خضوعي

P14

#14

                         " عيســٰـى  .. "
🖤  #خُضُوعِــــــــــــــــــــــي  🖤

بقلم : Ikram ElYaakoubi

" قالو ناس زمان  .. "

عضات على شنايفها متوترة حيت عارفة باها لاشاف لفلوس غيبيعها بعينيه مغمضين وخلاوها ناس زمان " لفلوس تخلي الذيب يقول باع "

رجعات لدار و شابكة يديها قدامها :" ميي وا مي "

لكاملة :" دخلي دخلي لبقرة تورد عاد ديها لزريبة "

نغمات صوتها :" واامييي "

غوتات فوجهها :" طلقيني بغيت نحلب ونحط ظهري "

خسرات سيفتها وهي كتعوج :" ولاا ميي لاا لبقرة لاا لااا "

شافت فيها :" اويلي على لبنت "

تغبنات :" مشات أمي مشااات "

غير نطقات بهاد لهدرة وهي تغبر من قدامها هربانة كتجري ومها مفهمات والو حتى دخل لمهيبيل ديال ولد عمها :" مرات عمي واااا خالتي لكااملوو "

طلات عليه :" اش كاين يا ولد لمهيبيل "

رد :" نوضي خودي حقك من بقرتك راه كتسلخ فقصر القايد "

ضربات على فخاضها :" اويلييي !"

ناضت تجري تابعه شامة ناوية تقتلها عصا ولكن هي طلعات لفوق سطاح وهزات معاها سلوم وكطل على مها من لفوق :" سيري أمي يالله تشدي نوبة "

مشات مها تجري بلا بلغة خلاوها ماليها (ناس زمان) " جا يسعى ضيع تسعة "

دخل لعبيقي وهو لقب لمهيبل ديال ولد عمهم من قوة سذاجتو و غباءو لي مكيتصدقش ولا ضحكة فلقبيله كلها :" زنوبة زنوبة "

فلكوزينة كتكتب بلمداد فوق لوح لي مخبعاه على باها حيت فالقبيلة عندهم البنت تقرا وتتعلم عيب وحرام و كتعتابر فُسق و عهر ناضت كتجري مخبعة لوح تحت طبله :" نعام !"
خرجات من لكوزينة كتجري :" لعبيقي اشنو كدير هنا ؟"

شاف يمين وشمال وحط صبعو فوق فمو :" شش "

جبد من القب ديال جلابة لي لابس قريعة صغيرة ديال لمداد واعطاهالها وهي خرجات عينيها وبدات تتهرب :" اشنو هادشي العبيقي ؟"

بضحكة صفراء :" تتعلم تقرا "

رد بضحكه :" شفتك فلغار كتكتبي "

حطات راسها فوق راسها :" ياربي تستر "

سداتلو فمو :" شكون اخر عارفني ؟"

بتغزل :" غي أنا ازنوبتي "

وكيضحك وسنانو صفرين  بعدات وجهها مروعة منو :" وعنداك تحل فمك تقلق منك عويشتك "

و بقا معاهم حتى ليل نهار كلو وهو مقابل زينب فينما مشات تابعها و فيه كثرة لهدرة ليل وصل وظلامو حل و لآلة لكاملة شادة راسها و حازماه و تخمم فبقيرتها كانت معمرة عليها :" سيري يابنت كرشي بغيت لك الضر "

كطل عليها من سطيحة :" كثر من هاد الضر "

جامعة قنينفاتها :" مغتخلينيش نهبط نذوق من لحمة البقرة "

زفات عليها بالنعاله :" والله يالجدبوك وتهبطي حتى نفرسك "

عائشة كضحك من لمراح :" هو في الموت و عينو في التوت "

دخل ابراهيم مشاو كيبوسو ليه على يدو :" راني زرت خادم مولاي وماعطاني حتى جواب "

طلع عينو فشامه فسطيحه :" اش غنقوليه ماخليتي ليا وجه معاه بلا حشمة مدخلة لبقرة للارض لي فيها لبير لكبير "

هزات كتافها :" ورجلي فين حطاتني "

بسخط :" قلب لقدرة على فمها تخرج لبنت لمها "

ناضت ليه لكاملة :" وعلاه مالها مها "

ابراهيم :" لانسيتي نفكرك نهار دخلتي ليا نعاج لارض للحشيش و طاحو كلهم مغيبين وخرجاتلي الضريبة بستين فرنك لا ديالي بقا لاوجهي تنقى"

سكتات عرفات راسها اش دايره وهي تضحك شامه من لفوق :" وعانيت ا مي راه لغلط كيوقع وكيبقا غي الدم خليني نهبط نتعشا "

لكاملة :" اوالله لا جا فكرشك "

حطو لعزبات طبلة و طاجين بلدي سخون على لحم لبقري وخبز لفران لكاملة كتاكل وتنخصص على بقرتها و شامة لفوق كطل و تشهى و دايرة يدها فوق فمها كتزاوغ و تطلب يخلوها تأكل :" ميي غي دغيمة دغيمة ا مي "

كتغبن :" غا لحيمة ،شحيمة أ مي "

سالاو وبداو ينقيو سنانهم بلعواد نطق لعبيقي :" جا عيان شوية ماشي زنوبتي لي نصبات "

عوجات لكاملة فمها :"حتى شبع صالح قال لعشا مالح "

تجمع مريم طبلة :" وهانتي كتشوفي "

زينب :" مي هاد سيمانة غنمشيو عند عائلة لعريس ؟"

لكاملة :" هم لبقرة نساني فيهم غذا نصبحو فلحلاوي "

ناضت زينب توصل لعبيقي لباب الدار :" سلم على عمي ومرت عمي "

كيلوح ليها بيديه :" تباتي فراحة الله اعويشتي "

ومشا دخلات كضحك عليه غير هبيل ومعندو صغار من صغرو كيقولها ويخبر عليها بلي نهار غيولي القايد غيتزوج بيها و يركبها على جمال و يقطع بيها لويدان من صغرو قدام لعائلة من زينب نخلاق واخا يخيروه بين كاع خواتاتها و زينب هي زينب عويناتو دخلو طفاو ضواو و دخلو لبيوتهم و شامه نقزات من سطيحة كتقلب على شي خبز تعمي بيه جوعها حتى شداتها مها من شعرها :" أي أي مييي "

كتبرد غدايدها :" ودابا جيتي بين يديا "

هازة يدها :" غي ناكل ونعرف بعدا علاش كليت لعصا "

فقصر عيســى دخل عليه واحد من عبيدو :" مولاي "

هز عينيه فيه :" شي خبار ؟"

حاني راسو :" مولاي يالله خرج لعبيقي من دار لخماس وكان باب دار مع زينب "

شاف فيه بنص عين :" تحرك من قدامي "

ورجع شاف من شرفة ديالو :" مغنتهنا حتى نجيبك قدامي "

تجمعو باش نكملو