#الفصل_التاسع_و_الأربعون
#صراع_الحب_و_الكبرياء
الحُب: "من أكثر الاشياء رِقّة، وأكثرُها قَسوة.. يرفعُك حين اللقاء بجناحين للجنّة، ويرميك حين الفراق على أكثر صخور الأرض صلابة.. إنه يقسم القلبَ نصفين، والفرح نصفين، والحُزن نصفين، والعافية نصفين، والألم نصفين، يجعلك تعرف ماذا يعني أن تكون اثنين وأنت واحد ❤️
HaneenAli733
......
رجعت للبيت بنهاية الدوام و طول الطريق تضرب صفنات، مرة تفكر بكلامه و مرة تفتح دفترها تباوع للرقم، حتى خطه المزج حفظته و حفظت شلون يمزج بيه .. خطه خط طبيب بامتياز، رغم هم يموتون من هذه الحالة و يعانون منها الويلات بشغلهم، و هي محافظة على خط حلو أبد ما تغير بسنوات دراستها للصيدلة، بس هذا خطه مصيبة، بل و كارثة من الكوارث .. لا و بكل ثقة انطاها دفتره تنقل منه، و ما فكر شراح تنقل، و وين راح تلكَى معلوماتها الي تدور عليها ...
وصلت للبيت بين الصلاة و الغدا و ترتيب المطبخ الي على رغودة خلته، صعدت لغرفتها، و بدل قيلولة الظهيرة المعتادة حطت دفتره بحضنها، و كَعدت تستكشفه بفضول .. كل كلمة مشمورة بصفحة، ماكو جمل متكاملة مجرد كلمات متفرقة .. ظلت تصفن على كلمة كلمة، شي فهمته و شي ما فهمته، و شي أصلاً ما ضيعت وقتها بإلقاء نظرة عليه ...
سدت الدفتر و فتحت دفترها .. اتصلت بمروة نقّلتها الي ناقصها و سدت الدفترين خلتهم يم راسها و نامت للعصر و التهت بعدها بدراستها .. روتينها اليومي كل يوم، نادر تطلع من غرفتها إلا بوقت الوجبات أو بنهاية الاسبوع .. حياتها بين تحضير و واجب و بحث و امتحان و على هذه الرنة مرت بيها الخمس سنوات هذه ...
ثاني يوم بالدوام و بأثناء إحدى المحاضرات كان الدكتور متعود يسأل أسئلة من المحاضرة الماضية و يجاوبوه، و يتناقشون قبل لا يبدأ بالتكملة، و هالمرة ظل يسأل و محد يجاوب إلى أن انفلتت اعصابه عليهم و كَال لهم إنه يوم الغد امتحان بالمادة ..
صاح واحد من الطلاب،
- دكتور عدنا روتيشن باجر ...
- مو شغلي هذا، شوكت يخلص دوامكم بالمستشفى ؟!
- ساعة وحدة ...
- اي تطلعون من المستشفى و الكَاكم هنا وحدة و نص، امتحنوا و توكلوا للبيت ...
انتهت المحاضرة و هي تدور بعيونها على خالد .. دفتره عدها و الامتحان باجر، و هو ما هو .. مختفي اليوم ...
انتظرت تلمحه و ماكو .. و هنا قررت تستعمل الرقم مرغمة، مو بسبب مساعدته إلها يروح عليه الامتحان الي ما يعرف عنه شي ...
فتحت دفترها، دخلت رقمه و اتصلت .. رن مرة و اثنين و بالثالثة اجاها الرد و نبضات قلبها المتسارعة تضرب بإذنها من التوتر، و اجاها صوته،
- ألوو ...
تحمحمت تجلي صوتها المرتبك،
- آاا، ألو السلام عليكم ...
- و عليكم السلام و الرحمة، تفضلي ...
أنت تقرأ
صراع الحب و الكبرياء
Romanceظلم تعرض له جيلين من الأبناء على يد الجد .. فرق إبنه عن زوجته، و كانوا ضحايا ظلمه ثلاث أشخاص .. زياد، سميّة و وطن ... و عاود كرّة ظلمه على حفيدته بعد سنين بزواج إجبار من ابن عمها الأكبر ... هي .. عنيدة، ذات كبرياء ... و هو .. يحمل نفس الدماء، عنيد،...
