" عيســٰـى .. "
🖤 #خُضُوعِــــــــــــــــــــــي 🖤
بقلم : Ikram ElYaakoubi
" قالو ناس زمان .. "
رجعو ادراجهم للقصر شافهم لعبيد بلمنظار من بعيد و كيغوت على لعبيد لي فلباب :" مولااي جااي مولاااي جااي "
الساحة ديال القصر تشطبات لي كان فيها غبر ودخل لعشو ولا تخبا بين لفصة تفتح باب القصر لكبير و دخلو وعيسـى كيداعب فمهرتو أمادا و هي كتحسسو براسها بحب و رأفة كبيرة و كتصدر اصوات و كتنقز وهو راكب فوقها كيبتسم فرفقة زوج زينب اسير عشقها و امادا اسير جمالها ، لمح زينب عند بعد اميال واقفة كتودع لوليدات الصغار و كتعمر ليهم حجرهم بالتمر الفتي و التامر لي مكايكل منو غير قصر عيسـى
تلفتات كتكيل من سلة التمر و لوليدا صغار بعدو فاش شافو عيسى جاي يجري فوق خيلو يالله تلفتات كضحك محساتش براسها امتى هزها بدراع وحدة من كرشها حسات برجليها كيلعبو فلهواء و حطها قدامو ورجليها بزوج فالجهة الاخرة مجلسها فوق حجرو تماما هي غوتات شادة فدراعو بجهد ويد التانية فوق عنقو غرسات ظفرها فيه ومغمضة عينيها لحافها نزل وشعرها تطلق كيلعب فالهواء وكيضرب فوق وجه عيسـى نطق فوسط وذنيها :" طلاب يسعى ومرتو تصدق"
كيقصد التمر لي كانت تتفرق فيه و العراضات لي تعرض من خيرو :" نزلنيي "
موقفش عاد مكيزيد يزير اللجام باش تزيد تسرع موقف حتى دخل لفوسط جنان من جنانات الفيرمة عاد بدا كيخفف السرعة و هي بدات كترخي من كتافو وهي تبدا كتضرب فكتافو بقبضة يديها بجهد :" واش باغي تخرجليا قلبي من بلاصتو ؟"
غمزها وهو كيشوف لون عويناتها لكاشف بسباب الشعا والضوء لي ضارب فيها :" كي خرجتي ليا العقل ؟"
كتجر منو لجام :" باغيا ننزل "
طلق منها وهي تشوف فيه كيف بارد و مخليها بخاطرها دارت عينيها فالارض و اكتاشفات انه فخ رخا منها حيت عارفها متقدرش تنزل خداها لارض يالله دايرين ليها سماد الطبيعي لي كان غائط الحيوانات ولانزلات غتمرمد فيه مزيان طلعات فيه عينيها لقاتو مزل حاجبو كي ديما كيستفزها كتشوف ابتسامة التحدي لي تحت تعابير حركات راسها ناوية تنقز وسط داك الغائط والغيس شافها كتتحرك كتستاعد تنقز وهو يزيرها :" شنو كديري ؟"
ضرباتو بمرفقها لجنبو :" مالها مرا القايد متتوسخش "
غمض عين من الدقة ولكن مارخاش منها رجع يزرها معاه فحالا معنقها من اللور ولكن كانت عاطياه بجنب معنقها بزوج يدين وشاد اللجام فنفس الوقت و راسها فوق عنقو ترخات فاش طاح فبالها سؤال لي حرقها فراسها الصباح كامل نطقات :" علاش مقتلتيهمش ؟"
مشافش فيها :" باقي لحال "
ميل الخيل باش يرجع :" نرجعو ندفنوهم دابا "
أنت تقرأ
خضوعي
Historical Fictionكان يا مكان فقديم الزمان حتى كان الحبق و السوسان و الله فكل مكان الملك مالك الرحمان ونزيدو نصليو على نبينا العدنان عليه افضل الصلاة و السلام ، كان لخير فكل مكان كانت الريشة تقهر لميزان وكان لعمى يتخطى لحيطان وكان الشيخ يقطع لويدان ولعرصة كانت تغذي...
