#الفصل_الخامس_و_الستون
#صراع_الحب_و_الكبرياء
و عودتني شما يجيس الخوف
ڪَللــبي تگلي أحبـڪ وأطمئن .~
......
فتحت على صوت تغريد،
- توتة، ها يمعودة، شلون صرتي ؟!
هزت راسها،
- الحمد لله ...
- دكَومي يلا تغدي حتى تاخذين علاجاتج، بيج حيل تكَومين لو ناكل اني وياج هنا ؟!
لزمت ايدها تتجي عليها و تنهض بنفسها،
- لا أكَوم ما بية شي ...
نزلت رجليها من السرير، توها دا تلم شعرها و لمحت موبايلها المهمل مخلى بجانب التيبل لامب، شالته و خمس مكالمات و عشرات الرسائل منه .. غمضت عيونها و همست بانزعاج،
- هاي منو كَالّه ؟!!
- هو الي خابر يسأل عليج، يكَول من الصبح اخابر و ادز رسايل و ما تجاوب ...
- جان ما كَلتوله رغودة خطية كومة شغل عنده ...
- أمي ما قبلت نضم عليه ...
و بأثناء كلامهم رن الموبايل بإيدها، و أردفت تغريد،
- ميخالف هسة حاجيه حتى يتطمن ...
تركتها تغريد، و أول ما نطقت بال'ألو'، اجاها صوته القلق،
- ألوو، هلا يابة، وينج بالي عليج ...
- جنت نايمة حبيبي و الموبايل ما ادري بيه ...
- بالي يمج يا روحي، الحمد لله على سلامتج، شلون صرتي هسة ؟!
- الله يسلمك، الصبح جنت تعبانة و نمت و ما بية شي هسة ...
- شلون ما بيج شي ولج، كَلبي نار هسة تدرين لو ما تدرين ؟!
- حبيبي والله هيان ما بية شي، بس يريد لي راحة و هيان بالفراش ما كَايمة منه ...
- موجوعة ؟! متأذاية مو ؟!
- لا مو كلش، ألم بسيط و دا آخذ علاجات ...
و قاطعها صوته منفعل،
- لا تجذبين، و هذا صوتج شنو ؟! شنو كَدامج زعطوط خومو زعطوط و تقشمريه ؟!
سكت ثواني و رد،
- اجيج اليوم اجيج، إذا ما اشوفج بعيني ما اصدكَ، بس اخلص شغلي و اطلع منا .. لليل اني يمكم ...
- حبيبي هاي شبيك، ما بية شي وداعتك .. أنس .. وينك مو احاجيك ؟! حبيبي لا تجي فدوة، الطريق خطر بالليل لا تخلي بالي عليك ...
- ما علية شي روحي ارتاحي لما أجيج ...
هي سمعته و طفرت الدمعة من عينها و ردت بنبرة ترجف،
- أنس لا تخبلني، حبيبي بداعتي، إذا الي خاطر يمك لا تجي .. أعلمك اني قابل اعلمك هذا الطريق شيصير بيه ورا الغروب ؟!
هو يرد ببرود،
- ما يصير شي، انتي بس لا تفاولين علية ...
و هي نترت بيه بصوت يرجف،
- انت صدكَ تحجيي ؟! استر علية أنس، يروح يصير لك شي؛ شاكَول شاحجي بس فهمنييي ...
- لج لا تعيطين،
و أردف بمسايرة مبينة من نبرة صوته و هو يستمع لأنفاسها المضطربة،
- هاهي، هاهي، ما أجي بس اهدي انتي و ارتاحي حتى لا يظل بالي عليج ...
أنت تقرأ
صراع الحب و الكبرياء
Romanceظلم تعرض له جيلين من الأبناء على يد الجد .. فرق إبنه عن زوجته، و كانوا ضحايا ظلمه ثلاث أشخاص .. زياد، سميّة و وطن ... و عاود كرّة ظلمه على حفيدته بعد سنين بزواج إجبار من ابن عمها الأكبر ... هي .. عنيدة، ذات كبرياء ... و هو .. يحمل نفس الدماء، عنيد،...
