#الفصل_الثامن_و_الخمسون
#صراع_الحب_و_الكبرياء
• اغار غْيـره تَشبـه جْمـالك فـلا
جمالك ينتهـي ولا غْيـرتي تموت ...
......
بالفترة الأخيرة أنس كثرت غياباته عن الشركة، أغلب أيام الاسبوع هو الصبح مختفي، حيل استغربت هالشي .. و لما سألته كان الرد،
- عندي معاملات ...
- معاملات شنو ؟!
ابتسم و هو يرد،
- مو عبالي اسوي لج مفاجأة، بس حركَتيها بفضولج ...
قلّصت عيونها و تقرّبت متجية بإيدها على كتفه و تكَول،
- اي عيني ليش لا، يحق لك تسوي مفاجآت ...
- و ليش ما يحق لي يابة ؟!
- اني كَلت ما يحق لك ؟!
- بيج خير و كَوليها ...
- هسة شنو ؟!
- شنو يابة ؟!
- شنو المفاجأة ؟!
سكت كاتم ابتسامته الي سرعان ما اتّسعت بالتدريج و هو يكَول،
- راح استلم جدولي الاسبوع الجاي ...
عكَدت حواجبها باستغراب،
- جدول ايش ؟!
- جدول محاضرات شبيج، قبلوني تدريسي بكليتنا ...
شهكَت موسعة عيونها بصدمة،
- الله عليك ...
ضحك و رد،
- قابل مجذب عليج ؟!
و ما لكَاها غير كَمزت لحضنه تبوّس بيه و تردد،
- فدوة حبيبي، صدكَ يعني ؟! يعني صدكَ حتبلش ؟!
أطبق عليها بحضنه يضحك و يردد،
- هههه اي ولج صدكَ ...
صفنت و ردت تسأل،
- و الشركة ؟!
- دوامي 3 ايام بالجامعة و يومين بالشركة و يجوز افرغ نفسي السبت هم حتى أخلص بيه أشغالي ...
و فعلاً الأحد من الصبح كشخ و تأنق كما هي العادة، وصلها للشركة و توجه للجامعة يبلش دوامه ...
أكثر من اسبوع مر على دوامه و هي عايشة بروتينها المعتاد، مرة تقضي النهار وية أمها، و مرة وية أبوها و اخوانها، و بيوم الأحد بدخلتها على أمها ريم ما كانت على بعضها .. انتظرت أمها تنام، و انفجرت بوجه وطن،
- اني بعد ما أتحمل ...
- شكو شصاير النوب ؟!
- لج كام يحرجني كَدام الطلاب، بعد ما اداوم والله اذا هذا يظل هيجي ...
- اصبري بابا غير نفتهم شكوو ؟!
و هي ردت بدموعها،
- وج والله كَمت امشي و اسمع الحجي باذاني، كلهم عبالهم عندي علاقة بيه .. ذاك اليوم علمود تأجيل امتحان يجيبون و يحجون وياه و هو قافل ما يقبل .. البنات على نياتهم دزوني احجي وياه، يعني ما رحت وحدي اجوي وياية كم بنية و اني الي حجيت و هيج بكل بساطة كَال كَوليلهم الامتحان اتأجل ...
- وج كَدام البنات نظراته مفضوحة، ضعت بهدومي والله .. ما مرت غير يومين و بلشت اسمع الحجي باذاني، بيا وجه ارجع اداوم اني ؟!
أنت تقرأ
صراع الحب و الكبرياء
Romanceظلم تعرض له جيلين من الأبناء على يد الجد .. فرق إبنه عن زوجته، و كانوا ضحايا ظلمه ثلاث أشخاص .. زياد، سميّة و وطن ... و عاود كرّة ظلمه على حفيدته بعد سنين بزواج إجبار من ابن عمها الأكبر ... هي .. عنيدة، ذات كبرياء ... و هو .. يحمل نفس الدماء، عنيد،...
