خضوعي

P31

#31

                      " عيســٰـى  .. "
🖤  #خُضُوعِــــــــــــــــــــــي  🖤

بقلم : “Ry”🔏

    " قالو ناس زمان  .. 💬"

زينب :" ما اش هاد روينة اش كديري ؟"

لكاملة :" اللي فاتك خليه لبناتك الله يرحمها قولة ديال ميمتي ، نهار تزوجت مشيت لاحنين لارحيم با مكانش فحالو ومقدر يتبعني حتى بفطور وميمتي الله يرحمها كانت ماتت داكشي علاش دابا كل مرة نخطف ليك بياسة ونوجد لك"

زينب :" ماليي واقفة لك فوق قلبك راني مغادية فاين تقول الخطاب دايرين السرابس باب الدار"

قرصاتها لكاملة من جلايلها :" سكتيي سكتيييي ونتي فمك لاحسو كلب جاهل "

زينب كتحك فلقرصة :" اييي ا مااا "

شامة كطل عليها من شريجيمة صغيرة :" زوجونييي انا ا مااا والله حتى نعجبك "

لكاملة :" يالله مدي يديك للحنة يابنت لكاملة "

جات تجري فرحانة :" هاهيي زينت البنات بنت لالة لكاملة"

رمات عليها واحد الشبشب كانت لابساه :" نوضناها تشطح دارتها بصح ، الله يقل ليك العراض سيرييي قابليي الحريرة لاتلصق"

شافت زينب خارجة وجراتها من عباءتها :" ونتي زيدي تحت جوانحي "

زينب كتهرب منها :" مي عندي ميتقضا خاصني نحيد نشير مساليناش ليهم "

لكاملة :" تحيدي نشير فهاد الليل بغيتي يركبك جن درغاوي جلسيي للرض عاونيني نطويو هاد لحوايج وشوفيهم جبتهم ليك من سوق الحد"

جات تهز وحدة ضرباتها على يدها :" هادشي غيبقا صاين حتى نهار تاهديه معاك لدار راجلك "

همسات بشوية كضحك :" ميكون غي مولاي عيسى ان شاء الله "

حطات يديها فوق فخضها كطبطب وتشرح وتوصي :" ديري بالك من ثلاتة السوسة اللوسة هاوذني منك راها كانت مرت ابليس الله يحفظ وينجي ، وديري بالك من قهر الرجال راه مول التاج ويحتاج وتاهما ليهم الله ، وديريي يابنتي بالك من العكر الحر يضرب مايعلم "

زينب غير كضور فعينيها وتتنهد ومسايرة مها:" عليك بالحناء و اداد و العكر لفاسي شبَّة وملحة العطار ميخطاوش دارك ، وقبل متمشي غنمشي نجيب مخ الضبع باش يولي حال فمو كي ضبع وجلدة باخا نتي تقولي وهو يقول واخا ، "

فدار عابد لبس وطلع لبوط وخرج لقاها مكلمة فراسها محنش و مرمشش بالرحمة دفعها حتى فتح لباب ورجع سد عليها وخلاها كيف لكلبة منشورة فالارض و مشا للقصر ديال لقايد عيسى دخل خلا لخيل للعبيد يديره للكوري الهاص بالخيول وهو دخل :" داداا ام الغيث "

خرجات عندو من لكوزينة صفرا مخلوعة :" طلع اولدي جري الله يرضي عليك معرفت مولاي اش عندو ومانع عليا رجلي تقطع الى دخلت عليه "

عابد :" اش واقع ؟"

ام الغيث :" كنسمع صوت شي حاجة كتهرس والرديخ معرفت اش واقع "

طلع كيجري كينقز زوج درجات فتح عليه لباب لقاه مرمي على الكاس ديال التراب لي مهرس والدم سايح من يدو وعينيه مقلوبين وكيتعرق بزاف و كيضرب برجليه مخنوق عينيه حمرين حيت النفس مقطوعة فيه وحوايجو مقطعين من جهة ديال الصدر مشا يجري تلاح كيهز فيه :" عيطييي على لحكيم "

ام الغيث :" ولكن..؟"

انفعل ورجع يغوت :" واش بغيتييه يموووت عيطي عليه وانا نتحمل مسؤوليتو غيقتلني اناا غير يعيش بعدا "

حس بيديه مزيرة على لمعصم ديالو و عيسى كيحاول ينطق حيت فحالا شي واخد خانقو ومانع عليه الحركة و الكلام :" لااا غنن ..غنقتلك "

عابد :" مولاي را.."

قاطعو كيلتاقط انفاسو بالسيف :" واش باغي تمووت "

عابد :" اعطيت عمري باش نحميك امولاي "

حطو وناض يجري حنا راسو :" سمحليا امولاي"

وخلاه كيتقاتل مد يدو مشدوش ضربها فالارض :"مالديتو باستيردو "

يدو فشلانة و هو كيشهق التنفس مقطوع فيه خانقاه ريحة دخان واخا مكاينش الدخان وراسو كيدور الدنيا كتحرك بيه وفمو ناشف بدا يزراق فحالا شانقو شي واحد ومعرق بزاف فحالا خاويين عليه لماء بارد صدرو ميطلع وينزل بزربة ورجليه كيتحركو حيت مخنوق ام لغيث واقفة عند لباب مقادراش تخطوي حيت غيقطع راسها

كتبرح عليها من بيت لخزين :" اخرجييي شوفي شكون فلباب "

زينب :" شكون غيجي فهاد الليل ؟"

ابراهيم :" دخلي معندي بنات يحلو فنصاص دالليل "

خنزر فيها ولبس بلغتو و خرج فتح لباب :" ياك لاباس اسي عابد ياك ماكاين باس ، اش دارت ديك لمسخوطة هاد لمرة ؟"

عابد كينهج جاي كيجري :" زينب زي.. زينب "

ابراهيم :" مالها زينب ياكما دارت شي موصييبة ؟"

عابد:" رجلي برجلها لدار لقايد عيسى "