حين تحلق الفراشات

61

يسعد مساكم ♥️

زمرد..

بعد ماسافرنا واستقرينا چنت حيل متخوفة من حياتي من هناك اني واربع اطفال وزوج محمل هموم من اهله و ناسه من فقده الاخوه ودمار مدينته الي يبقى يحبها ويحن الها مهما ابتعد عنها
وي هذا كله عنده ترسبات نفسية من مشاكل قديمة الها علاقة بالشرف وي ظلم وي شك وي خذلان

هذا كان كله بكفه

الكفه الثانيه بيها مواقفه شهامته اخلاصه صدقه بوعوده وحبه
ولو كان حبه وحده يكفيني اغلب هالكفة ع القبلها واصبر وياه

بعد ماوصلنا هو بدا من الصفر قرر يعادل شهادته
وقرر يفتح مشروع بسيط وي صديق اله من سنين هنا مستقر الولد كان تكريتي من اهل الشرقاط متزوج مغتربة لبنانية بالجديد وقبلها متزوج اوربية ومنفصل عنها وعنده منها ولد بينه وبينها متربي

هذا كان اول قرار القرار الثاني الي فاجأني بي قرر يراجع طبيب نفسي من اول فتره استقرينا بيها
يگول التفكير دمرني اريد اخلص من تبعات الي مريت بي
وهو طبعاً مراجع بالعراق قبل بداية شبابه لأن كان متحطم على عمته ومن كاشف ساجدة زوجة سلطان الها ايد هي واخوها ابوه ممصدگه او محاب يصدگه ومرايد يدمر بيت ابنه مكتفي ابناء بيت الهم مقابيل بيته وحرمانها سنة من دخلة بيتهم
وبعد السنة راجع كلشي طبيعي وهذا الي خله جهاد يتوعد الهم مايسكت ويفضحهم الحد ما مخير ابوه بينه وبين ساجدة وبيتها وحياة اخوه وقطع العلاقة وي خوالهم وبينه هو والأب رايد يتجنب الفضيحة دازه قريب الاخته مسكنه ابيت وحده قبل ليخلص اعدادية حتى وهذا حيل مأثر بي

اني شجعته على قراره بخصوص العلاج النفسي رغم اول فتره بصعوبة كدرنا ندبر امورنا
اشهر استقرينا بيها ومرحلة علاجة كانت ايجابية بشكل للحد الي وصفت تغييره بيها اعجازي
شي واحد هو خارج قوس التغيير عنده
الغيرة
لكن كانت بحدود اللبس اني اختاريت البس جبب وحجاب طويل وعريض وهالشي فرحه وماعارض عليه وهاي كل الي يشوفني من المغتربين يفكروني لبنانية

بعدها طلب مني ادخل دورة تعليم لغة
الجهال بره نتعامل وياهم بلغة البلد نعلمهم ويانه وبالبيت عراقي صرف وانباري بالتحديد طبعا مو متقصد بس لهجة جهاد هذه وهم متأثرين بلهجته اكثر بحيث حمودي الواو نهاية الكلام والعجل والدحج صارت جزء من كلامه خاص واحنا اختلاطنا بس وي صديق ابوه ابن منطقة الشرقاط الي كلامه مقارب اللهجة جهاد
بعدها مشروعهم بدأ يكبر واحتا جهاد بفترات اطول ومنا هو مقدم على دراسة صرنا نشوفه قليل بس بالليل
لكن بهذه الساعات الي اشوفه بيها يغرگني بحنانه
بس بديت اتضايق بسبب منغصات مثلاً احتاجه تتأجل امور الي بسبب عدم قدرته على توزيع وقته بصورة كافية وماكو هنا

مثل بالعراق يكدر يكلف شخص مثل مكان مؤمن مبتلي بينا
هنا الكل معتمد على نفسه

قرر يدخلني دورة سياقة وكال انتِ وشطارتج كل ماتتعلمين اسرع سيارتج تجيج امتن واحلى واكشخ
هالشي خلاني ادخل بتحدي وي نفسي وبفتره زينه كدرت اتعلم
الي الاغلب ميعرفوه بالعراق واني كنت منهم ان يتصورون الي يعيش بره عايش مرتاح ومترف
فعلاً عايشين براحة امان قوانين حقوق خدمات بالمقابل عمل عمل عمل الي هنا يسابق الوقت سباق ماعدهم نهار طويل ووقت فراغ مثلنا ابد وبالخصوص الي يردون يثبتون نفسهم بمشاريع مثل جهاد وغيره
الضرائب عدهم تكسر الظهر باختصار الحياة هنا اَتخلي الواحد يتعلم التدبير والكفاح غصب عنه