ABS #3: Leopold Scott

Chapter 25: Punished

Warning: Read at your own risk

"Sixteen!"

Nagtitindigan ang mga balahibo ko. Gumagapang ang kilabot ko sa katawan mula sa braso, paakyat sa leeg at batok hanggang anit.

Nakatitig lang ako kay Kyline, umiiyak sa harapan ko, habang tinututukan ni Elton ng baril sa noo.

Walang ibang isinisigaw ang utak ko kundi, "Bakit nandito ka? Bakit ka napunta sa lugar na 'to!"

"Ang ganda mo, a. Kilala ba kita?" nakangising tanong ni Elton.

Umiling si Kyline. "No . . ."

"Nagpa-pageant ka?"

"No . . ."

Sinabunutan ni Elton si Kyline at saka ako tinutukan ng baril para ako naman ang kausapin. "So, kapag ni-rape mo siya, makukulong ka," nakangising sabi niya sa akin.

Sa isang iglap, napasuko na lang ako. "Ton, kahit hindi ko na kunin ang pera. Paalisin mo na lang kami."

"Ayan tayo, e. Ang tapang mo pa kanina," nang-iinis na sinabi ni Elton. "A, mali . . . palagi kang matapang, kaya bad trip sa 'yo sina Jackson."

"Elton, ang usapan, kukuha lang ng pera," sagot ni Calvin.

"Vin, ikaw, hindi ka naman ganito dati, e! Baka nakakalimutan mong dumaan ka rin sa ganito."

"Tigilan mo ang barkada ko. Ako na lang, hayaan mo na si Leo."

"Wala akong pakialam sa 'yo, 'tang ina ka ba? Kami ang may usapan nito." Ibinalik ni Elton ang pagtutok ng nguso ng baril sa noo ko katabi ng baril na kanina pa nakatutok sa sentido ko.

"Elton!" sigaw ni Calvin.

Kung iniisip ni Elton na natatakot akong mamatay, nagkakamali siya. Kaya kong makipagpatayan sa kanya ora mismo kung wala lang akong mga kasama rito.

Ang nararamdaman kong sama ng loob, hindi na mula kina Elton. Wala akong ibang nakikita kundi si Kyline na umiiyak sa harapan ko.

Ilang taon kong hiniling na pagsisihan ni Kyline ang pagwe-waitress niya sa casino. Sa dami ng ginawa ko para lang makita siyang umiyak at pagsisihan niyang sumama siya sa Joven na 'yon . . .

Ang daming laman ng utak ko na gusto kong sabihin sa kanya.

Paulit-ulit.

Paulit-ulit na umiikot sa utak ko . . .

"Ang tanga mo, Kyline."

"Hindi ka kahit kailan natuto."

"Alam mo nang mapapahamak ka sa ganitong lugar, bakit ka pa pumunta rito?"

Ang higpit ng pagkakakuyom ng kamao ko nang lapitan siya ni Elton. Hinawakan siya nito sa likod, at pagbaba ng kamay n'on, bumagsak na lang sa sahig ang one-piece na suot ni Ky, naiwan na lang ang stockings at bow tie niya.

Gusto kong kunin ang baril ng nanunutok sa akin at paulanan ng bala ang lahat ng lalaking sumisipol pagkakita sa katawan niya.

"Ito ba? Masaya ka ba sa mundong pinasok mo, Ky?"

"Ang ganda mo na, ang sexy mo pa." Hahawakan na ulit sana siya ni Elton kaya humakbang na ako para pigilan ang gagong 'to.

"Hep, hep, hep!" Ikinasa na ng nanunutok ng baril sa sentido ko ang hawak niya. "Easy. Hindi pa tayo tapos."