#الفصل_الثامن
#صراع_الحب_و_الكبرياء
كَعدة النسوان صايرة بالهول .. بيبيتها و عماتها و بناتهم و زوجة أبوها و زوجة عمها و هي متخذة مكانها بين تغريد و ديما و منعزلة عن البقية .. و رغم هذا ما سلمت من نغزات عمتها نعيمة ..
- لعد احنا حسبنا حساب الخطوبة اليوم غير تكَولون من وكت لغيتوها ؟!!
ام علي،
- يمة كل شي صار بساع بساع و تأجلت ما بيها شي و احنا أهل مو غربة ...
عوجت حلكَها و اندارت على أختها سليمة تحجي بصوت مسموع،
- هم زين صحى على روحه ...
ظلت ساكتة ما إلها قابلية ترد على أحد و أم أنس تكفلت بالرد،
- ليش هو وين يلكَى مثل وطونة أدب و جمال و شهادة ترفع الراس .. احنا أجلناها عيني لأن صارت بسرعة بسرعة و ما كَدرنا نجهز خطبة تلوكَ لبنتنا ...
إن شاء الله انتي أول المعزومين بالخطبة عيني أم أدهم ...
ظلت وطن ملتهية وية البنات و بس إذنها وية أم أنس الي أرضت غرورها بكلامها و حستها تعمدت تذكرها بأدهم الي رفضته وطن كَدام الكل و محد ضغط عليها بقبول أو رفض ...
دارت وجهها للباب و إجاها صوته .. لو ذاكرة لها مليون دينار ع الأقل تنفعها بشي أكثر من شوفة وجهه !!
سلم عليهم و عينه على وطن،
- شلونج وطن .. عاش من شافج عمي !!
ردت و هي تدير وجهها عنه،
- الحمد لله بخير ...
تريده بس يحس و يروح بس هو لزكَ مرة يحجي وية بيبيته و مرة وية خالاته و بين كلمة و الثانية عينه عليها ...
كَامت للمطبخ تتحجج بأي شي بس ما يجمعها بيه مكان واحد .. إنسان لزكَة و هي تمقت هيجي شخصيات ...
حطت الكَلاص تترسه مي من الترمز و أثناء ما رفعته تشرب لكَته وراها بالمطبخ،
- شدعوة عليج يابة نحاجيج و تصدين بوجهج ؟!
دارت وجهها و نترت بوجهه،
- انت شتريد، كافي ما مليت ؟!
- ليش صايرة عصبية يا عيني ؟! هاي هيج حب ابن عمج مدمر اعصابج ؟!!
رفعت حاجبها باستنكار و نظرة الغضب تلمع بعيونها،
- احترم نفسك و احترم البيت الكَاعد بيه لا أخلي ابن عمي الما عاجبك يعلمك الاحترام ...
توه إجى يرد و باغتهم صوته من باب المطبخ،
- هاي شكو ؟!!
اندار عليه أدهم،
- ماكو شي يابة، بنت خالي شو عصبية و مو على بعضها و دا نرضيها ...
رفع له أنس حواجبه بنظرة استهزاء و اندار على وطن الي وجهها مبهوت من تأثير الصدمة .. و رجع بنظراته لأدهم،
- أكَول ابن عمتي .. أشوف لو تنشغل بروحك؛ هواية أحسن ...
رد أدهم باندفاع،
- انت مالك حق تدّخل، الموضوع بيني و بين بنت خالي ...
تقرب عليه أنس و صاح بصوت مكتوم و هو يجره من ياخة قميصه،
- الي دخل و نص .. شوف ولك هذا آخر تحذير .. و حق هو ألله إذا شفتك قريب من بنت عمي لا أخلي دمك بطولك .. احترم نفسك و خلي النفس عليك طيبة ...
أنت تقرأ
صراع الحب و الكبرياء
Storie d'amoreظلم تعرض له جيلين من الأبناء على يد الجد .. فرق إبنه عن زوجته، و كانوا ضحايا ظلمه ثلاث أشخاص .. زياد، سميّة و وطن ... و عاود كرّة ظلمه على حفيدته بعد سنين بزواج إجبار من ابن عمها الأكبر ... هي .. عنيدة، ذات كبرياء ... و هو .. يحمل نفس الدماء، عنيد،...
