خضوعي

p 67

#67

                          " عيســٰـى  .. "
🖤  #خُضُوعِــــــــــــــــــــــي  🖤

بقلم : Ikram ElYaakoubi

" قالو ناس زمان  .. "

جرها قدامو وهزها من خصرها بزوج يدين كيعاونها تطلع فوق الخيل وهي مطبزة معارفة كي تركبو موالفة غير بلحمير قصار :" كيفاش كنتي تركبي على خيلك ؟"

ضحكات بالسيف :" كانو لعبيد يتفرشوليا تا نركب"

حرك راسو وهو ميل شنايفو باينة فيها من كبار كبااار القبيلة وباها مغيكونش اي تاجر ركبات و هو جار الخيل :" سمحليا شقيت عليك "

حرك راسو بلا :" نسا تخلقو للراحة و الجمال "

ابتاسمات بخجل وهمسات :" هادو هما الرجال"

كيتمشى وهي حاضياه بنص عين كتعبر فكتافو الواسعين و شعرو البني مزيج من الاشقر و البني الغامق و خطواتو الموزونة غاديا وهي مرتاحة مخايفاش كتحس بواحد السكينة عجيبة واخا عبيد عيسى كافيهم ثقة هذا حسات بيه صادق ،لمحات فيدو الخلخال عاقدو فيدو تحت القاميجة لي لابس خرجات عينيها :" هداا ديالي شنو كيدير عندك "

طلع فيها عينو وهو كيحرك فيدو :" هاد الخلخال ديالك ؟"

حركات راسها :" اه ديالي "

بصدمة :" ديالك "

وقف و تلفت فيها وعينيه وسط عينيها كيحقق فيهم اه هما تماما عيون المراة لي خطفات عقلو من اول نظرة وخلاتو سهران الليل كيتأمل فلخلخال :" طاح منك فقصر مولاي "

حيدو من يدو وخدا رجلها برفق :" تسمحي ليا ؟"

حركات راسها وحنيكاتها توردو من تحت اللحاف وهبطات عينيها حشمانة :" تفضل "

ركب ليها لخلخال وهو كيشوف فرجيلاتها بيضين ورقاق منحوتين :" علاش تعطلتي ؟"

شافت فيه وصوتها رقيق :" كيفاش ؟"

رجع شاد فاللجام :" خليتيني كنتسنا "

حطات يدها فوق خدها وسخونية طالعة معاها :" سمحليا "

وصوتها قرب يختفي من كثرة الحشمة و الفرحة
خرجو من لغابة و هو غادي على رجلو احتراما ليها و احتراما للنبل لي فيه ميقدرش يركب معاها و مشا فطريق لي وصفات ليه طالع مع الجبال وهي غير كضور فعينيها :" حبس اسيري غير هنا بلاما نشقيك معايا (نعذبك معايا)"

مجاوبهاش متابع سيرو رجعات نطقات :" غتحي لقافلة وتاخدني معاها "

اسماعيل :" الى خليتك هنا مغنكونش راجل والخال بدا يظلام مغنوقف تال دار باك "

تزيرات حيت لاوصلها لراس الجبل مغتوصل تال ظهيرة غذا لدار الخماس حطات يدها فوق كتفو :" واخا توقف شوية كنحس برجلي منملة عليا "

شدات فراسها :" وراسي كيحرقني "

وقف تحت ظل شجرة و عاونها نزلات :" جلسي هنا "

مد ليها قلة ديال الماء :" شربي انا راجع "

ربط الخيل ديالو و بعد شوية باغي يقضي حاجتو شافت يمين وشمال وهي تهز جلايلها وعلقات الغلة فدراعها وهي تعطي رجليها للريح تجري وتتلفت موقفات حتى بعدات بزاف وتخبعات وراء واحد الحجرة كبيرة  وبدات كتنسل فالملحف و الذهب ثقل عليها ومغيخليهاش

تجري :" علاه انا ديال هادشي ، هادشي خليه بنت التاجر لكبير وبنت لقايد انا غا بنت الخماس"

عمرات الذهب وسط الملحف و خشاتو تحت كرشها و دارت فوق من راسها شال مغطي وجهها كامل و خرجات مادة كرشها و كتجري وكتجمع فالملحف تحت كرشها وثقلات المشية فاش حسات بصوت اقدام الخيل :" لالة "

وقفها وهي كتشوف فجنب لاخر بلاما تدوي وهو كيطل عليها :" مشفتيش مراة دايزة من هنا لابسة من الحرير ومعلقة من الذهب "

حركات راسها بلا بزربة وكتمشى مخلياه وهو هز كتافو مفهمش مالها ورجع بلخيل كيقلب عليها

وكتمشى على رجليها و تفلحو ليها مع الحجر حاد فطريق الجبل ولات كتعرج و تزحف وتنقز باش توصل بزربة المغرب خاص تلقاها فدار ولا ابراهيم يدوزها من عين الابرة

..،