ရုပ်ရှင်ဧကရာဇ်ရဲ့လက်ထပ်ထိမ်းမြားခြင်းဒိုင်ယာရီ (Completed)

Chapter 45

ယခုလောလောဆယ်တွင် ကျန်းဆုလီက နာမည်ကြီးမင်းသမီးတစ်ဦးဖြစ်သည်။သို့သော်လည်း နာမည်မရှိ လူသိမများသောချောင်ဟွေ့ကို မနာလိုဖြစ်နေမိသည်။

သူ(မ)တွင် ငွေကြေး၊ အဆက်အသွယ်၊ ဂုဏ်သတင်း၊ အတွေ့အကြုံတို့ ပြည့်စုံနေပြီဖြစ်သည်။ ချောင်ဟွေ့က သူ(မ)နှင့် ယှဉ်စရာပင်မဟုတ်ပါ။

သို့သော် သူ(မ) မနာလိုဖြစ်မိသည်။

ထိုအချိန်တွင် set အဖွဲ့သားတစ်ဦးက လော်ဖြင့်အော်လိုက်၏။
"အားလုံး အသင့်ပြင်ထားကြပါ။ ရိုက်ကွင်း စပါတော့မယ်။"

ချောင်ဟွေ့က အခုမှအိမ်သာတက်ထားတာဖြစ်ပြီး ရှုရီယန်နှင့် ကျန်းဆုလီတို့က အဝတ်အစား၊ မိတ်ကပ်၊ အဆင်အယင်တို့ကို အခုမှ ပြင်ဆင်ပြီးကာစဖြစ်၏။ ထိုသို့ကြေညာအပြီး သူတို့အားလုံး အကုန်အဆင်သင့်ဖြစ်စေရန် အလောတကြီးပြင်ဆင်ကြရသည်။

ချောင်ဟွေ့ကတော့ လက်ထဲတွင် ရေနွေးခွက်ကိုင်ထားပြီး ရေနွေးဗူးကို ဗိုက်နှင့်ကပ်ထား၏။ သူ(မ)က တစ်နေရာမှာထိုင်ပြီး ရှုရီယန်နှင့်ကျန်းဆုလီတို့၏သရုပ်ဆောင်ပုံကို ကြည့်နေသည်။

ရှေးခေတ်အဝတ်အစားများဝတ်ဆင်ထားသောသူတို့နှစ်ဦးစလုံးက ခမ်းနားကာ ဆွဲဆောင်မှုရှိနေ၏။

ကုန်းရောင်က သူ့မိဘတွေဆန္ဒအရ စီစဉ်ထားခဲ့သောစေ့စပ်ထားမှုကို သတိရသွားသည်။

သူသည် ဒီနှစ်တွေထဲ လူသတ်သမားကိုရှာဖွေရင်း အလုပ်များနေခဲ့‌တာဖြစ်သည်။ သူ့နှလုံးသားတွင် အမုန်းတရား၊ လက်စားချေချင်စိတ်တို့ဖြင့်သာ ပြည့်နှက်နေ၏။ ဖန်မိသားစုကို အဆက်အသွယ်မလုပ်ခဲ့သည်မှာလည်း နှစ်အတော်ကြာပြီဖြစ်သည်။

သူနဲ့စေ့စပ်ထားတဲ့မိန်းကလေးလည်း အခုဆို အရွယ်ရောက်လောက်ရောပေါ့။

သူ၏ဘဝက အ‌ခြေတကျမဖြစ်သေးသော်လည်း အနာဂတ်တွင် သူ့ဇနီးလောင်းကို ကောင်းကောင်းမွန်မွန် ချမ်းသာစွာထားနိုင်မည်ဟု သူ့ကိုယ်သူယုံ၏။ သူ့အစ်ကိုပေးခဲ့ဖူးသောကတိကို ပြန်အမှတ်ရသွားသည်။ သို့သော် ကုန်းရောင်၏မျက်နှာကတော့ လောကဒဏ်၏ရိုက်ခတ်မှုကြောင့်
မာ​ကျောနေတော့၏။