حين تحلق الفراشات

22

زمرد..

ظليت اباوع بالوجوه شسوي ووين احصل جهاد شراح اتصرف نقذتني سحر وهي تحاجي خالتي

.. لا عمه شلون يصير جايتنه خطار نشغلها هنه يومين البارحه تعبانه من الطريق واليوم نشوفها وتشوفنه
اشرتلي بسرعه تعاي يمنه بالمطبخ

ردت عليها الحجيه

.. مو خطار هو بيتها بيت جهاد وهي حرمتوو لاكل شوي وكلتن خطار

.. ميخالف عمه مو خطار وهسه اشغلها وياي تاتاخذ راحتها ادللي

طلعت وياها بداخلي اترحم الاهلها

رحت للمطبخ وكفت يم الباب الي يطل ع البره البنات يشتغلن الي تخبز والي تشنك بانين تنور حجر مااعرف طين بس مرتب مكانه وحلوو يخبزن ويسولفن وعيونهن عليه ابتسمت الهن باقي الجناين مخلصات شغلهن ببيوتهن يجن كد الاكل ويستلمن التنظف وراه
سحر بدت شغلها اباوع الها سريعه حيل تشتغل وتصيح ع الجاهل تسكته
اتصل بيها شجاع وجاوبته وهي تثرم
اباوع شلون هيج مسيطره لازم الفون بكتفها وتثرم
لحم تريد تسوي العشا

كالتله كله زينه وهايه يمي يمكن جهازها مو يمها
سألتها عليه اشرت اي

ظلت تحجي وي رجلها واني اريد اتذكر تليفوني وين خليته هو جان يمي
بغرفة الحجيه
دورت عليه ماكو
رجعت ادور اكثر مالكيته
صعدت للغرفه مو بيها اني متأكده نزلته ويايه
انوبه ممخليه رمز وهو كومه حذرني اما تمسحين الصور البي لو تخلين رمز للدخول
انشغل بالي حيل

حاجتني سحر
كالت جهاد يسأل عليج يكول شخبارها وكتلوو زينه كال خل تتصل بيه

الولد عكلوو يمج وصاني بيج قبل لايطلع

ضحكت كالت يعرف اموو

كلي ترى هي مو صلح وي الطباخ لاتخليها توصلوو
ضحكت وانحرجت بنفس الوكت

كتلها الصراحه اني على كدي وجاي اتعلم شويه شويه

.. عادي حبيبتي كلنا مثلج واتعلمنه
خابرتي جهاد

.. تليفوني مجاي الكي مااعرف وين خليته

.. وين يعني شوفي ترى هو يتخبل من هالسالفه تليفون يضيع خو مابي صور الج

.. اي بي ومحذرني هوايه هم بس ماادري معقوله يضيع هنا محد اكوو غريب منو ياخذه قابل

.. ماايروح بس يسويها الحظ ويكلب ليلتنه جحيم جهاد..

مره صار موقف يشابه الهذا لاتشوفين الصار تلث ايام بيتنه جحيم وهو بس رقم لابي صور ولا شي تليفون عادي بس بوكتها جانت القاعده تتحرك وخاف يهددون بي والرقم باسم الولد ويبتلون هم وي الدوله هو ضاع من حرمة سلطان رايحه لهلها شوفنه الويل كلنه لمن لكينالو العقد وحرك الخط يالله جرينه نفس