#191
" عيســٰـى .. "
🖤 #خُضُوعِــــــــــــــــــــــي 🖤
بقلم : Ikram ElYaakoubi
" قالو ناس زمان .. "
طاح ظلام ف قصر الملك و اسبانيا مانعساتش كانو ناسها و شعبها كيتسرقو و كيتنهبو و بداو عمليات التمرد و الطغيان ، الأحياء المهمشة كلات الدق و مازال كتستنزف من طرف أصحاب السلطة و المال، أعطى عيسى أمر للجنود يتأهبو و يخرجو يحاربو الفساد و الظلم و ايوليو يقاتلو الحاشية و لي طغى و تمرد مصيرو الموت، مابقاتش خدمة الجنود مجرد تدريبات و اختزان القوة و إنما جهود سنين د التدريبات غادي تبان من هاد لحظة، رجع عيسى هو و رافاييل و جنودهم للقصر ، قبل مايتوجه لجناحو مشا لجناح زينب دخل بشوية "سينيورة "
كيتمشى داخل جناحها حتى لقا شامه فايقة كتقاد لخافها وحادرة راسها " مولاي "
حرك ليها راسو و خرجات تجري باش تخليه ينفرد بزينب لي كانت مرمية فوق فراشها ماعسة وشعرها الطويل المسبسب كي لحرير مزلع فوق الوسادة و مغطيها ابتسم وهو كيشوفها فداك المنظر ناعسة فحال شي اميرة صغيرة تحنى عليها و هز الغطا كيقادو فوق منها مع كانت رامياه بعيد نازل فالارض و مكمشة فراسها بالبرد غطاها وجلس جنب سرير كيلعب فشعرها و كيدوز اطراف صباعو فوق خدها و كيشوف ويتامل فترسيمة وجهها ومعالمها و كيقيس رموشها الكثيفة قبل مينطق بصوت باح رجولي منخافض تزامنا مع دقات قلبو السريعة " تيامو ميامور"
خرج خلاها ترتاح كان مشتاق ليها و باغي يهضر معاها هاد ليلة غير انها غلب عليها نعاس و خلاها على راحتها حتى لغدا و يدوز معاها النهار ... دخل لجناحو باقي معصب و مغير لكن من برا كيبان خامد و هامد بحال البركان ، شاف الخناشي ديال تمثال الذهب وصلو عندو و بسرعة عطا امرو ل رافاييل " هاد الذهب اتقسموه بالتساوي فخنيشات صغار و تقدموه للشعب مابغيت تنساو حتى واحد "
تنهد رافاييل حاط يديه قدامو شابكهم " هادا تهديد مباشر للكنيسة"
بصوت مغدد" تماما انا كنتحدى هاد طعارج "
" انا تحت امرك امولاي و اوامرك اتنفذ ليوم قبل غدا "
هادي كانت رسالة مباشرة من عيسى للكنيسة على بداية حرب وشيكة هي حرب الاديان .
حنحن و كمل هضرتو " راحتك اجلالة الملك كتهمنا داكشي علاش الجواري كيتسناو برا تعطيهم الاذن باش ادخلو ابسطوك "
غمض عينيه و دار شهيق و زفير و دارلو اشارة بيديه بمعنى دخلهم و مشا جلس فبلاصتو ماهي الا ثواني صفق رافاييل بيديه و دخلو الخدم حاطين الاكل ل عيسى ف طبلة طويلة فيها أصناف و أشكال المأكولات اللذيذة و الخدم وقفو حدا لباب كيتسناو اواميرو، بدات الموسيقى و دخلو الجاريات أشكال و انواع كانو سبعة بلحساب و كل وحدة و شكلها و لباسها ، كاينة مولات البياض و شعر كحل و طويلة و كاينة الشهبة مولات لعينين زورق لقصيرة، بدأو اشطحو فمقامو و يحاولو يغريوه و هو كياكل لعنب و كيشوف فيهم بعدم مبالاة من لمفروض هادشي يبسطو و يعجبو لكن ماحسش بفرق كبير ، طلع عينيه و ستاقرو على وحدة من الجواري كتشطح و حانية راسها ، زينها فتان و شعرها حرير حمر عينيها خوضر منين كتشوف ف جنب و شفايفها كبار و جنبهم خالة مزيناهم، قصيورة و مؤهلاتها بارزين و مشهيين ، بقا كيشوف فيها بلا مايحرك عينيه متبعها غير هي كيفاش كتشطح ماشي بحال لجواري لوخرين فيها شيحاجا غريبة و زوينة فنفس لوقت بنسبة ليه ، اعصابو بردات ، كانو كيرقصو رقص اسباني جديد عليه وهو مرة يتبع معاهم و يرمي عينيه ومرة يمشي ويسرح جهة الشرفة جهة الريح لي كيضرب فيه وهو بالو عند زينب كتترسم ليه صورتها وشعرها كيحركو هاد الريح الخفيف شعرها لي كان فتنة كتجرح وتشفي استنشق داك الهواء النقي وهو كيستشعر عطرها كيحس بالدم كيتدفق بسرعة فاوردتو الدموية رجع راسو اللور مغمض عينيه قبل ميسمع خطوات رجلهم القوية لي ضربات فالارض علامة هلى انتهاء الرقصة بقا كيتفرج حتى سالات الموسيقى و هبطو كاملهم قدامو حانيين راس كيتسناو اشوفو شكون مولات السعد و هاد ليلة تبات فحضن الملك و يبرعها ب خيرو و يدفق عليها مجوهرات و ذهب و فضة و علاش لا تكون هي جارية الملك المفضلة ديما ، ناض من بلاصتو فاتجاه الجارية لي كان متبعها بلعين و رما عليها زيف أحمر فحجرها الحركة لي دار خلات الجواري كاملهم ينساحبو و تبقا هي راكعالو تحت رجليه
أنت تقرأ
خضوعي
Historical Fictionكان يا مكان فقديم الزمان حتى كان الحبق و السوسان و الله فكل مكان الملك مالك الرحمان ونزيدو نصليو على نبينا العدنان عليه افضل الصلاة و السلام ، كان لخير فكل مكان كانت الريشة تقهر لميزان وكان لعمى يتخطى لحيطان وكان الشيخ يقطع لويدان ولعرصة كانت تغذي...
