خضوعي

p 65

#65

                          " عيســٰـى  .. "
🖤  #خُضُوعِــــــــــــــــــــــي  🖤

بقلم : Ikram ElYaakoubi

" قالو ناس زمان  .. "

دخل ولقا يعقوب تحنى وباس على سلهامو :" سمحليا ا مولاي قللت العفة وبالغت فردي "

جر منو سلهامو :" مازال منسيت فعلتك "

تحنى بيديه بزوج :" سمحليا ا مولاي كنت قليل الفهم و عقلي غدر بيا "

معبروش :" تحرك من قدامي مبقيتيش بيدق و عندك بزاف ميدار "

حط لعصا فوق كتفو وهو مازال محني :" غلط واحد غنخلي عزرايل يزورك "

حرك راسو باه و هو كيبلع ريقو حيت عارف دابا عيسى غيرد معاه لبال و يحط عليه مراقبة كثر ويمجرد مايدير شي غلط مغيرحموش ولولا شفاعة زينب كان يسيفطو من زمان..

وكمل طريقو كينده :" اسماعيل "

شاف فام الغيث لي كانت حايا كتمسح يديها من شقا الكوزينة :" دادا "

باست فوق كتفو :" ولدي اسماعيل خرج هاد الصباح للصيادة حلف ليوم متاكل غير من لحم الغزال لي كيعجبك "

حرك راسو بالايجاب :" باغي يرشيني "

ابتاسمات  :" وشنو ذنب عبيد حبك ا مولاي "

ربط فوق ظهرها :" كيف بقاات بنتك "

ام الغيث :" غيث لاباس عليها وهذا من فضلك ا مولاي عايشة من خيرك الله يزيد من فضلو عليك ا مولاي "

باست فوق يدو :" لهلا يحرمنا منك والله يطول لينا فعمرك "

ورجع باس فوق راسها :" متقوليش هاك ا دادا فضلك كبير عليا "

بداو عينيها لمكمشين كيتحجرو بدموع :" آويتيتي هجالة بولادها وكلتيهم شربتيهم وكسيتيهم علمتيهم و ربيتيهم عمر ولادي حسو بنقص باهم حيت كانو كيشوفو فيك باهم وخوهم لبكر "

كتدعي وتعاود :" الله يحفظك من عينين الغدر وسم الحسد ا مولاي "

ختماتها :" الله يزيد من شانك ويعظم مكانك "

ابتاسمات فحالا عارفة مبتغاه :" ويعطيك التريكة الصالحة من زينب "

فدار الخماس كانت فاطمة كتضرب على فخاضها وتولول :" اويلي على مسخوطة واش باغيا ترزينا فراسنا "

كتدي وتجيب فراسها :" واا تعاالييي يااا ميييي نوريك دار خوالي "

مريم كتهز فكتافها وكتغبن :" ومالي انا شنو درت بغيت غير نجربو ونرجعو ليها "

ضحكات فاطمة من كترة الفقصة لي ركبات فيها :" ومولتي غيجرب السيف فوق عنقك "

مريم كتتغبن :" وراه ولينا نساب القايد "

فاطمة كتغوت :" واش نيتي لقايد تسرقيلو من وسط دارو و ديال مرتو واش خرج ليك العقل ابنت الكاملة ؟"

طارت سدات ليها فمها :" شوو شوو واش بغيتي تعيد عليا مي هاد الليلة "

فاطمة كتهدر تحت يدها :" الى عيدات عليك مي راك لاباس هادشي الاماا فورو عليك هْلّْ لقبيلة كنازة الليلة "

مريم كتقلب ليها فالملحف :" شوفي على حرير مخيط بالذهب واش مغراتكش نفسك تجربيه ؟"

فاطمة :" لالا ا ختي انا مازال مسخيت بعمري وباقي باغيا يدي تكون مني منهزش من دار لقايد "

مريم :"بعدي مني تخلعي فيا وزايدون دار ختي هاديك دابا "

وناضت كتطل من لباب يمين وشمال :" مي مشات تاخد بقرتنا عند عجل خديديج باش تولد مغتحيش دابا "

فاطمة كتصرفق فوجهها بشوية :" علاش ناوية الحرايمية "

بدات كتلبس فالكسوة :" باغيا نشوف بنات القياد و كبار لقبيلة باش كيحسو "

فاطمة :" وااا مريم واش نسيتي نفكرك راك ماشي بنت لقايد ولا الشيخ راك غا بنت ابراهيم الخماس "

كتهز عليها مريم فحجبانها :" وخت مرت القايد عيسى "

لبسات الكسوة وظفرات شعرها طويل كاع بنات الكاملة كيستمتعو بالجمال و طول الشعر سالف طويل رباتهم لكاملة بلي سر لمراة فشعرها ودراعها دارت فوق راسها الملحف و عقدات ترب اسود فوق وجهها مغطي فمها ونيفها ومخلي عويناتها بوحدهم لي يبانو و ضرباتها بواحد التكحيلة بالكحل الحر وحاطة سواكة تحت لسانها و كتعلق فذهب زينب و الاساور

كيتخرخشو فيدها و لخلخال فرجليها :" رشيني رشيني ابنت مي من المريشة على الله سعدي يطلع من الكريطينة "

بقات فاطمة غير كتشوف ودايرة يدها على حنكها :" سالف عذرا و لحاف القمرة و غتمشي فوق حمار الكاملة ؟"

حركات راسها :" ومالو حمار الكاملة هو لي تربيتي معاه نبدل كولشي حتال حماري لا "