သူယခင်က ပိုက်ဆံမရှိဖြစ်နေသော်လည်း ယခုလေးတင်ပြီးသွားသည့် တိုက်ရိုက်ထုတ်လွှင့်မှုက သူ့ကို XB ရာနှင့်ချီ ယူဆောင်လာပေးခဲ့သည်။ သူလိုအပ်သည့်စက်တွေအကုန်ဝယ်ရန် စက် အလုံအလောက်မရှိဘူးဆိုလျှင်ပင် အနည်းဆုံးတော့ မျိုးစေ့တချို့ကို သူဝယ်နိုင်၏။
ထို့အပြင်၊ ယနေ့ညတွင်ထုတ်လွှင့်ရမည့် နောက်ထပ် တိုက်ရိုက်ထုတ်လွှင့်မှုတစ်ခု ရှိပြီး ၎င်းက ဒုတိယမြောက်ကမ္ဘာတွင် ချက်ပြုတ်ခြင်းထက် ဝင်ငွေပိုမိုရရှိစေမည်ဖြစ်သည်။
အနာဂတ်တွင်၊ သူသည် အချိန်နှင့်စွမ်းအင်ပိုမိုသက်သာပြီး ၀င်ငွေပိုရစေရန် သူ့ချက်ပြုတ်ချိန်အားလုံးကို တိုက်ရိုက်ထုတ်လွှင့်နိုင်သည်။ သူ ဘယ်လောက်ထက်မြက်လိုက်လဲ။
သို့သော်၊ ကုပိုင် Starnet ကိုဖွင့်ပြီး အလိုအလျောက်မျိုးစေ့စိုက်ပျိုးစက်များကို ရှာဖွေသောအခါ၊ ဖြစ်ရပ်မှန်က သူ့ကို နာကျင်စေခဲ့သည်။
အလိုအလျောက်မျိုးစေ့စိုက်ပျိုးစက်မရှိဘဲ သူနေသည့် အစွန်အဖျားဂြိုလ်ပေါ်တွင် သာမန်မျိုးစေ့စိုက်ပျိုးစက်များသာရှိသည်။ ထို့အပြင် စျေးနှုန်းက သူစိတ်ကူးထားသည်ထက် အများကြီး ပိုစျေးကြီးပြီး အခြားဂြိုလ်တွေဆီကနေ သယ်ယူရန်ကတော့ ထည့်ပြောစရာပင်မလိုချေ။
သူ့ပိုက်ဆံတွေအားလုံးက စက်တစ်လုံးဝယ်ရန်သာ လုံလောက်လေသည်။
ကုပိုင် ဆွံ့အသွားရ၏။
သူအရမ်းဆင်းရဲတာပဲ။
သူက လူဆင်းရဲလေးဆိုတဲ့အဖြစ်မှန်က မကြာခဏဖြစ်လာတတ်လွန်းလို့ ထုံတောင်ထုံထိုင်းလာသလိုခံစားရတယ်။
"ဟင်းးး..." ကုပိုင် သက်ပြင်းချလိုက်သည်။ သူ အခြားဂြိုလ်များပေါ်ရှိ ကုန်တိုက်များကို ပိတ်လိုက်ပြီး အစွန်းအဖျားကမ္ဘာပေါ်ရှိ စက်အဟောင်းများကိုသာ ဝယ်ယူလိုက်သည်။
ဘာမှမရှိတာထက် စက်တစ်ချို့ရှိတာက ပိုကောင်းပါသေးတယ်။
"အဘိုးကု ကျွန်တော်တို့ လူတွေဘယ်မှာငှားလို့ရမလဲဆိုတာကို သိလား" ကုပိုင် မေးလိုက်သည်။
