حين تحلق الفراشات

21

ياقووت..

قبل الظهر الضحى خليت جدري يهدر ع النار اكعد من وكت انظف واطبخ واتفرغ الهم هدرت الجداري وجاي اقري بالجهال وكوه اقنع بيهم يبقون هنا يمي يقرون اتعودو على عمامهم ويردون وي جهال مؤيد هنا يرحون وهو يقريهم
حسن يسمع الكلمه بس يبقى زعلان يعني يحسسني اني ظالمته عكس اخته صح هي ام السان تحجي وتبجي مرات بس بسرعه تنسى وبعدها تقتنع بالاريده
والاكوله يمشي عدها
اما حسن يضوجني لان ميعاند ويخليني اقنعه بس يعتزل ويظل ضايج ع طول وكلشي اسوي مو بعينه
ولان اليوم جمعه هو متأكد من عمامه اثنينهم موجودين وجاي يدرسون الجهال ويريد وياهم

اني بهذي الفتره انشغلت اكثر البيت فرغ بيبي وحدها وتعبانه ابويه هم يجي من المحل تعبان خاص بعد روحته البغداد صفى بيها اموره باع المحل واجر بيتنه هناك استقر شغله هنا وبدا يوسعه ويتعب بي هواي
المهم اني جنت مشغوله وبيت عيالي مرحتلهم بعد

وحتى صرت اشتاق الغرفتنه شكد ماجنت متخوفه من دخلتها قبل صرت اتخيله على طول بيها مرات بُعدي اشوفه اريح الي ومرات احسه مُتعب اكثر
مااعرف شلون اتصرف وي روحي الي تريده بكل صوره

اعرف هو مستحيل يرجع واعرف الحياة تمشي بس بالمقابل اكو خيط بينه وهو الخيال والشعور بوجوده مااريده ينقطع نهائيا
لذلك اعتزلت الناس كلها وكرست حياتي للخاصين الاحبهم ابويه بيبي جهالي
شكد اتصلوو عليه اروح واجو هنا ودزو علينه هوايه جنت اعتذر ابيبي بالبيت باشغالي الي زادت عليه ومسؤولياتي بعد زمرد الي ماجنت اتصور انو هالكد تترك اثر بالبيت وبنفوسنه كلنا البيت وحشه عليها

الهذا جهالي ماالومهم من يضوجون بس اريد اعودهم على نمط معيين قررت امشي بي اعتزل كلشي خاص بعد الكلام الي توجه الي من زوجة مرتضى عن زمرد وحتى عني بوقتها رديتها بادب لان اعتبرها طفله بعدهي صغيره وتحكمها عواطفها وغيرتها خاص انو اللوم مو عليها ع اللي حجالها كلام شي صاير وشي لا.. الحجي مااحب اذكره حتى بس كان يوحي الرخصنا واحنه مو رخاص ابد
اني قبلها مجروحه من موضوع مؤيد ورنا وغيرتها وزودتها عليه زوجة مرتضى هالشي خلاني اكره كلشي بي تواصل
وقررت اعتزل واعيش النفسي بس
بس الجهال شيقنعهم عمتي شنو يقنعها تجي يوميه الهم ومن تطلع تحلفني ماامنعهم عنها والصراحه هي ابد ماقبلت لا هي ولا بنات عمتي عمات الجهال لعبن لعب بشهد وماقبلن عليها وهددنها يحجن كلشي المرتضى هي اعتذرت بعدها واتوسلت منجيب سيره لان مجانت تتصور اني اراددها واحجي الي كالته كدام الكل عبالها تسمعني كلام واسكت الم الموضوع بمثل هيج يوم
قطعت افكاري كوه مااريد افكر بشي كافي عقلي تعب

طلبت من حسن ينطيني دفتره كمل واجبه لو لا

اتفاجأت مكاتب منه غير سطرين وجان يوهمني بالكتابه هو السنة صف ثالث وصار فتره بدا دوامهم واخته صف ثاني
احتاريت شلون اتصرف وياه اعصابي تلفت رغم هذا اتنفست بقوة اهدأ نفسي