حين تحلق الفراشات

26

يسعد مسائكم حبايب ❤️

.....

فيروز..

....

كام مؤمن يبدل وجهاد كلي خابريهم تجهز نفسها
رحت المؤمن انطي ملابسه وكتله اروح وياكم بعد مو مال ابقى هنا

.. استعجلي عيب من الولد خطيه خاف عليها مو مال نتأخر

بسرعه جهزت نفسي وطلعت وراهم بس صعدت حركوو السياره
من وصلنه بيت اهلي هو بقى بالباب ومؤمن وياه كلي بس شوفيها وخل ناخذها
بسرعه

نزلت وفتت جوه بعد مفتحولي الباب جهال ياقوت الظاهر منتظرينه جانوو

بابا جان كاعد يمها تعبان حيل وضايج عليها
فتت بسته ونصيت عليها بستها عيونها متكدر تفتحهن ذابله خصلات شعرها متناثره
لفيت شعرها بعد معدلته بايدي  وكلت الياقوت

.. مو كنالج جهزيها

.. يمعوده والله رتبتها ورجعت تتقيأ وغسلتهلها وجهه وردتها ترتاح خربطت كلشي

ظليت ارتب بيها

وكتلها تكدرين تمشين شويه

اشرتلي براسها اي

سندنانها اني وياقوت وابويه كال اتصلن اول متوصلن
وصته ياقوت ع الجهال ليطلعون

بس فتحنه الباب سانديها نزل هو فتح الباب الها ساعدها تصعد وظل يسألها مخبوص

بالطريق خلت راسها ع كتفي وياقوت لازمه كف ايدها ادلكه
هو يسوق وكل شويه يدور عليها
سأل ياقوت منين يطلع
ظل يوصفله الطريق الى ان وصلنه ابتسم

.. اووف هذي العياده نفسها

ابتسمت اني عرفته اتذكر الصار لأن بالبدايه ابتسم بعدها نافخ ضايج اكيد اتذكر المشكله الصارت بعدها
اني اصلا تذكرت الموقف ضجت

نزلناها ودخلنه لان حاجزين
وهو ومؤمن بقو بره ينتظرون
ظلت تسألها وهي تجاوب بتعب ساعدناها تصعد للسديه اخذتلها سونار كالت وضع الجنين زين
بس هي ضغطها نازل حيل بي خطوره عليها ميصير
كتبت مغذي وسألتها تاخذ مقويات وحبوب تقلصات جاوبتها اي رجعت سألتها ع علاج واحد كتبتلها جديد وطلبت نخليلها  مغذي باسرع وقت وانطتها حبوب يمنع التقيؤ وقت الحاجه

طلعنه وهي نفس التعب والدوخه
منتظرنه هو اتقرب علينه ومؤمن بقى شوبه بعيد عنه

وكف يمها عدل شعرها طالع من اطراف شالها خصلات  خفيفه طالعه و مدري شلون لمحها استحيت لان احنه وياها وومرتبيها زين
هي مالها خلك شي سألها كالتله زينه

اني كتله

.. وضع الجنين زين بس هي ضغطها نازل تكول باسرع وقت خلولها مغذي.

.. بس مغذي

.. اي

راح اخذ علاجها من الصيدليه هو ومؤمن واحنه صعدنه بالسياره قبلهم شويه واجوو
اكو مضمد قريب مسافه عن الصيدليه مؤمن كله هنا نخليلها