صراع الحب و الكبرياء

الفصل الحادي و الثلاثون

#الفصل_الحادي_و_الثلاثون
#صراع_الحب_و_الكبرياء

رجعت للبيت و كل بالها و فكرها مشغول بطلبه الغريب .. شنو يريد هذا ؟! من وقت الرسالة و هو مبتعد حتى سلامه من بعيد .. و هسة فجأة يطلب يتواصل وية أخوها !!!

قصّت القصة على تغريد و كان ردها،
- كَولي لأنس حتى يفهمنا شلون نتصرف، لا تطلع وراه مصيبة و يبلينا ...

- مو خاف عيب، و يفكر بغير شي ...

- حتى لو، المهم يصير عنده علم .. بعدين هو متفهّم ما راح يعوف أصل الموضوع و يفكر بغير شي ...

و طلعت متوجهة لغرفته .. طرقت على الباب و اجاها صوته يأذن لها بالدخول .. دخلت و كان هو متمدد على ظهره و ايديه جوة راسه و نهض لحيله أول ما دخلت،
- هلو أنس ...

- هلا حبيبتي، رايدة شي ؟!

نطقت بارتباك،
- أااا، ردت احجي وياك بموضوع، خوما مشغول ؟!

تربّع على سريره و رد،
- لا تعالي، ما عندي شي ..

كَعدت مقابيله مرتبكة ما تعرف شلون تفتح الموضوع، و شجعها و هو يكَول،
- هاا ديما، وينه لسانج يمعودة ؟!

- أوووه، أنس، مو وكت تتداهر، اسمع يعني الموضوع جدي مو مال شقى ...

- دكَولي يا عيني، دا اسمعج ...

- باوع هو اكو واحد ويانا بالكلية، سألني عنك ...

عكَد حواجبه بتوجس و استغراب،
- منو هذا ؟! تعرفيه ؟!

- هو ببداية السنة إجانا نقل من جامعة البصرة ...

- اي ؟!

- اي و اليوم سألني عنك .. يعني ما أدري شلون عرفك و عرف شغلك، بس سألني عن مكانك وين، يكَولي محتاجك بشغل مدري استشارة .. يعني هيج شي ...

- و منين يعرفني ؟!

- ما ادري هذا الي حيرني، فكَلت أكَولّك قبل لا أنطيه أي معلومات ...

سكت ثواني و سأل،
- شسمه ؟!

- خالد ...

- لا بربج، مليون خالد بالعراق اكو ...

- ما ادري والله، مو كَتلك جاي جديد و ما مختلطين بيه هواية ...

- باعي ما عليج بهذا الموضوع .. الدنيا ما تتأمن و قبل جم يوم وطن وكَعت لها بمصيبة من ورا ناس مدري منين و استلكَوا اجدادي يلا طلعتها سالمة .. ديربالج منه و غلسي ع الموضوع .. الي عرف اسمي و شغلي يكَدر يوصل لي اذا يريد ...

- و إذا رجع سأل ؟!

- لا تنطيه وجه .. كَعدة وحدج لا تكَعدين و محد يتقرب عليج .. ديما لا تخليني شايل همج انتي اللخ بروحتج و جيتج من الدوام، انتو كوم بنات و شاب راسي و اني اركض وراكم و اخلي عيون عليكم بكل مكان تروحوله، وكتنا مو خوش وكت و انتي شايفة حوادث الخطف و الاعتداء بالجملة و بوضح النهار و احنا ما صار لنا اسبوع من طلعنا من مصيبة بنت عمج ...