صراع الحب و الكبرياء

الفصل السابع

#الفصل_السابع
#صراع_الحب_و_الكبرياء

كَاعدة بغرفتها تدرس لامتحان يوم الغد ..و على إيميل الماسنجر تتناقش وية الشلة عن الامتحان و تكتب لهم مرشحاتها للأسئلة .. فجأة ما حست إلا بصوت صياح جوة يهز البيت هز ..

طلعت من الغرفة بسرعة و وكَفت يم المحجر تسمع لصوته الي يرعد ..
- يمة انتي كَايلة لاهل هدى اني خطبت ؟!

- اي كَلت لأمها .. ليش إن شاء الله ناوي تضم عليهم ؟!

قبض على إيده و صاح بعلو صوته
- خرب .... شعليكم انتو شعليكم .. شلون تتصرفون من كيفكم ؟! هسة شلون اركَعها يمة فهميني شلون ؟! ما فكرتوا هالمطي هذا شنو موقفه من كل الي يصير ؟!!

صاحت أمه و هي ترفع سبابتها بوجهه،
- لا تعلي صوتك بوجهي ولك .. مو صرت اطول مني و توكَف تصيح بوجهي لخاطر مشاعر ست الحسن .. هي هاي تاليتها ؟!!

- يمة مو لخاطر أحد رحمة لوالديج لا تحجين مدري شلون .. اي بس ما فكرتي بموقفي و هم يعرفون هيج شي منج و اني ساكت عنه ؟!!

- و يفكرون بالي يفكرون بيه، مو كافي مماطل أنس ؟! شكَد عمرك فهمني، صار سنة و الخاتون تجرجر بظهرها و انت منطيها على مايها، شنو السبب فهمني ؟! لا تكَولي دراسة و من هالخرط التخرطه علينا .. أشو شهادة و عندك و مدير شركة شكبرها شكَدها .. بيت و سيارة و شغلك خير من ألله، شنو الي يمنع تتزوجون تعال فهمني اني امك و من حقي أعرف ...

- يمة احنا من البداية اتفقنا بيناتنا ليش تتدخلون ؟! جدي و ابوية و هسة انتي، انتو شعليكم بية إن شاء الله ما اتزوج، شاكيلكم آني ؟! ليش تطلعوني من طوري ؟!

- روح يمة لا اطلعك من طورك و لا تطلعني من طوري .. روح سوي التريده و لا تحسب حساب لأحد .. هو هم صوجنا شايلين هم واحد راسه مغسول و لا يسمع لأب و لا يهتم لجبير ...

طلع من البيت و ركَع الباب وراه و هو يدردم بعلو صوته ...

نزلت من الدرج و هي تشوف أمها مفرفحة و تدعي،
- ألله لا ينطيج و لا يوفق امثالج .. ولكم هاي زلم تالي وكت تكَودهم التسوة و الما تسوة ...

راحت للمطبخ و تسأل رغد الي دا تنظف بالمطبخ،
- أكَولج شكو .. شو علكَت ؟!

كفختها تغاريد و هي تهمس،
- امشي اصعدي فوكَ و لا تحشرين روحج بين الكبار ..

حكت راسها و هي ترد بهمس حتى لا تسمعها أمهم،
- ايي شبيج .. هسة الي يسمعج يكَول بعدني بالكَماط .. شكو تعاركوا، شنو أمي حاجية لأهل جنتنا المزعومة ع الخطوبة ؟!

- اي و الظاهر راح تعلكَ .. اول مرة أنس هيجي ينفعل، الله يعلم شصاير بينهم و فقد اعصابه على أمي ...

- أكَولج يعني هسة باجر اكو خطوبة لو لا ؟!

- والله ما اتوقع و توتة صحتها تعبانة .. يمكن تأجلت ...