#الفصل_الخامس_عشر
#صراع_الحب_و_الكبرياء
كَاعدة على الكوشة مثل الأميرات بجمالها و نزاكتها ..
كل شي من فستان و تسريحة و مكياج لايكَ عليها و كإنه خلق خصيصاً إلها ...
بس فرحتها مكسورة بغياب أمها ...
أم أنس طايرة بيها، تمشي و تحصنها بالمعوذات من عيون عماتها، و حقدهم، و حسدهم ...
بنات عماتها كاشخات على آخر حباية و ماخذين راحتهم كلش، من الفساتين الخلاعية للتسريحات و المكياج الصارخ ..
صاحت بيبيتها على أم أدهم،
- نعيمة انتي يمتى تعقلين و تلمين بناتج، ياهو كَالج اليوم خطبتهن و هيج مصخمات رواحهن ؟!
- ليش يمة إلا خطبتهن يلا يترتبن ...
- وج يمة ذني بنات حديثات، ما يصح هاللبس و المكياج هلكَد، أشو هي العروس ما لابخة بكَدهن !!
اندارت على وطن تباوع لها من فوكَ لجوة و هي ترد،
- أي يمة اشو هي عروس و وجهها فاهي، قابل كلها تصير مثلها ؟!
رفعت إيديها و غمتها،
- امدا هالتربية اي والله، ولو اذا انتي الأم شتربين قابل ؟!
كَعدت ديما بصفها تهمس،
- اكَولج باعي هذني، تكَول هن العرايس !!
ابتسمت وطن،
- شكو بيها، خليهم متونسين ...
- باع هاي أم المتونسين، دباعي باعي هذيج راح تطكَ و تموت تريد تكَعد بمكانج ...
تمتمت بهمس،
- ما تجي تاخذه و تفضني ...
كَرصتها ديما بزندها،
- سمعتج سمعتج، طاح حظج من تعوفين اخوية الكيكة لهاي الثولة ...
سكتت خجلانة إنه ديما سمعتها، كل ظنها إنه همساتها ما راح تنسمع وسط هذه الهوسة ...
شوية و دخلت أم أنس و صاحت،
- طفوا الأغاني يا بنات .. توتة، يلا يمة دا يعقد لكم الشيخ ...
رجفة سرت بجسمها .. كان كل شي عادي إلى أن حان وقت الجد ...
كَامت من مكانها و أم أنس خلت على راسها شال أبيض طويل نزل يغطي مفاتنها الظاهرة من الفستان و طلعت وياها لساحة الدرج، تلكَاها أبوها واكَف و ظهره لباب الهول المردود .. عيونه تتأمل هيأتها بنظرة حنونة اخترقت قلبها، ما لكَت نفسها غير تحت ذراعه و هو يمسح بيمينه على راسها و يهمس يم إذنها،
- جاهزة باباتي ؟!
هزت راسها بالإيجاب و عيونها مليانة دموع، رفع راسها و سأل عاكَد حواجبه،
- ليش الدموع بابا، شنو بطلتي ؟!
و اندار على زوجة اخوه برمشة عين خفية عن وطن،
- ام أنس يابة لموا جوالاتكم و الله وياكم ما عندي بنية للزواج ...
ضحكت ام أنس،
- يااا وج يمة على بختج، إذا بطلتي هسة اخذه و امشي و لا تدمع هالعيون الحلوة من وراه ..
و رجعت تحاول تضحكها و كَالت و هي تضرب بكفها اليمين على ظهر الكف اليسار بحيرة،
- بس اذا هججنا تالي الليل وين نولي ؟!
أنت تقرأ
صراع الحب و الكبرياء
Romantizmظلم تعرض له جيلين من الأبناء على يد الجد .. فرق إبنه عن زوجته، و كانوا ضحايا ظلمه ثلاث أشخاص .. زياد، سميّة و وطن ... و عاود كرّة ظلمه على حفيدته بعد سنين بزواج إجبار من ابن عمها الأكبر ... هي .. عنيدة، ذات كبرياء ... و هو .. يحمل نفس الدماء، عنيد،...
