهي
اتذكري الماضي الجميل مهما ذكراه يجرح بس ارحم الج من اوجاع اليوم الي  حاصره ذاكرتج بي

غمضت عيني بشده وهزيت راسي طارده ذاك اليوم من بالي رغم جمال بدايته

رجعت بذاكرتي لما جنت صغيره وتوني بديت اكبر وهو جان يجينه ع طول بوقتها اهله ايسوو من زواجه وخطبو المؤيد الي جان اصغر منه

جان صديق بابا حيل علاقتهم اقوى من خال وابن اخت
ع طول يجينه وابد ممضايقنه بالعكس نحبه حيل من صغرنه لأن ع طول يمنه ويهتم بينه كلنه بس من صرت افهم كمت اخجل من نظراته حيل وهو من شاف خجلي مره يتحرش عمده يصيحني كدام بابا يطلب مني نفاضه او مي ويربكني بنظراته  ومرات ميحب يحرجني الى ان مرت سنة طلبني من بابا وبعد رفض بابا اله عدة مرات حاجاني الي وشرحلي حبه بعدة محاولات

مره منهن طلب احجي واتفاهم وياه واني ماافهم شي بذاك الوقت بس الي افهمه اني اتمنى يكون هو نصيبي صح واستحي احجي واوضحله

كعد مقابيلي وهو يمشط شواربه بأبهامه شواربه الي مزينات ثغره بترتيب
كان ناضج عقل وبنيه كان مكتمل بالنسبه الاي بنت كيف اني الي وعيت عليه

حاجاني بجد مشدد على كل كلمه ينطقها

.. ياقوته. ركزي وياي انه مااريد اضغط عليج ولا اريد اقنعج بحكم انتي بهالعمر سهلة الاقناع اني احجيلج شي
انتي بالذات غاليه عليه حيل واحبج واحب ابوج هم واعتبره اكثر من خال مااريد كل هذا يأثر عليج وع قرارج الي اريد تعرفي

انه رايدج زوجه الي انتي بدون مجامله وبدون خواطر مقتنعه بيه اكون زوج الج اشاركج حياتج اكون مسؤول عنج

حاجيته متردده

.. ابويه مو قا..

.. معليج من ابوج قابل مو قابل تركي كلشي احجيلي انتي تشوفيني انفع زوج الج اذا كلتي اي مااتركج لو انتظر سنين واذا لا كارهه الفكره انسحب بدون مااسببلج ضرر