How to Flirt with the final boss

Arc 2 part 27

CEO ရုံးခန်းရဲ့အပြင်ဘက်မှာ အတွင်းရေးမှူးမလေးသည် ချီတုံချတုံဖြစ်နေသည်။ အစီရင်ခံစာအထပ်လိုက်ကို ကိုင်ထားရင်း ဝင်သင့်မဝင်သင့် စဉ်းစားနေပြန်သည်။ ရုတ်ခြည်းအေးစက်ပြီး အခြားတစ်ယောက်လို ပြောင်းလဲသွားသော သူမရဲ့ CEO သည်အခုတလော မထင်မှတ်ထားတာတွေချည်း လုပ်နေသည်။ ပြန်ရောက်လာသည့်နှစ်ရက်အတွင်း ကုမ္ပဏီကနှင်ထုတ်ခံရသော ဝန်ထမ်းအရေအတွက်မှာ လက်နှစ်ဖက်ထက် ရှစ်ယောက်တောင်ပိုနေသည်။ သူမလည်း ဆယ့်ကိုးယောက်မြောက်ကံထူးရှင်မဖြစ်ချင်ပေ။

မတတ်သာသည့်အဆုံး တံခါးခေါက်ကာဝင်ခဲ့လိုက်သည်။ ရုံးခန်းတစ်လုံး စာရွက်များအပြည့်နှင့်ရှုပ်ပွနေလေသည်။ စာရွက်လှန်သံများသာ တရစပ်ထွက်လာပြီးနောက် ထိုစာရွက်အထပ်လိုက်သည်လည်း ကြမ်းပြင်နှင့်မိတ်ဆက်သွားပြန်ပြီ။ အသက်ကိုပြင်းပြင်းရှုပြီးနောက် လွှင့်ပစ်ခံထားရသော စာရွက်တွေကိုရှောင်ကာ Misaki ရဲ့ရှေ့မှာရပ်လိုက်သည်။ ဖတ်ပြီးဟန်ရှိသော အစီရင်ခံစာအချို့ကို စားပွဲပေါ်ကနေ တွန်းဖယ်လိုက်ပြီး အသစ်ယူလာသော အစီရင်ခံစာအထပ်လိုက်ကို ပြောင်လက်နေသောကျွန်းစားပွဲထက်မှာ တင်လိုက်သည်။ ထို့နောက်တွင်တော့ စာရွက်လှန်ခြင်းအမှုကိုရပ်၍ သူမကိုစူးစူးရဲရဲကြည့်နေသော Misaki နှင့်ရင်ဆိုင်ရတော့သည်။ ထိုအမျိုးသမီးသည် ဖတ်လက်စစာရွက်တွေကို စားပွဲပေါ်ပစ်တင်လိုက်ပြီး သူမရဲ့လက်ချောင်းတွေက ကော်ဖီခွက်ကိုပွတ်သပ်နေလေသည်။ အတွင်းမှူးမလေး Coco ရဲ့နောက်ကျောမှာ သတိအနေအထားမတ်သွားကာ အသက်ပင်ရဲရဲမရှူရဲပေ။ ရှုပ်ပွဲနေသော ရုံးခန်းထဲမှာ အသက်ရှူသံခပ်လေးလေးနှင့် နာရီလက်တံရဲ့လှုပ်ရှားနေသံတို့သာ ကြီးစိုးထားသည်။

ဒီစာရွက်တွေကိုပစ်ချလိုက်မိတာကို သူမကတော့မှားသည်မထင်။ ဘာပဲပြောပြော ခဏနေ CEO ကိုယ်တိုင်လွှင့်ပစ်မှာပဲကို။ အပြင်ပန်းမှာ တည်ငြိမ်အောင်ထိန်းထားသော်လည်း သူမရဲ့နောက်ကျောတစ်ခုလုံးချွေးတို့ရွှဲနေသည်အထိ ခြောက်ခြားနေရသည်။ မျက်စိရှေ့ကအမျိုးသမီးရဲ့ နတ်ဘုရားထုစစ်ထားသလိုအပြစ်အနာအဆာကင်းလှသော လက်ချောင်းတို့သည် သူမယူလာသောအစီရင်ခံစာအချို့ကို လှမ်းယူလိုက်ချိန်မှသာ အသက်ရှူနိုင်သွားတော့သည်။ စာရွက်လှန်သံခပ်နှေးနှေး ထွက်ပေါ်လာကာ ထိုအမျိုးသမီးရဲ့စွန်ရဲလိုမျက်လုံးတို့က သူမဆီကနေအကြည့်ခွာ‌သွားလေပြီ။