صراع الحب و الكبرياء

الفصل الثالث

#الفصل_الثالث
#صراع_الحب_و_الكبرياء

طبطب على وجهه بقلق،
- جدي .. جدي شبيك ...

سحبه لحضنه و صاح،
- ماي .. يابة ماي ..

بيبيته انتفضت من مكانها و هي تصيح و تولول،
- صخام الصخمني .. ولك عودة شجرالك ؟! يا يابة راح يروح الرجال من ايدي .. يبوو ...

صب له أبوه ماي و نفضه على وجه جده و بالإيد الثانية يفرك صدره و صاح،
- جدي على بختك صدكَ تحجي ؟! بيبي يمعودة كَولي الله .. يابة شغل السيارة خل نلحكَ ..

كَوم جده بتأني و سندوه هو و عمه زياد لما وصلوه للسيارة و الحجية تركض وراهم و وجهها مخطوف لونه .. ما كَدر زياد يعوفها لوحدها .. ظل وياها و هم انطلقوا للمستشفى ..

لما وصل للمستشفى كانت حالتها بيها و ما تسوء .. طوارئ و إجراءات و تحاليل و تخطيط قلب و كانت المفاجأة إنه صايبته ذبحة صدرية و ضغطه مرتفع ما يرضى ينزل حتى بالعلاجات ..

ساعتين كَاعدين على نار يلا كَدروا الأطباء يحصلون على استجابة منه .. و أول ما وعى عليهم عينه على أنس يردد ..
- بنت عمك .. بنت عمك ...

بعد اللوعة و الهبطة الي أكلها .. بس شافه فتح عيونه تقرب باس إيده و راسه،
- إهدى جدي .. هاهية والله التريده يجرالك .. اهم شي صحتك ...

غمض عيونه و هو يردد،
- مو تقشمرني .. أعرف دروبك ..

- جدي مو وكت الحجي بهذا الموضوع هسة .. هي صحتك عايزة حتى تجملها فوكَ الحمل تعلاوة ؟!!

- ولك ابني انت ما تعرف همها على ظهري شكبره !!

- هسة عاد شلون مهتمة هي !! كل هذا الي تسويه و مو بعينها .. عليمن بعد مأذي روحك، الما يريدنا ربح ما نريده خسارة ...

- بنيتنا هاي، لحمنا يظل ببيت زلمة غريب ؟! اني ادري بس اموت هاي البنية محد يكَلبها و يذكرها بسلام .. الأبو الله يجرم حاير بطلايب مرته و عياله و ما يكَول ضناي ببيت الغربة .. العم شايل إيده من كل شي ..

قاطعه أبو أنس،
- يابة شبيدي عليها ؟!!

- اسكت انت ما تفرق عن اخوك الاغبر بشي ..

و أردف و هو يوجه له نظرات مليانة لوم و عتب،
- و ابن العم حزام الظهر هالشكل يحجي .. عليمن اعتمد و اذب حمولي ؟! و تكَولون صحتك .. من خرب هيجي عمر يخلص و كوم زلم تركض ورى زعطوطة و محد منا عرف يحويها ... شوف ولك .. انت تعرف شكَد اعزك و كل الي تريده يجرالك لأنه شايفك رجال اعتمد عليه .. هاي سوالف المزعطة مال احبها ما احبها ما تمشي عندي .. بنت عمك تتزوجها و إلها للجمعة تجيبها تعيش ببيتي و جوة عيني و حجاية زايدة تشوف عودة الما شفته طول عمرك، لا عبالك اوكَع و تتكَوى علية ..

هنا انجن و طار عقله من تسلط جده،
- جدي صدكَ تحجي !! و بنت الناس القارين فاتحتهااا ؟!