خضوعي

P20

#20

                       " عيســٰـى  .. "
🖤  #خُضُوعِــــــــــــــــــــــي  🖤

بقلم : Ikram ElYaakoubi

" قالو ناس زمان  .. "

تلفت بالعرض البطيء ورجعات كتاكد على كلامها :" انا حاملة من لعبيقي "

بجرءة :" ولا عرف لقايد هادشي .."

قبل متكمل فتح عليها لباب مصدوم وعينيه قربو يطيحو للأرض ومها كضرب على فخاضها و كتولول بقلة حيلة وخواتاتها خواو بيهم رجليهم جلسو مصدومين من هدرة زينب ممتيقينش حيت مكيشكوش فبراءتها والتزامها وعفتها هي اكثر وحدة كتدافع على الشرف و كتايد على لحفاظ عليه وياما خرجات احكام و أغاني بارتجال على رعاوي عيســى لي كانو ياخدو شرف بنات لقبيله بلا شفقة وبلا رحمة
صرفقها وعاود ورجع شدها من شعرها كيحرك فيها و ضرب ليها راسها مع الدفة و عاود ضربو حتى ولات كتحس بالدوخة بين عينيها و الدم سال ليها من جبينها و الكاملة شادة فدراعو وكتجر فيه :" سيدي ابراهيم راه غتقتلها غتقتلهااا "

و خواتاتها كيتباكاو ومعانقين شفقو على حالة ختهم

ولعبيقي واقف حاط يدو فوق فمو :" حاملة ؟"

غمض عينيه بخجل :" داك نهار بستها و ممسحاتش لبوسة "

وخرج كيجري راكب فوق عصاا ديال شطيبة جرايد قدام وكيهلل ويغوت باصوات غريبة كيبقا غير هبيل مهيبل ديال لقبيلة اما زينب كلات ماكلا الطبل فليلة العيد كلها منفوخة عصا وكتبتسم حيت عارفة بلي كلمتها لي غتمشي وبالسيف على باها ولا كاع ناس القبيلة غيجيبو لفضيحة وتولي سيرة بنات الخماس على كل لساان الكبير و الصغير الجيد و الرعواني رماها فلكسيبة حدا البقر و الغنم وسد عليها معاهم صاوبات لقش و دارت وسادة وفراش من الثبن وتغطات بالربيع دايرة يدها تحت راسها وكتبتسم :" انا لي عمري غنكون ليك اعيسى "
وصباح الغذ كي هلل الفجر و صيح الفروج خرج حمارو وقصد دار خوه لعربي بات لعبيقي مغمض ماشافت عينيه نعاس وكلو كيترعد من الشمتة لي كوات فيه وحدة من بناتو و غسلات ليه وجهو بغيس الشتااء ومرمدات ليه سمعة ديالو بدا كيدق بجهد علاين يطير داك لباب و كاع برغاغة ديال القبيلة كيطلو عليه من ثقاابي :" لعربييي !"

وبدا يضرب فالباب :" لعربي خرج عنديييي "

حتى وقف عليه لعربي جاي من جامع :" ياك لاباس اخويا ابراهيم ؟"

حل لباب :" دخل تفطر وتشرب معانا شي كويس ديال اتاي "

غوت فوجهو :" علاه ولدك خلى فيها شي فطور ؟"

رجع راسو اللور :" ياكما هشام رجع يسرق ليكم لبيض و دجاج من لكسيبة ؟ "

عض على سنانو بالفقصة :" هاد لمرة خداا النعجة بصوفها "

رد بصدمة :" معرفت منين خرجوليا هاد لولاد "

دوز يدو فوق كتف ابراهيم :" هاهي لكسيبة ديالك عزل وتخير فيها كي بغيتي "

بعد يدو :" العربي خويا ولدك حك ليا فوق عمامتي مدار بحساب طعام لمشروك ولا الدم لمشروك "

ضرب يد فيد وهو حني الراس بخجل للعار لي لصقاتوليه زينب :" غديرر ليا حل مع ولدك داكشي لي فكرش لبنت راه ديالو "

شاف فجنابو ودخلو للدار حيت الحيوطة فيهم الثقاب جلسو وهو مزال ممتيقش ولادو غير لهبيل على خوه يسرقو ويكذبو ولكن ميقيسوش فبنات الناس ولمخير فيهم مكتحرك فيه بنت والو كلهم ناقصين عقل ومن زواج مزوجينهم بالسيف وشكون لعبيقي لي معندوش غرام ديال لعقل :" خويا ابراهيم لعبيقي تعدى على زينب هادشي لي بغيتي تقول ؟"
بعصبية :" وشنو كنقول انا من صبح الله ؟"
وخلاوها ناس زمان "اذكر الكلب اوجد العصى"
هاهو لعبيقي داخل كيجري على الدجاج ويخلع فيهم وهما كيطيرو وينقزو هربانين منو و فمو عامر بالربيع شاف فيه ابراهيم وقوس حاجبو :"لا حول ولا قوة الا بالله "
رجع شاف فيه لعربي :" هذا تعدى على زينب ؟"
دوز يدو على وجهو :" لعربي راه حتى نت عندك لبنات "
كيعمر فاتاي :" ايه و لبنات عارهم بوحدو ، وبنتك راه بنتي فضيحتنا غنجمعوها هنا و لفاتحة غنقراوها ودار راه دارها غتعيش معانا فحال وحدة من بناتي و الله يسامح راه معرفت منقول "
حدر راسو :" يديروها صغار ويوحلو فيها لكبار "
تنهد :" الله يكمل بالخير "

وناض خرج وراسو مرفوع كاع الهدية و لحالة لي كان كيوجد ليها لعرس بنتو زينب من قايد القبيلة تضربات ليه فوالو و على خر ايامو غيتناسب مع لعبيقي
خلا لعربي راسو مرفوع كثر منو غير خرج وتجارات عندو مرتو كتغوت :" وااااا زعرتيييي ياا موكة بلاارج دار العرسس "
كيغمز فيها :" سكتييي سكتيي غضحكي فينا ناس لقبيلة "
كضرب ففخضها :" والضحكة هي لي درتي فينا واش لعبيقي حتى هو نزوجوه ؟"
تنهد :" مليكة ساعفي لمكتوب ورضاي بلي اعطاك فرزي فالقلوب ولا عصيتي توبي يغفر لك مولاك ولا كويتي محبوب مايبرد غير لاكواك "
تقادات فلجلسة :" اسيدي لعربي راك كتشوف ولدك لعبيقي راه معارف من راسو لرجليه ناقصو لعقل عاد نقلبو ليه على الزواج "