#الفصل_الثاني_و_الخمسون
#صراع_الحب_و_الكبرياء
يانسمة هوى شمدريني راح اهواك
كلت مثل الهوى ومادري شميتك
من ذاك الوكت ماغبت عن البال
القلب بسمك تسجل وانحسب بيتك
فصلت البشر سويتهم تمثال
وانت الروح بالتمثال خليتك
حجر كل الناس بس كامو يحنون
قطره انطيتهم من بحر حنيتك
......
الثلاثاء قبل خطوبتهم مر لهم العصر، بدلت و رتبت نفسها، و دخلت للاستقبال سلمت عليه بخجل من أبوها الي ما طول دقايق و أخذ موبايله الي يرن، و طلع للطرمة .. تارك لهم الأجواء مخلية، بعض الشيء ...
أول ما طلع ابوها التفت هو بنظرة مليانة حب،
- شلونج ديما ؟!
ردت بخجل من اتصال نظراتهم،
- الحمد لله، انت شلونك ؟!
- على الله بخير بشوفتج، شلون تحضيراتج ؟!
- ماشية، دا اجهز شوية شوية ...
سكت شوية و نهض من مكانه تقرب كَعد على نفس القنفة الطويلة و مد لها ظرف مغلق،
- تفضلي ست البنات، هذا مبلغ مبدئي جهزي بيه نفسج للحفلة .. و اذا احتاجيتي بعد لا يردج بس لسانج ...
- ماكو داعي بعد، قابل شراح اجيب هسة ؟!
- لا حبيبتي جيبي الي نفسج بيه و حضري للحفلة مثل ما تريدين، و أمانة دينار فوكَ الفلوس ما تصرفين منج، بس تحتاجين شيلي التلفون و كَولي ...
هزت راسها بالإيجاب بس بداخلها مستحيل تسويها و تنفذ الي يكَوله و هم بنص السوق لو تعرف تستغني عن هواية أشياء .. حيل استثقلت الفكرة ...
و قاطع أفكارها و هو يسأل،
- و بقى الذهب، باعي انتي تعرفين اهلي بعيدين هسة و اني ما اعرف بهاي السوالف، فشتريدين، اخليهم هم يجيبوه على درايتهم، لو نطلع احنا و الوالدة نجيبه منا ؟!
صفنت للموضوع و ردت بتلقائية،
- لا نجيبه منا ...
- هاهية يابة، لعد وينها الوالدة ؟! صيحيها خل نحاجيها ...
طلعت صاحت لأمها، و شوية و دخلت هي وياها و بادرها بكلامه،
- ها عمة، خوما مشغولة ؟!
- لا يمة، كَول ردتني ؟!
- بكل خير إن شاء الله .. عمة انا هسة حاجيت ديما، باجر إن شاء الله الصبح افرغ نفسي و نطلع نشتري الذهب .. انا ما اعرف بهاي السوالف و ما عندي وحدة من اهلي قريبة تطلع وياكم هسة، فانتي شتفصلين انا البس ...
و امها ترد،
- يمة انت شوف شكَد حاط للذهب و إن شاء الله ما نختلف، هو الك و لمرتك ...
- هذا هو لعد باجر من الصبح نطلع و إن شاء الله ما اخلي شي بنفسها ...
- إن شاء الله يمة، الخير موجود و الله يسعدكم إن شاء الله ...
ظل يتبادل وياهم أطراف الحديث لبعض الوقت و استأذن من ابوها و طلع ...
أنت تقرأ
صراع الحب و الكبرياء
Romanceظلم تعرض له جيلين من الأبناء على يد الجد .. فرق إبنه عن زوجته، و كانوا ضحايا ظلمه ثلاث أشخاص .. زياد، سميّة و وطن ... و عاود كرّة ظلمه على حفيدته بعد سنين بزواج إجبار من ابن عمها الأكبر ... هي .. عنيدة، ذات كبرياء ... و هو .. يحمل نفس الدماء، عنيد،...
