صراع الحب و الكبرياء

الفصل السابع و الستون

#الفصل_السابع_و_الستون
#صراع_الحب_و_الكبرياء

آنـي اشوفك موطني
‏وكاتب نشيدك
‏چنت آحس گلبي رسـالة
‏وضايع بهوسة بَريدك
‏بكل ضعف روحـي يبعد الـروح اريدك ♥️
......

ثاني يوم بالشغل هو و اتصل عمه، بعد السلام و السؤال عن الحال فاجأه بطلبه،
- أنس عمي، ولو خاف ازحمكم، بس اكَدر اجي احاجي عمتك ؟!

سكت شوية متردد، محتار بينهم و خايف يرضي واحد و يزعل الثاني، و رد،
- عمي البيت بيتك ما تستأذن كَبل لا تجي، بس عمتي والله ما ادري شاكَولّك، خاف تاخذ على خاطرها مني .. هي على جيتكم البارحة حسيتها تفاجأت و أبد ما مرتاحة عبالها مخطط وياكم ...

- دحاجيها عمي و شوف شتكَول، ولو ازحمك بس انت تعرف بلّي بينّا .. أكو هواية حجي لازم ينحجي و نقط تنحط ع الحروف ...

- يصير خير ولا يهمك، راح احاجيها و شتكَول يصير عمي، اعذرني ما أكَدر اضغط عليها اذا رفضت ...

- لا لا تضغط عليها بابا، ما تريد مو مشكلة، الدنيا ما طايرة و خل تسوي الي يريحها ...

- خوش لعد اشوف و ارجع لك خبر ...

- خوش حبيبي ...

- هلا عمي هلا بيك ...

بلغ وطن و ردت مباشرةً بدون تفكير،
- ماما ما راح توافق ...

- شمدريج انتي ؟!

- أمي و ادري بيها، هي من البارحة لليوم حسستني متآمرة عليها و مخططة لكل شي من وراها ...

- ميخالف مو عمي طلبني عيب منه، حاجيها و شتكَول يصير، بلا ما تضغطين عليها .. تكَول لا يعني لا ...

- و إذا انطردت من البيت بركَبتك ترى ...

- هههه فوتي للغرفة عود و اقفلي الباب، كَوليلها اذا انتي ما تريديني رجلي يريدني ...

- هو أهم شي الغرفة، هم انت و هم عمك تركضون ورا مصالحكم، و محد ماكل الرزايل غيري ...

رد بضحكة،
- ميخالف تمون عود اني اعوضج ...

- ايبااه ابو التعويضات، بيش تعوضني بالله ؟!

- بلّي يحبه كَلبج ...

- خاف بلّي يحبه كَلبك ...

صدحت ضحكته و رد،
- أم لسان الحكَج اني ؟! دروحي سوي الكَتلج عليه، و بالليل نتفاهم ...

دخلت يم امها و أول ما فتحت الموضوع ردت بالرفض،
- ماما حبابة دكَعدي و احجي وياه، قابل شراح يصير ؟!

- وطن كافي أمي، كافي تلحون بهاي الشغلة، ليش تحسسوني لكَمتي ثكَلت عليكم و تريد تشمروني على ابوج ؟! ليش تخلوني الم غراضي و اهج و ما تلكَولي أثر ؟!

صفنت بكلام أمها و ما لكَت نفسها غير خاتلة بحضنها تبجي،
- ماما ليش هيج تكَولين ؟! انتي جنتي شلون هيج تظنين بية ؟!
باست راسها و أردفت من بين دموعها،
- ما أكَدر اعيش بلاكم والله، والله ما ارتاحيت من رجعت لهم إلى أن جيتي ظليتي يمي، اطب و اطلع اشوفج كَدامي .. بس ابوية ظل همه يحفر بكَلبي و اني من فترة لفترة صحتي و مسؤولياتي ما تساعدني حتى أهون عليه حياته .. إلى متى تظلون هيجي ؟! انتي و ابوية ثنينكم متعذبين، ارجعي له و خلي كلنا نرتاح .. ماما والله أمنية حياتي اشوفكم ببيت واحد و اكَول هذا بيت اهلي و سندي مثلي مثل كل البنات .. و انتي والله بعدج شباب، ليش تضيعين عمرج هيجي و اكو من يتمنى كلمة منج حتى يعيشج ملكة ؟! ماما والله ابوية تعبان و مريض اذا صار عليه شي والله ما أسامحج ، هو و انتي و اني كلنا انظلمنا، و هيان احنا الله عوضنا بأنس، بس بابا منو اله ؟! محد اله غيرج .. ارجعي و هوني عليه و عليج الحياة .. فدوة اروح لج أمي، والله انتي البلسم اله و لاخواني كلهم .. كلهم يحبوج و يتمنون تصيريلهم أم، ارجعي و اشرطي عليه كل الي بنفسج .. هو يريد يحجي وياج علمود هالشي، احجوا و تفاهموا بينكم، بعيد عن اي احد، اكيد بكَلبج و بكَلبه حجي، احجوا و صفوا الكَلوب، ارتاحوا و خلي كلنا نرتاح بشوفتكم مرتاحين ...