خضوعي

P26

#26

      " عيســٰـى  .. "
🖤  #خُضُوعِــــــــــــــــــــــي  🖤

بقلم : Ikram ElYaakoubi

" قالو ناس زمان  .. "

عابد ركب خيلو ورجع للدار دخل لقا مو جالسة كتسخن فلكانون "فرن من التراب" باس ليها فوق راسها :" السلام عليكم "

دور عينيه فالدار :" فينها لغالية امَّا ؟ شفتك نتي لي داخلة لكوزينة"

شافت فيه :" معرفت واش انا عقوزتها ولا عدوتها اوليدي "

قوس حجبانو :" اش واقع امّا ؟"

تنهدات وقلبها عامر :" سيفطتها تجيب لحطب قبل متغبر الشمس ومن تما مبقيت شفتها لا هي لا حطب كدير ليا لفعايل اولدي "

كتفش فغليلها وكتعمر ليه فراسو :" باغيا تقتلني بلفقصة ، قلتها لك نهار لول قلت ليك بنات الخماس غيجيبو لينا العار و لفضيحة ما غيستروك وماغيزيدوك ولو كانت صفيحة ترد العار لو كانت رداتو على لحمار هي ماتسترات حتى فدار باها بغيتيها تدير لعقل عندك"

حطات يدها على حنكها :"وعاطيها ميتين يعطي لباك كيتين لا خد حمر لا سوالف ملوية"

دارت تكمل ملقاتوش حداها وسمعات صوت لخيل كيتحرك عرفاتو خرج يقلب عليها فداك ليل مشا لدار باها دق وحلات لو شامة:"خويا عابد ؟"

كيطل وراها :"لغالية فالدار عندكم ؟"

شامة باستغراب:" واش غدير عندنا لغالية فالدار؟"

حلات فمها:" ياك لغالية فدارها ؟"

تخطاها ودخل لمراح لقا ابراهيم :" سي ابراهيم سمح ليا لا قللت منك ولا تعسفت عليك ولكن راه بنتك خرجو رجليها لشواري وراه غندير معاها لي مغيعجبك ومغيعجبها "

جمع لوقفة :"لغالية اش دارت هاديك صقعة تاني ؟"

عابد:" غير طاح ليل و مرت الراجل مازال فزناقي تديع "

ابراهيم :"بغيتي تقول مازال مدخلات للدار ؟"

خرجات زينب كتجري وكتقاد زيف فوق شعرها :" لغالية مزال مرجعات ؟"

بخوف :" ميمكنش مموالفاش ليها!

بتردد:"ياكما تكون وقعات ليها شي حاجة ؟"

عابد بصوت ممسموعش:"علاش مفكرتش فهادي"

ولكن زينب جاوباتو بالجهر:"كنتي ممساليش بالافكار الخايبة "

ولكاملة فلكوزينة كتضرب على فخاضها :" عييت نوصي وعييت نقرص عييت ولي فراسها فراسها بنت الهم اويلي على كرشي وماولدات ليا "

مريم بنتها صغيرة مبردة و كتنقي فلعدس:" ولي دارها بيديه يفكها بسنيه ، مِّي باراكة عليك من لفقايس زوجتوها باش تهناو ونتوما عاد مزايدين فهمها"

وخلاوها ناس زمان "وريه وريه حتى يعمى وخليه" ولكاملة عيات متربي فهادي و تنده على هادي وتاكل لعصا ولهدور غير باش تقاد صورة بناتها قدام ابراهيم وتحميهم من كلام ناس لقبيلة لي مكيرحمش

خرجو كيتجاراو عابد ووراه ابراهيم تابعاهم زينب حتى وقفها عابد :" نتي من نسا ونسا لقبيلة مكيخرجوش فهاد ليل "

دفعات يدو وسبقاتو :"ماشي نت لي غتوريني امتا نخرج وامتا ندخل ، غنخرج نقلب على ختي لي معرفتيش كيف تصونها (تحميها)"

زفر بقوة "ماقدو فيل زادوه فيلا" مرتو ماعارفها فاين كاينة ودابا غيتزادو صداع مع عيسـى ملي يعرف زينب خارجة فداك لوقت فلقبيلة غيقلبها عليهم هو وياها
ابراهيم جر بنتو وراه ومشاو يقلبو فجهة و عابد كمل فجيهة لاخرا وغير صوت لكلاب كينبحو لي كيتسمع و ضوء ديال القمرة خافت لمح ضوء ديال لپيل من بعيد فجبل و طلع بخيلو كيجري قرب وكيسمع فدراري كانو مجموعة ديال 3 دراري كيضحكو :"ويا صاحبي على زينها يسلك ليهودي"

وشد الثاني فقلبو:" انا لي يهودي "

ومضورينها هي لي مكمشة فراسها يالله بغا يقيسها واحد وهي تقفز مبعدة كترعد :"وخليك زوينة"

نطق واحد فيهم :"وهادي هي لقبيلة فيها التوت "

هز خصلة من شعرها :"خليك رويشقة باش تبقاي عويتقة أ لعويتقة"

هبط من لخيل وجبد لمضا من لبوط ديالو قرب بشوية و شافها من بعيد بيناتهم كتدمع وكترعد خايفة منهم وهما مضورينها بيناتهم و كيلعبو شكون يسبق بيها جا ورا لول وجر ليه من لوريد لوريد طاح وطار دمو والثاني ضربو لراسو حتى طاح غيب و الثالت جا هربان سيفط ليه المضا لرجلو طاح ولكن مزال هربان كيزحف مشا يتبعو وهي تجيه لغالية من اللور عنقاتو بيديها وحاطة راسها فوق ظهرو وكتبكي ويديها كيترعدو كيتحركو فوق كرشو و كتنخصص:" عا عا..عابد "

صوتها كيتقطع و لكلمات بالسيف باش كتجمعهم:"عابد انا انا خايفة متخلينيش بوحدي"

حط يدو فوق يدها بغا ينترها يتبعو ولكن زيرات عليه ونطقات بصوت تعبان :"عافاك"

رخاتكم لحريرة راه يالله بدينا زعما  👀